San Juan 6

1Bde gok ka', byej Jesúsen' ye chla' nisda'o Galilean'. Na' nisda'on leska' nzi'n nisda'o Tiberias. 2Na' be'nn zan nao Jesúsen' dan' ba bre'e akre' yel wak dan' llone' llayone' be'nn we'e ka'. 3Na' byep Jesúsen' to rao ya' ren be'nn ka' non Le'e txhen na', jache'rene' leake'. 4Na' ba zo rez ga'le lnni paskw ke be'nn Israel ka'. 5Na' ka bwia Jesúsen' be'nn zan ba nao ak Le'e, na'll golle' Felipen': —¿Gaxha si'llo da gao yeolol be'nn ki? 6Bne'e ka' nara'chek bi ne Felipen', le nnezkze Le'en akren' gone'. 7Na'll lle Felipen' Le'e: —Chop gayoa (200) mell dan' nzi'i denario yet xtir, kere waken ni ra't wejen bi yellel ake'. 8Na' ye to be'nn non Jesúsen' txhen re'e Andrés, nake' be'nn bi'ch Simón Pedro. Na' Andrés na' lle'e Le'e: 9—Ganni ze to bida'o, no'xbe' ga'y yet xtir kebe' da nak de yezj dan' nzi'i cebada, na' ye chop belya'. Kere bi de gon da ki ke be'nn zan ki lla'a ganni. 10Na'll lle Jesúsen' be'nn ke'e ka' non Le'e txhen na': —Leyé yeolol be'nn ka' kwe' ake'. Na' ganna' de yix dak, na'll blle' be'nn ka' rao yixen', nak ake' ka do ga'y mir be'nn byio. 11Na'll bxhi'i Jesúsen' yet xtir ka', be'e yel llioxken ke Dios. Bayoll na', be'en be'nn ka' non Le'e txhen na', na' be'nn ka' bdislas ake'n rao be'nn ka' zjalli' na'. Na' leska' bene' kone belya' ka', na' be'e totoe' kon ka berj akre' bdao ake'. 12Na' bayoll badao ake' na', na'll lle'e be'nn ka' non Le'e txhen na': —Leyetop da ka' baga'nn ye ra't wejen nench bitbi kwiayi'. 13Na'll batop be'nn ka' da la'o ka' baga'nnen', na' goken ye chllinn (12) llom dan' baga'nn rao yet xtir ga'y ka', dan' ben ake' de yezj dan' nzi'i cebada. 14Ka bre'e be'nn ka' yel wak dan' bene'n, na'll ne ake': —Da li ya'nne be'nn nin' nak be'nnen' bexhllo yedtixjwe' lli'o xti'll Diosen' yellrio ni. 15Ka gokbe'e Jesúsen' ba ze be'nn ka' wche'e ake' Le'e nench gon ake' Le'e rey ke ake', na'll baze'e, na' byeje' ya' da'on toze'. 16Ka gol na', jayak be'nn ka' non Le'e txhen lloa' nisda'on. 17Na'll bayo' ake' to lo barco lljayake' gan' nzi'i Capernaum. Ba nak ba gol, na' bi nna yellín Jesúsen'. 18Na' bzorao llechj be' rao nisda'on, na'll llas yitjen. 19Na' ka bexte zjayake'n ba bago' ake' nez lo barcon' rao nisda'on, ka bre'e akre' ba zaza'a Jesúsen' zaze'e rao nisen' to kwit barcon', na'll blleb ake'. 20Na'll lle'e leake': —Nada'n, bi llebre. 21Na'll llawé akre' kwis, bago' ake' Le'e lo barcon'. Ye chollze le ballín akte' rao yo bill lloa' nisda'on gan' zjayake'n. 22Na' bateyó na', be'nn zan baga'nn chla' lloa' nisda'o na'ze, gokbe'e akre' nono Jesúsen' zejrén, na' gokbe'e akre' billbi barco yobre llasdá, toze dan' zayo' be'nn ka' non Le'e txhen na'ze, na' bnnez akre' bi zayo' ren Jesúsen' leake' lo barco na'. 23Kat le ballinte barco da zaya'k yellen' nzi'i Tiberias kwitze gan' bdao ake' yet xtir, dan' gan' bayoll be'e Xanllo Jesúsen' yel llioxken ke Dios. 24Na' ka gokbe'e akre' nono Jesúsen' zerén leake' gan' lla'a ake' na', na'll balla'a ake' lo barcon' jayake' Capernaum nench bayirj ake' Jesúsen' do na'. 25Na'll ka ballele be'nn zan ka' Jesúsen' ye chla' nisda'on, na'll lle ake' Le'e: —Maestro, ¿batkre bayedo' ganni? 