San Juan 7

1Bde na', bdakze Jesúsen' broe' bsedre' be'nn ka' do gan' nbane Galilean'. Bill gokra'lle' chejlle' gan' nzi'i Judean', le be'nn Israel ka' lla'a na', llayirj ake' akre gon ake' got ake' Le'e. 2Na' ba zo rez ga'le lnni ke be'nn Israel ka', dan' llon ake' nench lljadinra'll ake' kan' bzo ake' yo' de yixh kana'. 3Na' be'nn ka' nak be'nn bi'ch Jesúsen', lle ake' Le'e: —Bi yega'nno' ganni, byej Judea na'le nench be'nn ka' llzenay ko'on, re'e akre' yel wak ka' llono'n. 4Noteze be'nn cha' lle'nre' gombia' be'nn ka' le'e nake' to be'nn za'k, bi gone' yel wak nga'chze. Cha' da li llono' yel wak, benen rao yeolol be'nne, na'll re'e akre' dan' llono'. 5Ka'n bne be'nn ka' nak be'nn bi'ch Jesúsen', le ni leake' bi llejle' ake' ke Jesúsen'. 6Na'll lle Jesúsen' leake': —Bi nna llin lla cha'a, zan re' wakse batteze chejre. 7Be'nn ka' bi nombia' Dios bi gak wie akre' re', zan llwie akre' nada', le llroe'ra' da xhinnj ka' llon ake'n. 8Lechej lnnin'. Zan bi sa'a nada', le bi nna llin lla kia'. 9Bayoll golle' leake' ka', na' go'ye' Galilea na'ze. 10Bde bza'a bi'che' ka' zjake' lnnin', na'll bza'a Jesúsen', de nga'chze byeje'. 11Na' be'nn wnebia' ke be'nn Israel ka' lla'a na', llayirj ake' Le'e rao lnnin' llasné ake': —¿Gaxha dá be'nnen' do ni? 12Na' be'nn ka' bllay rao lnnin', lloe' ake' di'll llillize ke'e, na' biteze bne totoe'. Bale ne: “Wa be'nn wen nake'”, na' ye bale ne: “Bi nake' be'nn wen, ziye'ze be'nnen' de'e.” 13Na'll llillize lloe' ake' di'llen', le yeololze be'nne lleb ake' bi gone be'nn wnebia' ka' leake', cha' yen akre' lloe' ake' xti'll Jesús na'. 14Na' ka do achje lnni na'n, kate byej Jesúsen' lo lchir yoda'o brao ke be'nn Israel ka', na' bzorawe' llroe' llsedre' leake'. 15Na'll babane be'nn wnebia' ka', llasné ake': —¿Akxha llaken da zan da nneze be'nnen'? Rencha' kere bi nzede'n. 16Na'll lle Jesúsen' leake': —Dan' llroe' llsedra' ni, kere xhbab kia'n, xhbab ke be'nnen' bse'l nada'n. 17Noteze be'nne gakra'lle gone' kan' lle'ne Dios be'nnen' bse'l nada'n, wayakbe'kzere' cha' dan' llroe' llsedra'n naken ke Dios o cha' naken da llarjla'lla' nadza'. 18Kate to be'nn llroe' llsedre' xhbab kekze', llayirjla'lle' akre gone' nench gake' xhen. Zan be'nn gakra'lle gon ake' xhen be'nnen' bse'l le'en, nnézkzello nak xti'lle'n da li, bi naken da wxhiye'e. 19’Da Moisés na', benne' re' ley dan' nsedre, na' ni tore bi llonre kan' nen na'. ¿Bixchen llayirjzre akre gonre gotre nada'? 20Be'nn ka' zjalla'a na', bne ake': —Daxi'on yo'. ¿Noxhan' lle'ne got rwe'? 21Na'll lle Jesúsen' leake': —Toze yel wak da bena', na' yeololre babánere. 22Da Moisésen' bllie' bia'a sollo sen dan' nzi'i circuncisión (la'kze kere le'en bllie' bia'an, le da bkwa'nn xozxta'ollo ka' blla'a kana'n), na' ke len na', llzoare bida'o byio ka' sen, la'kze lla nba'nne. 23Na' kan' naken, la'kze cha' naken lla nba'nne, llzoare bida'o byio ka' sen, kat llákebe' xo'n lla nench na' llonre kan' ne ley dan' bzoj da Moisésen', na' ¿bixchen llaklla're nada' dan' bayona' to be'nn we'e lla nba'nne? 24Bi wlliayi'llre be'nne cha' bi da da'o llre're' llone', legón yel koxchisen' lixheje kan' llaya'l gaken na'. 25Na'll bne to chop be'nn Jerusalén ka': —¿Kere be'nn nin' llayirj ake' nench yeso'te Le'e? 26Lewiá kan' llone'n, lloe' di'll rao be'nn yell, na' nono bi llekze Le'e. ¿Kere ba llaso'n be'nn wnebia' ka' xhbab, Le'en nake' Criston' be'nnen' bexhllo? 