San Juan 5

1Bde na' gok ye to lnni ke be'nn Israel ka', na' byej Jesúsen' Jerusalén na'. 2Kwitze gan' zo reyj ke ze'e dan' nechj yell na', dan' nzi'i Reyj ke Xhi're, ga llia to ga yoll nis da nzi'i Betesda, na' zjazé ga'y lchir nkwe'j kwite gan' yoll nis na'. 3Na' be'nn zan be'nn we'e, zjadé ake' lo lchir ka', no be'nn lchol, no be'nn nxhinnj nia', no be'nn nat nia'na'a ake', zjadé ake' bexh ake' batkren' chas nisen'. 4Le twej twejze kat lletj to angl, na' llte'e nisen', na' be'nn nellen' llado'l cho' lo nisen' llayoll llta anglen' len na', llayakte' biteze yillwe' da llake'. 5Na' de to be'nn ba gok chi'nchonnalloa (38) iz llake' yillwe'. 6Na' bre'e Jesúsen' le'e, na' gokbe're' ba gok scha de'e ka', na'll lle'e le'e: —¿Lle'nro' wayako'? 7Na'll lle'e Jesúsen': —Nono llra' ko' nada' lo nisen' katen' dan na'. Na' chak zya' na', le lldedote be'nn yobre lletje' lo nisen' llaga'nntia' ka'ze. 8Na'll lle Jesúsen' le'e: —Byas na' batob gan' xhoa'on, na' badá. 9Na'll le bayakte be'nnen', na' bazie' gan' bxhoe'n, na' bzorao bade'e. Na' goken to lla nba'nne ka bi de latj gon be'nn Israel ka' llin. 10Na' be'nn wnebia' ke be'nn Israel ka', lle ake' be'nnen' bayaken': —Lla nba'nn nna', bi de lsens yeyoa'o gan' bxhoa'on. 11Na'll lle be'nnen' leake': —Be'nnen' bayón nada' Le'en goll nada': “Batob gan' xhoa'o na' badá.” 12Na'll lle ake' le'e: —¿Noxhan' gollze rwe' ka': “Batob gan' xhoa'o, na' badá”? 13Na' be'nnen' bayaken', bi nnezre' non' bayón le'e, le Jesúsen' to banitze' radj be'nn zan ka'. 14Bdere badil Jesúsen' be'nnen' bayak lo lchir yoda'o braon', na' lle'e le'e: —Ba bayako' nna', llaya'l kwej yichjo' bill gono' da xhinnj, nench ke gak ye to da zi'llore ko'o. 15Na'll baza'doe' jayelle' be'nn Israel ka', Jesús na'n bayón le'e. 16Na'll be'nn Israel ka', bzorao blle'nao ake' Jesúsen', na' llayirjla'll ake' akre gon ake' got ake' Le'e dan' llone' yel wak ka' lla nba'nne, kat bi de lsens gon be'nn Israel ka' llin. 17Na'll lle Jesúsen' leake': —Xa'n zokze' llaraltezre', leska'kze nada'. 18Na'll llayirjla'll ake' akre gon ake' nench got ake' Jesúsen', kere ni ke dan' bi llone' kan' ne ley na', gan' llwa'len ke lla nba'nne na'zen'; dan' bne'e Diosen' nake' Xe'e, dan' zejen toze ka za'ke' ren Diosen'. 19Jesúsen' lle'e leake': —Di'll li, di'll li nia' re': Bibi llak gona' to wrazza', kon da llre'ra' llon Xa' na'n, len na' llona' le naka' Xhi'nne'. 20Le Xa'n nllie're' Xhi'nne', na'llen' llroe're' nada' yeolol dan' llone'n, na' wroe're' nada' da za'klle ka da ki gone' nench yebánere. 21Kan' llon Xa' Diosen' llasbane' be'nne radj be'nn wat ka', ka'kzen' llona' nada' naka' Xhi'nne', lloa' yel nban ke noteze be'nne llbeja' nench ga't yel nban ke ake'. 22Na' Xa'n bi llchoybie' ke to be'nn nape' do'le, zan ba bene' rallna' wchoybia' ke yeolol be'nnach cha' non' nap do'le. 23Xa'n lle'nre' yeolol be'nne gone' nada' xhen, na' lekze ka'n llona' Le'e xhen, na' be'nn bi llone' nada' xhen, Xa' Dios na'kzen' bi llone' xhen le Le'en bse'l nada'. 