26Na'll lle Jesúsen' leake': —Di'll li, di'll li nia' re', llayirjre nada' le dan' bdaore kon ka bérjere na'n, kere llayirjre nada' ni ke da ka' bre're yel wak ka' dan' llona' na'n. 27Bi llaya'l ko' yichjre ga't da ye'j gaore, leko' yichjre ga't da gonn yel nban zejlikane keré. Nada' Be'nnen' Gorj Radj Be'nnach, gonna' to da ye'j gaore, nench ga't yel nban zejlikane keré. Le len na', ba bro' Xa' Diosen' lo na' gonna' re'. 28Na'll lle ake' Le'e: —¿Bixhan' llaya'l gonto' na', nench gonto' dan' llazra'll Diosen'? 29Na'll lle Jesúsen' leake': —Da nin' llaya'l gonre, na'llen' yewé Diosen', gonlira'llre nada' naka' be'nn bse'l Le'e. 30Na'll lle ake' Jesúsen': —¿Bixha yel wak gonkzo' chet ka', na'll gonlira'llto' rwe'? ¿Bi gono'? 31Le da xozxta'ollo ka', bdao ake' yet da'o dan' nzi'i maná, chak bzo ake' latj dachen', na' nyoj xti'll Diosen' ke ake' llian: “Yet xtir da za'a yebán' be'e leake' bdao ake'.” 32Na'll lle Jesúsen' leake': —Di'll li, di'll li nia' re': Kere da Moisés na'n be'e da xozxta'ollo ka' yet xtiren', Xa' Dios na'kzen' be'en leake'. Na' Le'en llonne' re' yet xtiren' dan' za'a yebá gan' zoe' na'. 33Na' dan' za'a yebá na', betjen yellrio ni, na' lloe'n yel nban ke noteze be'nn gao len. 34Na'll lle ake' Le'e: —Xanto', bennchga neto' yeo lla yet xtiren' ne'o ka'. 35Na'll lle Jesúsen' leake': —Nada'n naka' yet xtir dan' lloe' be'nn yel nban zejlikane. Na' noteze be'nn wzenay kia' bill tone', na' be'nn gonlira'll nada', bill bilre' nis chras. 36Na' ba bnekza' re', la'kze ba bre're nada', na' bi llonlira'llre nada'. 37Yeololte be'nn kwej Xa'n nench gak ake' nada' txhen, ll-llin lla gonlira'll ake' nada', na' noteze be'nne ye'nre' gonlira'lle' nada', bi wkwase' ka'le. 38Nada' betja' yebá za'a yellrio ni, kere nench gona' ka nen kia' nada'n, kon kan' ne Xa' be'nnen' bse'l nada' na'n gona'. 39Le'en lle'nre' bi wa'a latje kweyi' ni to be'nn ba breje', nench gak ake' nada' txhen. Na' kat llin lla te ke yellrio ni, kana' yesbán ake' radj be'nn wat ka', cha' ba got ake'. 40Xa'n lle'nre' yeolol be'nn ka' gonlira'll ake' nada', we'e ake' yel nban zejlikane, na' nada' yesbán ake' radj be'nn wat ka', cha' ba got ake' kat llin lla te ke yellrio ni. 41Be'nn zan be'nn Israel ka', bchach ake' dan' bne Jesúsen' ka': “Nada' naka' yet xtir dan' betj yebá.” 42Na' wasné ake': —¿Kere be'nn nin' Jesús, xhi'nn José lla? Nombia'kzllo xaxhna' be'nnen'. ¿Bi di'llen' lloe' ne'e, ze'e yebá, na' betje' yellrio? 43Na'll lle Jesúsen' leake': —Bi wchachre kia'. 44Notno gak gonlira'll nada', cha' Xa' be'nnen' bse'l nada', bi gakrene' leake' gonlira'll ake' nada', na' kat llin lla te ke yellrio ni, yesbana' leake' cha' ba got ake'. 45Le gan' bzoj be'nn ka' be'e xti'll Diosen' kana' nen: “Yeolole', Diosen' wroe' wsedre' leake'.” Na' yeolole' nneze kan' ne Xa'n, na' wzenay ake' nench gon ake' kan' ne'e na', leska' gonlira'll ake' nada'. 46’Nono be'nn nna re'e Xa'n. Toze nada' ba bre're' le gan' zoe' na'n za'a. 47Di'll li, di'll li nia' re': Be'nn gonlira'll nada', de yel nban zejlikane ke ake'. 48Nada' naka' yet xtir dan' lloe' be'nne yel nban zejlikane ke ake'. 