27Nnézello ga be'nn be'nn ni, zan kat yed Criston', nono nneze gaxha ze'e. 28Jesúsen' llroe' llsedre' llyo' yoda'o braon', ka bne ake' ka'. Na'll bne'e zillje, lle'e leake': —Llákere nombia're nada', na' nnézere gaxha be'nne nada'. Bixha kere to wrazza'n za'a. Da li zo be'nn bse'l nada'n, re' ni ke nombia'zre'. 29Nada' nombie', le gan' zoe' na'n za'a, le Le'en bse'le' nada'. 30Na' dan' bne'e ka', bale be'nn ka' gokra'll ake' go'x ake' Le'e, zan nono be'x Le'e, le bi nna llin lla ke'e, gake' rao na'a ake'. 31Be'nn zan byejle' ke Jesúsen', nake' be'nn bse'l Dios, na'll bne ake': —¿Gonlle Criston' ye ra't yel wak da za'klle ka dan' ba ben be'nn ni, kat yede'? 32Na' be'nn fariseo ka', ben akre' di'llen' lloe' ake' ke Jesúsen'. Na' be'rén ake' bxoz wnebia' ke Israel ka' di'lle, na' bse'l ake' be'nn ka' llap yoda'o braon', nench na' llje'x ake' Jesúsen'. 33Na'll goll Jesúsen' leake': —Ye chollze sorena' re', na'll waya'a gan' zo be'nnen' bse'l nada' na'. 34Na'll wayirjre nada', na' bi yellélere nada', le bi gak yedre gan' zoa' na'. 35Na'll lle lwellj be'nn Israel ka': —¿Gaxhan' ne'e wayeje' ga bi yellélelloe'? ¿Yeyeje' gan' naslas be'nn wrall ka' radj be'nn griego ka', na' wroe' wsedre' leake'n? 36¿Akxha zejen dan' bne'e ka': “Yeyirjre nada', na' bi yellélere nada', na' bi gak yedre gan' zoa'n”? 37Lla zerao llon ake' lnni na', naken lla xhenlle, na' bzellá Jesúsen' llroe' llsedre' leake', na' bne'e zillje, bne'e: —Noteze re', cha' lo yichjra'llda'oren' nakre ka be'nne llbilra'lle, llaya'l gonlira'llre nada', na' gonna' da ye'jre. 38Na' be'nnen' nxenra'll nada', gak ke'e kan' ne xti'll Dios dan' nyojen, to da wen kwis gak lo yichjra'llda'we', gaken ka to yellrio ga llartit nis da lloe' yel nban. 39Na' dan' bne Jesúsen' ka', be'e di'll ke Spíritu ke Dios dan' yedsó lo yichjra'llda'o noteze gonlira'll Le'en. Na' kan' bne'e ka', bi nna yedsó Spíritun' lo yichjra'llda'o be'nne, le bi nna gak yeolol da ka' llaya'l gak, nench wroe'n Jesúsen' nake' be'n za'k xhen. 40Be'nn ka' llzenay xti'll Jesúsen' bal ake' bne: —Da li be'nn nin' be'nn llyixjwe' xti'll Dios, be'nnen' ba naksen yede'. 41Na' ye bal ake' ne: —Be'nn nin' Criston' be'nnen' ba naken yednnebia'. Bixha ye bale'n llasne'e: —¿Bixha nello be'nn Galilea na', kwej Diosen' gake' Criston'? 42Xti'll Diosen' dan' nyojen nen, Cristo be'nnen' yeden', lloje' rao dialla ke rey David, na' nake' be'nn za'a Belén gan' nak rall David na'. 43Na' gok be'nn ka' chop kwe're, ni ke Jesús na'. 44Na' bale' gokra'll ake' go'x ake' Le'e, na' bi gok go'x ake' Le'e. 45Be'nn ka' llape yoda'o braon', jayake' gan' zjazó bxoz wnebia' ka', ren be'nn fariseo ka', le be'nn ka'n bse'l leake' nench go'x ake' Jesús na', na'll be'nn ka' lle ake' leake': —¿Bixchen bi bche're'? 46Na' be'nn ka' llap yoda'on braon', llasné ake': —Bi nna yéneto' be'nn we'e di'll wen, ka dan' lloe' na'. 47Na'll lle be'nn fariseo ka' leake': —¿Rente re' ba bxhiye'rene'? 48Ni to neto' be'nn fariseo, bi nna chejle'to' xti'lle'n, ni be'nn wnebia' kello ka', ni toe' bi nna chejle' xti'lle'n. 49Zan be'nn ki zjalla'a ni, bi nombia' ake' ley dan' bzoj da Moisésen', na' ba nbeyi' ake', dan' llejle' ake' xti'lle'n. 50Na' Nicodemo be'nnen' byej rao Jesúsen' tlle'lre be'nnen' nak txhen fariseo ka', golle' leake': 51—Ley kellon' nen bi gak wchoybia'llo ke to be'nne ba ben da xhinnj, cha' bi nna we'e di'll akren' gok, na' cha' bi nna nnézello bixhan' bene'. 52Na'll lle ake' le'e: —¿Reno' rwe' ba bayako' be'nn Galilea? Bsed xti'll Diosen' kwasro dan' nyojen, na' nnezro' ni to be'nn bdixjwe' xti'll Diosen' kana' blloje' Galilea. 53Na'll baza'a totoe', jayak ake' rill ake'.

will be added

X\