San Juan 4

1Na'll Jesúsen' gokbe're' ba bnneze be'nn fariseo ka', na' ne ake': be'nn zanll nao Jesúsen', na' be'nn zanlle llchoe' nis ka be'nn ka' llchoa Juan na' nis, 2(la'kze kere kwin Jesúsen' bchoe' be'nn nis, be'nn ka' non Le'e txhen na', llchoa' ake' nis). 3Na'll ka bnneze Jesúsen' ka', baze'e Judean' bayeje' Galilea. 4Na' dekze de yedie' Samaria na'le. 5Ka goken balline' to yell da nzi'i Sicar ga nbane Samaria, to yell da lli' kwitze gan' de yellrio dan' be'e da Jacoben' xhi'nne' Josén'. 6Ganna' llia to bej da nake zitj kwis, dan' nzi'i Bej ke da Jacob. Ka do wawillen' ba lljaxa'ke Jesúsen' zayoe' nez, na' jallie' lloa' bejen'. 7Ka bllin to no'r Samarian' lloa' bejen' zjaxie' nis. Na'll lle Jesúsen' le'e: —Benn ra't nis ye'ja'. 8Na' be'nn ka' non Le'e txhen na', zjake' lyell zjaxi'i ake' da gaorén ake' Le'e. 9Na'll lle no'r Samarian' Le'e: —¿Bixchen llnnabzero' nada' nis ye'jo', le be'nn Israel rwe', na' no'r Samaria nada'? (Le be'nn Israel ka', bi llalwill lwellj ake' ren be'nn Samaria ka'.) 10Na'll lle Jesúsen' Le'e: —Nada' nia' ka': “Benn ra't nis ye'ja'”, na' chenak llayakbe'ro' dan' lle'ne Diosen' gonne' rwe', na' wayakbe'ro' noxha nada', na' ba bnnabro' nada', na' benna' rwe' nis dan' llonn yel nban zejlikane chenake. 11Na' no'ren' lle'e Le'e: —Be'nne, bi no'xo' da ga'cho'n le nak bejen' zitj. ¿Gaxha si'o nis dan' llonn yel nban na', ne'o ka'? 12¿Llakro' za'kllo' ka da xozxta'ollo Jacoben', be'nnen' bkwa'nnrén neto' bej ni, gan' we'jrén xhi'nne' ka' nis, na' ren no bayi'x ke'e ka'? 13Jesúsen' lle'e le'e: —Noteze be'nne ye'j nis ke bej ni, dekze bilre' da yobre. 14Na' noteze be'nne ye'je' nis dan' we'e nada', chras bill bilkzere', le dan' we'e nada'n gaken lo ra'llda'we' ka to latje ga llra' nis, nench ga't yel nban zejlikane ke'e. 15Na'll lle no'ren' Le'e: —Be'nne, bennchek nada' nisen' ne'o ka' nench bill yeda' yedxia'n gannite. 16Na'll lle Jesúsen' le'e: —Jalwill xhyi'o, na' darene' ganni. 17Na'll lle'e Jesúsen': —Notno xhyiwa' zo. Na'll lle Jesúsen' le'e: —Rennkzro' kan' bne'on nono xhyi'o zo, 18le ga'y be'nn ba bzoreno', na' be'nnen' zoreno' nna', kere xhyi'on. Da li kan' bne'on. 19Na'll lle no'ren' Le'e: —Be'nne, llakzra' nakje'o to be'nne llayixjwe' bi da ne Dios. 20Da xozxta'o neto' be'nne Samaria, bxenra'll ake' Diosen' rao ya'n zo ganni, na' re' nakre be'nn Israel, nere Jerusalén na'n llaya'l gonxhenlloe'. 21Jesúsen' lle'e le'e: —No're, byejle' kia', wllin lla kat bill yedre rao ya' nite, yedye'raore Xallo Diosen', ni Jerusalén na'. 22Re' nakre be'nn Samaria bi nombia'ya'nnre Dios be'nnen' lloe'raoren'. Zan neto' be'nn Israel, nombia'to' Dios be'nnen' nxenra'llto'n, na' radjto' ni lloj to be'nn yebeje' be'nnach rao da xhinnj. 23Wllin lla, na' nna' ba bllinen, kat be'nn gon Xallo Diosen' xhen dogarje, na' we'rao ake' Le'e kone yel wak ke Spíritu ke'en, na' we'rao ake' Le'e kan' llaya'le, le Xallo Diosen' llayirje' be'nne we'rao Le'e ki. 24Diosen' nake' Spíritu, na'llen' be'nn ka' we'rao Le'en, llaya'l we'rao ake' Le'e kan' llaya'le kone Spíritu ke'e na'kze. 25Na'll lle no'ren' Le'e: —Nnezra' wed be'nn ba brej Diosen' be'nnen' nzi'i Mesías, Le'en Cristo, na' kate yede' na', yedzejnie're' lli'o yeolol da ki. 26Na'll lle Jesúsen' le'e: —Nada' naka' be'nnen' ne'o ka', na' lloe'rena' rwe' di'lle. 27Nna lloe'rente Jesúsen' no'ren' di'll ka', ka ballindo be'nn ka' non Le'e txhen na' lloa' bejen'. Na' babán akre' lloe'rene' to no're di'lle, na' bitbi goll akse' Le'e bi di'llen' lloe'rene' no'ren', na' bixchen lloe'renze' le'e di'lle. 28Na'll bkwa'nn lle' nis ke no'ren' na'ze, na' bayeje' yellen' jayelle' be'nn wrall ke'e ka': 29—Lecho'ke wiare to be'nn ba golle' nada' yeolol da ba bena'. ¿Kere Le'en Criston' lla, be'nnen' ne ake' yeden'? 