Judas 1

1Nada' naka' be'nn wen llin ke Jesucristo, na' naka' be'nn bi'ch Jacobo. Llzoja' re' ba brej Xallo Diosen' nench nakre be'nn ke'e, re' nkwe'j Xanllo Jesucriston' rao da xhinnjen' dan' nakre' txhen na'. 2Llnnaba' rao Xallo Diosen' waya'chra'lle' re', na' wzoe' yichjra'llda'oren' so kwezre nbaraz, na' gakbe're nllie're' re'. 3Be'nn bi'che nllie'ra', gokra'lla' kwis wzoja' re', na' wzejnie'ra' re' kan' ben Xanllo Jesucriston' nench basre'e lli'o. Ba benen bien llzoja'n, na'll llnneyoera' re' gondipra'llre, na' chejle're di'll li ke Diosen' da bzejnie're' lli'o to chi'ze, lli'o nakllo rallne'e. 4Ni't bal be'nne ziye'e ake' nench llákere llon ake' re' txhen. Bi llzenay ake' ke Diosen', ne ake' nllie'kze Diosen' lli'o, na' wakse gonllo dan' nen kello, llazi'xhenkze' kello. Na' llkwas ake' ke Diosen' ka'le, be'nnen' llaya'l wzenay yeolol be'nnach ke'e, na' ren Xanllo Jesucriston'. Kana'te byoj xti'll Diosen' nen, be'nn ka' llon ka' yellayrao ake' kwis, ni ke da xhinnj ke ake' ka'. 5La'kze ba bnnézere yeolol kan' goken, lle'nkzera' lljadinra'llre Xanllo Diosen' be'nnen' basrá da xozxta'o be'nn Israel ka' rao na'a be'nn Egipto ka', bde na' blleyie' yeolol be'nn bi byejle' ke'e. 6Na' zan angl ka' bi gokra'll ake' gon ake' dan' bllia Diosen' bia'a gon ake', na' gokra'll ake' gak ake' be'nn braoll. Na'll bllach ake' gan' bllia Diosen' bia'a so ake'n. Na'll bse'l Diosen' leake' gan' nak xchole, na' zjadé ake' nllej ake' gden ke chnare, nench sa'kzi' ake' kat llin lla wchoybia' Diosen' ke ake'. 7Ka nakse be'nn ka' blla'a yell gan' bxhi'i Sodoma ren yell gan' bxhi'i Gomorra, na' yezikre yell nechj to kwite, leake'n ben ake' kon da nen ke xpe'r ake'n, bzorén ake' be'nn bxhej, ben ake' leake' ka no xho'r ake'. Len na' nak da xhinnj, na'llen' bse'l Diosen' yi' da jazey yell ka', na' blleyi' ake'n. Na' ka'n bene' na', llasnisre' lli'o be'nnach ga't yel llza'kzi' ke chnare lo yi' gabil ke be'nn ka' bi llzenay ke'en. 8Leska'kze be'nn ka' llroe' llsede re' di'll wenra'llen', llebia'kze zjani'te llon ake' da xhinnj ne ake' ba bre'da'o akre', na' ne ake' nakse wen dan' llon ake'n: llon ake' da nen ke xpe'r ake', bi lle'n akre' wzenay ake' ke Xanllo Diosen', na' llasnnechach ake' ke angl ka', be'nn ka' nak be'nn za'ke. 9Na' nlla're ben angl ke Diosen', le kana' gok chnia ka angl braon' re'e Miguel gokyollrene' daxi'on, le gokra'll daxi'on yeyoa'n da Moisésen' kan' gote'n. Na' la'kze Miguelen' nake' angl brao ke Diosen', bi bayaxhjre' wchachrene' daxi'on, to gollze'n: “Xanto' Diosen' tilrene' rwe'.” 10Na' ka nak be'nn ki nnechach ake' ke biteze da bi llejnie' akre', na' nao akse' llon ake' kon da nen ke xpe'r ake'n, ka llon bayi'x ba bi llejnie', na' da ka' llon ake'n ll-lleyi'n leake'. 