24’Di'll li, di'll li nia' re', kan' zjazén na': Be'nn llzenay xti'lla'n, na' llonlira'lle' Dios be'nnen' bse'l nada', de yel nban zejlikane ke'e, na' bi sa'kzi' ake' chras. Na' bill nak ake' ka be'nn wat lo yichjra'llda'o ake'n, le ba bakobe' yichjra'llda'o ake'n dan' ba llonlira'll ake' Le'en. 25Di'll li, di'll li nia' re': Wllin lla kat be'nn ka' nat yichjra'llda'o ake'n, yen akre' xti'lla'n naka' Xhi'nn Dios, na' be'nn wzenay kia', wa't yel nban zejlikane ke ake', na' ka'n ba bzorao llak nna'. 26Xa' Diosen' nse'e yel nban zejlikane, na' leska' bene' nench nada' nsa'a yel nban zejlikane, le Xhi'nne' nada'. 27Na' leska' ba benne' nada' yel llnebia' nench nnezra' non' nap do'le, le Le'en bse'le' nada' naka' Be'nn Gorj Radj Be'nnach. 28Na' bi yebánere kan' nia' ni, le wllin lla kat yeolol be'nn wat lla'a lo ba, yen akre' katen' yelwill ake'. 29Na' be'nn ka' ben da wen chak bzo ake' yellrio ni, yebán ake', na' ban ake' ke chnare, na' be'nn ka' ben da xhinnj chak bzo ake' yellrio ni, yebán ake' sa'kzi' ake' ke chnare. 30’Bibi gak gona' to wraza'. Le llzenaya' bi dan' ne Xa'n, nench ka' llona' yel koxchis ke be'nnach. Na' dan' nia' gak ke toto be'nne lekze da llaya'l gaken, le kere nia' kon da lle'nra' nada' gaken, kon ka dan' ne Xa' na'n gak, be'nnen' bse'l nada'. 31Cha' to wraza' lloa' xti'll kwina', bi naken to da chejle're. 32Zan be'nn yobre lloe' di'll li noxhan' naka', na' nnezra' dan' lloe' kia'n naken da li. 33Na' ba bse'lre be'nne rao Juan na', nench jannabre' le'e akren' nak kia'n, na' be'rén Juan na' re' di'll li noxha nada'. 34Zan nada' bi yalljra' ni to di'll da we'e be'nnach kia', kon da kizen' nia' re' nench chejle're kia' nench yesrá Diosen' re' rao da xhinnjen'. 35Juan na' goke' ka to yi' da llseni' da xhen dan' bzejnie're' re' ke Diosen', na' choll da'on bawere dan' bzejnie're' re'n. 36Na' de to da lloe' xti'lla'n da za'klle ka di'll dan' lloe' Juan na' kia': llona' yeolol da ba bro' Xa'n rallna' gona', na' da ka' llona'n lloe'n di'll, le Xa' na'n bse'l nada'. 37Na' Xa', be'nnen' bse'l nada'n leska' lloe' xti'lla', la'kze bi nna yénere kan' ne'en, na' bi nna re're kan' nake' na'. 38Na' bi nna cho' xti'lle'n lo yichjra'llda'ore, le bi llonlira'llre nada' naka' be'nn bse'l Le'e. 39Lewsedya'nn xti'll Diosen', le nnézere nsa'n yel nban zejlikane. Na' len na' lloe'n di'll li kia'n. 40Na' re' bi lle'nere gonlira'llre nada' nench ga't yel nban zejlikane keré. 41’Ka nak nada' bi llyalljra' nne be'nnach kia' naka' be'nn za'ke. 42Na' nada' nombia' re', na' nnezra' bi nllie're Diosen'. 43Xa'n bse'l nada' llona' kon da ne'e, na' bi llejle're kia'. Na' kat za'k be'nn llon ake' ka da llarjla'll akze', lere'n llejle're. 44¿Akxha gak chejle're kia' nada'n? Le llawere yeyoe'rao be'nne re', bi llazra'llre gonre nench toze Dios na' nne'e llonre wen. 45Na' bi gonre xhbab cha' nada'n ll-lliayi'lla' re' rao Xa'n. Da Moisés na'n ll-lliayi'lle' re' rawe'n, le llsedre kwis dan' bzoje'n llákere zore wen rao Dios. 46Chenak re' llejle're xti'll da Moisésen', kia' nadkza'n llejle're chet ka', le xti'lla' nada'n bzoje'. 47Na' cha' bi llejle're dan' bzoje' na', ¿akxha gonre chejle're dan' llepa' re' na'?

will be added

X\