30Na'll bllachdo ake' yellen' zjake' gan' lli' Jesúsen'. 31Na' chak zayej no'ren', be'nn ka' non Jesúsen' txhen na', lla'tyoe akre' Le'e, lle ake' Le'e: —Maestro, bdao. 32Na'll lle'e leake': —De to yel wao kia' da bi nna gombia're. 33Na'll lle lwellj ake': —¿Kere no ba badwa'rize da bdawe'n lla? 34Na'll lle Jesúsen' leake': —Yel wao kia'n naken gona' kan' llazra'll Diosen', be'nnen' bse'l nada' nench gak yeolol da zera'lle'. 35Re' nere: “Nna dell ye tap be'o yedop dan' gozllon'.” Na' nada' nia', lewiá ke dan' naz ake' rao yellrio, ba byechen ba lle'nen yedopen. 36Be'nn llon ka be'nn llon wrap, ba llone' llin nench ga't yel nban zejlikane ke be'nn llzenay xti'll Diosen'. Na' be'nn ka' llyixjwe' xti'll Diosen', na' rente be'nn ka' llon nench wzenay be'nn xti'lle' na', nni't ake' txhen nbaraz. 37Di'll ni naken da li nen: “Be'nn yobre llaz na', na' be'nn yobre llarape.” 38Ba llse'la' re' lljarapre gan' bi gozre, le re' gonre wzenay be'nne xti'll Diosen' dan' ba bdixjwe' be'nn yobre. 39Na' be'nn Samaria ka', zane' benlira'll Jesúsen' dan' ben akre' bne no'ren': “Ba golle' nada' yeolol da ba bena'.” 40Na'llen' bllin be'nn Samaria ka' gan' lli' Jesúsen', na' go'tyoe akre' Le'e yega'nnrene' leake', na'll baga'nnrene' leake' chop lla. 41Na' be'nn zanlle benlira'll Jesúsen' ka ben akre' di'll da ka' be'rene' leake'n. 42Na'll lle ake' no'ren': —Ba byejle'to' na', kere dan' béneto' xti'llo' na'zen', ba bénkzeto' lloe' kwine' di'lle, na' ba bnnézeto' Le'en Criston' be'nnen' yesrá be'nn ka' lla'a yellrio. 43Ka gok chop lla na', baza'a Jesúsen' Samarian' zjayake' Galilean'. 44Kwinkze Jesúsen' ba be'e di'll ne'e, noteze be'nne llyixjwe' bi da ne Diosen', bi llap be'nn wrall ke'e ka' le'e bara'nne. 45Ka ballín ake' Galilean', be'nn yell ka' bareb ake' Jesúsen', le ba bre'e akre' yeolol da wen na' bene' rao lnni Jerusalén na', le renkze leake'n jake' lnnin'. 46Na' bayej Jesúsen' da yobre yell Caná, dan' lli' gan' nbane Galilean' gan' bene' bayak nisen' xis uva, na' yell Capernaum na', bzo to be'nn non reyen' rallne'e yel llnebia', na' llak xhi'nne'n yillwe'. 47Ka benre' ba bllin Jesúsen' Galilean' zaze'e Judea, na'll byeje' jelle' Jesúsen' cheje' lljayene' xhi'nne'n, le ba lle'nen goten lebe'. 48Na'll lle Jesúsen' le'e: —Chenak bi llre're yel wak kia'n, bi chejle're kia'. 49Na'll lle be'nnen' Le'e: —Be'nne, yo'kero' chaga bi nna gat xhi'nna'n. 50Na'll lle Jesúsen' le'e: —Bayejdo, bi gat xhi'nno'n. Na'll byejle' kan' goll Jesúsen' le'e, na'll baze'e. 51Ye ra'tz yelline' na'n, kat jatil be'nn wen llin ke'e ka' le'e, na'll lle ake' le'e: —Ba bayakte xhi'nno'n. 52Na'll bnnabre' leake' ka do bi hor bzorao bache'be', na'll lle ake' le'e: —Neje lladá to bde wawill, ballachbe' da lan'. 53Na'll llakre' ka hor na'kzen' goll Jesúsen' le'e bi gatbe'. Na'll benlira'lle' Jesúsen', le'e na', ren yeolol be'nn ka' lla'a rille' na'. 54Da ni yel wak wllopen' ben Jesúsen' kan' zaze'e Judean', na' balline' Galilean'.

will be added

X\