San Lucas 1

1Be'nn zan ba gokra'll ake' wllia ake' yich dan' gok radjto' ni, le naken to da li, 2na' llonen bien wayojen kon kan' bzejnie' be'nn ka', bre'e da nellte kan' goken. Leake'n gok rallna'a ake' wzejnie' akre'n be'nne. 3Nada' leska' ba bnnabyolla' kwasro, akren' gok ka bxhen da nellte. Ke len na', nna' llzoja'n ko'o rwe', Teófilo, llapa' rwe' bara'nne, 4nench wayoll nnezro' ka nak da lin' ba nnézkzero'n. 5Kan' llnebia' be'nnen' golle Herodes gan' nzi'i Judea, bzo to bxoz re Zacarías. Zacaríasen' nake' txhen bxoz ka' nzi'i Abías. Na' no'r ke Zacaríasen' re Elisabet, na' nake' xhi'nn dialla ke da Aarón, be'nnen' gok bxoz nelle. 6Llon ake' doxhen kan' ne ley ke Diosen', na' be'nn wen kwis nak ake', to nono bi ne ke ake'. 7Nono xhi'nn ake' ni'te, le Elisabeten' nake' be'nn will, na' ba nak ake' be'nn gore. 8Kate bllin lla baya'l Zacaríasen' ren be'nn lwellje' ka', cho' ake' yoda'on. 9Na' kan' llonkze bxoz ka', llbej twej twej ake' nench lloe' lljazeye' yar rao bkoy yoda'on. Na' baya'lkze Zacaríasen' gone'n. 10Chak lley yaren' rao bkoy yoda'on, be'nn zan lla'a lia're llalwill ake' Dios. 11Bixha bllinkze to angl ke Xanllo Dios gan' ze Zacaríasen', na' jasé anglen' kwit bkoy gan' llzeye' yaren'. 12Ka bre'e Zacaríasen' anglen', to gokllejla'llze', le llebrazen' bllebe'. 13Na'll anglen' golle' le'e: —Bi llebo' Zacarías, Diosen' ba bzenaye' ke dan' llnnabo'n, na' nna' no'r ko'o Elisabeten' so to xhi'nne', na' wsi'obe' Juan. 14Na' so'o nbaraz, yewero', na' be'nn zan yewerén akre' re' katen' ba gorjbe'n. 15Bida'on gakbe' bi za'k rao Dios, bi ye'jbe' xis uva, na' billre da llsolle be'nne, na' sorén Spíritu ke Diosen' lebe' ka za garjterbe'. 16Na' gonbe' nench be'nn zan be'nn Israel ka', wayechj ake' we'rao ake' Dios. 17Na' kwiaraobe' rao Xanllon', na' Diosen' we'ebe' Spíritu ke'en, na' gonbe' kan' ben Elías, be'nnen' be'e xti'll Diosen' kana'. Be'nn dilrén xhi'nne', gonbe' wani't ake' wen; be'nn bi llzenay, gonbe' nench wzenaye'. Na' gonbe' nench be'nn ka' nni't ake' xhnid, we'rao ake' Xanllon' katen' yede'n. 18Na'll Zacaríasen' lle'e anglen': —¿Akxha gak nnezra' cha' da li gak kan' ba bne'o nga? Le ba naka' be'nn gore, leska' no'r kia'n ba ngore'. 19Na'll lle anglen' le'e: —Nada'n naka' angl Gabriel, na' llona' xchin Dios, Le'en bse'le' nada' nench zadtixjwe'ra' rwe' di'll wen nga. 20Na' nna' ga'nno' blloje, bi gak nne'o llinte katen' garj xhi'nno'n, le bi byejle'o kan' bnia'n, le da li da gakten. 21Be'nn zan ka' lla'a lia're, llbexh ake' Zacaríasen', na' llabán akre' dan' bi llallojze' lo yoda'on. 22Bixha kate balloje'n, kere gokll nne'e, na' llone' zre senze, na' bayakbe'e be'nn ka', bre'da'ore'n. 23Ka bayoll xhman ke'en na' zayeje' rille'. 