49Da xozxta'ollo ka', la'kze bdao ake' yel wao da nzi'i maná chak bzo ake' latj dachen', na' yeololte' dekz de wasa'te ka bllin lla ke ake'. 50Nada' lloa' di'll ke to yet xtir da za'a yebá, na' be'nn gao len bi gate'. 51Nada'n naka' yet xtir da za'a yebán' dan' nsa'a yel nban zejlikane. Be'nn gao yet xtiren', wbane' ke chnare. Na' yet xtir dan' we'e ake'n nench ga't yel nban ke be'nnach, naken kwerp kia'n. 52Na'll llaschach be'nn Israel ka' llasné ake': —¿Akxha gone' gonne' kwerp ke'en gaollon, neze' ka'? 53Na'll lle Jesúsen' leake': —Di'll li, di'll li nia' re': Nada' Be'nnen' Gorj Radj Be'nnach, cha' bi gaore kwerp kia'n, na' cha' bi ye'jre xchena'n, bibi yel nban zejlikane de keré chet ka'. 54Be'nn ka' gao ake' kwerp kia'n, na' ye'j ake' xchena'n, ke chnare de yel nban ke be'nn ka', la'kze cha' ba wasa't ake', kat te ke yellrio ni, wasbana' leake' radj be'nn wat ka'. 55Le kwerp kia'n naken dogarje yel wao, na' xchena'n naken dogarje da ye'jre. 56Be'nn ka' llasa'o ake' kwerp kia'n, na' llase'je' xchena'n, de yel nban zejlikane ke be'nn ka', na' nak ake' nada' txhen, leska' nada' nak akse' txhen. 57Xa' Diosen' bse'le' nada', na' Le'en nape' yel nban na', na' de yel nban kia' dan' naka' toze ren Le'e. Na' ka'kze gak ke be'nn gao kwerp kia'n, so ake' ke chnare, le gak ake' nada' txhen. 58Kwerp kia'n naken yet xtir da za'a yebá, bi naken ka dan' bdao da xozxta'ollo ka' kana' latj dachen', le be'nn bdao len dekze de got ake'. Na' be'nn gao yet xtir dan' nia' nada' ka', ke chnare so ake'. 59Jesúsen' broe' bsedre' da ki lo yoda'o ke be'nn Israel ka' gan' nzi'i Capernaum. 60Na' zan be'nn ka' zjanao Jesúsen', ka ben akre' da ka' llzejnie're' leake'n, na'll ne ake': —Bni' xhen naken gonllo dan' llzejnie're'n. ¿Noxha gakrize gon kan' ne'e na'? 61Gokbe'e Jesúsen' llasnné ake' ke dan' bzejnie're' leake' da ka', na'll lle'e leake': —¿Bi llazra'llre da ka' golla' re' na'n? 62¿Akxha nnere kat re're nada' yeyepa' yebá gan' bzoa' kana', nada' Be'nnen' Gorj Radj Be'nnach? 63Spíritu ke Diosen' lloe'n yel nban ke be'nnach, na' kwerpen' bi gak gonen ka'. Di'll dan' ba be'rena' re', naken di'll da lloe' Spíritun', na' nsa'n yel nban. 64Bixha nna ni't bale re', bi llejle're kia'. Ka' bne Jesúsen' le kate na', gokbe're' nore be'nn ka' llejle' ke'en, na' noren' wde Le'e rao be'nn ka' llwie Le'e na'. 65Na'll bne Jesúsen': —Ke len na', ba bnia' nono gak gonlira'lle nada', cha' bi gakrén Xa' Diosen' le'e nench gonlira'lle' nada'. 66Bayoll bzejnie' Jesúsen' leake' da ka', zan be'nn ka' llzenay xti'lle'n, brej yichj ake' bill bnao ake' Le'e. 67Na'll bnnabe Jesúsen' be'nn chllinn ka' (12) breje' nao Le'en: —¿Ren re' lle'nere wayejre? 68Na'll lle Simón Pedron' Le'e: —Xanto', nollno za'k wzenayto' ke'e. Tozo' rwe'n lloe'o di'll da lloe' yel nban ke be'nn llzenay len. 69Neto' llonlira'llto' rwe', na' nnézeto' nako' Cristo, na' nako' dogarje Xhi'nn Dios be'nnen' zo ke chnare. 70Na'll lle Jesúsen' leake': —Ba breja' re' chllinnre nnaore nada', na' to re' rao chllinn na', llzenayre ke daxi'on. 71Kan' bne'e ke Judas Iscarioten' xhi'nn be'nnen' re Simón, le ba nnezre', le'en wdie' Le'e rao na'a be'nn ka' llwie Le'en, la'kze nake' be'nn ren rao be'nn chllinn ka'.

will be added

X\