11Nya'chraz gak ke ake' dan' zo ake' llwie lwellj ake' kan' ben da Caín, na' lloe'la'll ake' llon ake' da xhinnj, nench gon ake' gan mell kan' ben da Balaam. Yichj ake' xti'll be'nn ka' brej Diosen' nnebie' leake', ka'kze bi bzenay be'nnen' golle da Coré kana'. Kan' blleyi' da Corén' yel bi bzenay ke'e, ka'kzen' kweyi' be'nn ki. 12Na' kate re' lle'j llaore txhen, nakbie'kze nllie' lwelljre, leake' na' llaoxen ake' ka nen ke ake', latj gon ake' wen ke be'nn lwellj ake'. Bibi za'k dan' llon ake'n, dan' llon ake' na', naken ka bzi'o da dop le' ra'll lliche, nak ake' ka to be'nn gop xhi're, na' bi lloe'la'll ake' gap ake' xhi'r ka'. Leska' nak ake' ka to bej da nray be' dan' bi nsa'a yej, na' ka to yay xhix da bibi llbia kat ll-llin lla kwian, na' latj kwian na', llyechen, na' llachjen llje'ten rao yo. 13Nak ake' ka nisda'o da llas lletj, na' llallo'nnen blli'n ga nak rao yo lloa' nisda'on. Na' nak ake' ka berj da bill llia ga llaya'l kwian, le Dios na' ba nyixje' ke ake', sa'kzi' ake' ke chnare gan' nak xchole kwis. 14Na' Enoc be'nnen' gok be'nn galle rao dialla Adán na', leska' be'e di'll da bzejnie' Diosen' le'e ke be'nn ka' llroe' llsede di'll wenra'lle, kan' bne'e: “Bre'ra' za'rén Xanllo Diosen' angl zan kwis ke'en, 15nench choybie' sa'kzi' yeolol be'nn nap do'le. Yeolol be'nn ka' bi bzenay ke'en, sa'kzi' ake' ke chnare dan' ben ake' da xhinnj kwis bi bzenay ake', na' dan' bnnechach ake' ke'e.” 16Na' ka nak be'nn ka' llroe' llsede re' di'll wenra'llen', zoteze zo ake' llakbe'y akre' ke Diosen', bibi llazra'll ake'. Llon akteze' kon bi nen ke ake'. Ren xti'll ake'n llayoe'rao kwin ake', na' llpe aktere' be'nn yobre nench llon ake' gan mell. 17Zan re' be'nn bi'cha' nllie'ra', llaya'l yesa'ra'llre di'll ka' be'e postl ka' brej Xanllo Jesucriston'. 18Bne ake': “Katen' ba zo rez yed Xanllo Jesucriston', nni't be'nn bi chejle' ke Diosen', na' wtitj akre' Le'e, na' gon ake' kon da nen ke ake' da nak zdo'.” 19Na' be'nn ki llon ake' nench re' bi llak re' toze. Llon ake' xhbab da zera'll xpe'r ake', le bi yo' Spíritu ke Diosen' lo yichjra'llda'o ake'. 20Zan re' be'nn bi'cha' nllie'ra', llnneyoera' re' gondipra'llre sere war, chejle're di'll li ke Diosen' dan' za'k na'. Na' leyelwill Diosen' kon kan' wzejnie' Spíritu ke'en re'. 21Na' lesó legakbe'e nllie' Diosen' re'. Na' dan' llaya'chra'll Xanllo Jesucriston' lli'o, gonne' yel nban zejlikane kello. Ke len na' lesó lekweze baten' gak kan' gone'n. 22Bal be'nne llakgan akre' akren' gon ake' kan' ne Dios na', na' lewzejnie' akre'. 23Legón ga zerao sa'kere nench yelloj ake' rao nez xhinnjen', na' bi kweyi' ake'. Na' be'nn ka' llon da xhinnjen', leska' llaya'l yeya'chra'll aklloe', do llebllo do llwiello dan' llon ake'n, na' wiallo nench bi gonrén aklloe' txhen. 24Na' Dios be'nnen' zerao nap yel wak, llkwe'je' lli'o nench ke bixllo, na' llwie' bibi do'l kello ga't kat yellinllo rawe' gan' yo' beni' ke'e na'. Kana' yewello. 25Le toze Dios na'n, Le'en nake' be'nn si'n, na' nake' be'nn wasrá kello. Nake' xan yeolol be'nnach, na' billre da zjadé. Llaya'l gonxhenlloe' ke chnare. Ka'n gakchga.

will be added

X\