24Bde na', bia'a xhi'nn Elisabet no'r ke Zacaríasen'. Ga'y be'o bzoze' yo' ke'e, bi bllojkze', na'll lloe'rén kwine' di'll ne'e: 25“Nna'll ba ben Diosen' wen kia', ba bake'e yel zdo' kia'n, nollno nne kia' nna naklla' be'nn will.” 26Ba gok xop be'o noa' Elisabeten' bda'o ke'en, kate bse'l Diosen' anglen' re Gabriel to yell da nzi'i Nazaret gan' nbane Galilea. 27Bse'le' le'e ga zo to no'r da'o, re María, ba naken si'i to be'nn re José le'e, na' Josén' nake' xhi'nn dialla rey David. 28Ka byo' anglen' lo yo' gan' zo Marían', lle'e le'e: —¡Padiox, Dios zorene' rwe', nna' gone' wen ko'o, gonla'ye' rwe' wdetere ka no'r ka' yela'! 29Marían' bllebe' kwis, na' llakre' bixchen lleze anglen' le'e ka'. 30Na' anglen' lle'e le'e: —María, bi llebo', Diosen' ba breje' rwe', na' gone' wen ko'o. 31Go'o bda'o, so to xhi'nno', na' wsi'obe' Jesús. 32Na' Jesúsen' gake' to be'nn brao, wsi'i ake' Le'e Xhi'nn Dios be'nn zo yebá. Na' Xanllo Diosen' gone' nench nnebie' kan' bnebia' David xozxta'we'n. 33Nnebie' gan' nzi'i Israel ke chnare, na' bi te yel llnebia' ke'en. 34Na'll lle Marían' anglen': —¿Akxha gakrizen le bi nna wchayna'a? 35Na'll goll anglen' le'e: —Yed Spíritu ke Diosen' cho'n yichjra'llda'on, na' yel wak ke Dios be'nn zo yebá son kwe'jen rwe', ke len na' bida'on garjen' gakbe' bi ke Dios, na' wsi'i akebe' Xhi'nn Dios. 36Leska' no'r biro', Elisabeten', no'ren' nak no'r will batna', ba gok xop be'o nna', noe' bda'o la'kze ba nake' be'nn gore. 37Le bibi de da nak bni', da bi gak gon Diosen'. 38Na'll lle Marían' anglen': —Ni zoa' naka' be'nn wen llin ke'e, wakse gon Diosen' kia' kan' ba bne'o nga. Ka' gok, na' baza'a anglen' zayeje'. 39Bde chop chonn lla, le byejte Marían' to yell da llia rao ya' gan' nbane Judea. 40Na' blline' rill Zacaríasen', na' byoe' bwape' Elisabeten' lliox. 41Bixha kate bene Elisabeten' balwill Marían' le'e, le bxhi'tte bda'o ke'en lo le'en, na' Spíritu ke Diosen' byo'n yichjra'llda'we'. 42Na' bawere' kwis bnne'e zillj, lle'e Marían': —Dios ba benla'ye' rwe' rao yeololte no're, leska' bda'o ko'on nak la'ybe'. 43Xhna' Xanllo ba nako', ker bi za'kanda'. ¿Bixchen zadra'nnzo' nada'? 44Kate bnne'on, le bxhi'tte bda'o kia'n lo lia'n bawebe'. 45Nbaraz ko'o rwe' ba byejle'o, da li gonte Diosen' kan' ba golle' rwe'n. 46Na'll bne Marían' lloe'rawe' Dios: Lloe'rawa' Diosen' do yichj do ra'lla'. 47Na' lo yichjra'llda'wa' llawera', le Diosen' nake' wasrá kia'. 48La'kze naka' ka to be'nn wen llin, bibi za'ka', Diosen' baya'chra'lle' nada'. Na' be'nn zan be'nn lla'a nna', na' be'nn za cha'a yellrio ni, nne ake' kia': “Nbaraz ke no'ren'.” 49Diosen' nake' be'nn wen, nape' yel wak xhen, ba bene' da wen kwis kia'. ¡Le'e nak la'ye kwis! 50Noteze be'nn llape Diosen' bara'nne, leska' Diosen' waya'chra'lle' leake'. 51Na'll ba broe're' yel wak xhen ke'en, na' bachinnje' xhbab ke be'nn ya'ra'll ka'. 52Be'nn llnebia', be'nn llon ka be'nn brao, ba blli'ye' be'nn ka' ka'le, na' blepe' be'nn ya'ch, be'nn nexjra'll ka'. 53Be'nn ya'che, be'nn don, ba be'e leake' ka yerj akre', zan be'nn wnia' ka', la'kze bze ta'k ake', bibi be'e leake'. 54Ba gokrene' Israelen', le yell ke'en, le jadinra'lle' waya'chra'lle' leake'. 55Ka di'll be'rene' xozxta'ollo Abraham, bne'e gonla'ye' yeolol xhi'nne' za cha'a. 56Chonn be'o bzorén Marían' Elisabeten', na'll baze'e zayej rille'. 57Bixha kate bllin lla garj bda'o ke Elisabeten', bzo to bida'o byio. 58Ka gokbe'e bi'ch lwellje' ka', na' be'nn wrill ke ake', kan' ba gokrén Diosen' Elisabeten', ren ake' bawerén akre' le'e. 59Gok xo'n lla na', jwe'ebe' bzobe' sen dan' nzi'i circuncisión. Na' gokra'll ake' wsi'i akebe' kan' re xabe'n, Zacarías. 60Na' xhna'be'n bne'e: —Ka'a, bi si'be' ka', Juan, si'be'. 61Na' lle ake' le'e: —¿Bixchen? Nono bi'ch lwelljre llra' be'nn re ka'. 62Na'll ben ake' sen rao xabe'n, llnnab akre' le'e akre lle'nre' si'i bda'on. 63Na' bnnabe' to bray da'o, na' bzoje'n bllie'n: “Juan, si'be'.” Yeolol be'nn ka' llabán akre'. 64Na' le gokte banné Zacaríasen', le bzoraote lloe'rawe' Dios. 65Yeolol be'nn wrill ke ake' ka', blleb ake' kwis, na' yeolol yell ka' zjalli' radj ya' ka', doxhen ya'n gan' nbane Judean', goslas di'll kan' goken. 66Na' yeolol be'nn ka' llene di'llen', da xhen llayón ake' xhbab lo yichjra'llda'o ake', ne ake': —¿Notek gak bida'on? Le nakbie'tekze llonla'y Diosen' lebe' tlla tlla. 67Spíritu ke Diosen' byo'n yichjra'llda'o Zacaríasen', na' benen nench be'e di'll ki: 68Nak la'y kwis Xanllo Diosen' ke lli'o be'nn Israel, le ba bre'e nench yesre'e lli'o nakllo yell ke'e. 69Rao dialla David be'nn ben xchin Dios batna', ba blise' to be'nn nap yel wak nench yesre'e lli'o. 70Ka di'llen' be'rén Diosen' be'nn ka', be'e xti'lle'n kana', le leake'n bzejnie' akre' be'nn xti'lle'n. 71Bchebe' yesre'e lli'o rao na'a be'nn ka', bi zorén lli'o wen, na' rao na'a be'nn ka', llwie lli'o. 72Na' bchebe' waya'chra'lle' xozxta'ollo ka', na' bi kwej yichje' ka di'llen' be'rene' leake'n. 73Leska' golle' xozxta'ollo Abraham na', 74wllin lla kate yesre'e lli'o rao na'a be'nn ka' llwie lli'on, nench gak we'raolloe', billbi nxholl sollo cha' gonllo xchine'n. 75Na'llen' gonllo da wen, gakllo rallne'e ke chnare. 76Na' rwe', xhi'nna', be'nn lloe' xti'll Dios be'nn zo yebá, nne ake' ko'o, rwe' kwiarao rao Xanllon', goncha'o gono' xhnid gan' tie'n. 77Rwe' wzejnie'ro' be'nn Israel ka', kan' lle'ne Diosen' yezi'xhene' da xhinnj ke ake'n, na' kan' lle'nre' yesre'e leake'. 78Dios kellon', yel llaya'chra'll ke'en ba bene', nna' re'llo beni'n za'a yebá. 79Be'nn lla'a xchole, ka ga de yel got, re'e akre' beni' ke'en, na'llen' re'llo garen' ka'llo, na' chejnie'llo ka gonllo nench cha'llo wen. 80Bixha bida'on zjaze ll-lli'obe', llejnie'tebe' doxhen kan' lle'ne Diosen', na' bzoteze bzobe' yi'xe ga nak latj dach, bllinte lla broe'raobe' be'nn Israel ka'.

will be added

X\