1 Bzo to be'nn fariseo be'nn golle Nicodemo. Goke' to be'nne wnebia' ke yell Israelen'. 2 Byeje' rao Jesúsen' tlle'lre, na' lle'e Le'e: —Maestro, nnézeto' bse'l Diosen' rwe' nench wzejnie'ro' neto', le nono gak gon ka yel wak ka' llono'n, cha' bi zorén Diosen' le'e. 3 Na'll lle Jesúsen' le'e: —Di'll li, di'll li nia' rwe', cha' non' bi yeyarje' ye to, bi gak re're' Diosen' gan' llnebie'n. 4 Na'll lle Nicodemon' le'e: —¿Akxha gon to be'nne yeyarje' ye to, cha' ba nake' be'nn gore? ¿Waklle yeyoe' lo le'e xhne'en, na' yeyarje' ye to? 5 Na'll goll Jesúsen' le'e: —Di'll li, di'll li nia' rwe', cha' non' bi yeyarje' ren nis, na' ren Spíritu ke Diosen', bi gak lljazoe' gan' zo Diosen' llnebie'. 6 Be'nn llarje' rao dialla be'nnach, lekze be'nnachkze le'e. Na' be'nn llarje' rao Spíritu ke Diosen', le'en de yel nban dan' lloe' Spíritun' le'e. 7 Bi yebanro' dan' bnia': “Llonen bien yeolol be'nne de yeyarje' ye to.” 8 Kat llechj be', llechjen gateze, na' llenro' llolyoyen, na' bi nnezro' ga za'n, na' ni ke nnézzero' ga zejen. Ka'kzen' naken ke yeolol be'nn ka' llon Spíritu ke Diosen' nench llayarj ake' ye to da yobre. 9 Na'll lle Nicodemon' Le'e: —¿Akxha gak kan' ne'o ni? 10 Na'll lle Jesúsen' le'e: —Rwe' llzejnie'ro' be'nn Israel ka' xti'll Dios, ¿bi llejnie'ro' da ki? 11 Da li neto' llyixjwe'to' da nnézeto', na' lloe'to' di'll ke da ba bre'to', na' bi llejle're. 12 Ba bia'a di'll dan' llak yellrio ni, na' bi llejle're. ¿Akxha gakrize chejle're chenak nia' re' dan' llak yebá na'? 13 ’Notno nna wayep yebán', toze nada' za'a yebán' naka' Be'nn Gorj Radj Be'nnach. 14 Kan' gok latj dachen' kana', kan' ben da Moisésen' to bel de ya cha'on nzi'i bronce, na' bde'eba' to le' yay, ka'n llaya'l gak wda'a ake' nada' to le' yay, nada' Be'nn Gorj Radj Be'nnach. 15 Ka'n gak kia' nench noteze be'nn gonlira'lle nada' bi kwiayie', na' ga't yel nban zejlikane ke'e. 16 ’Ka'n nllie' Diosen' lli'o be'nnach, na'llen' bse'le' Xhi'nne' ti'chen' nench noteze be'nne gonlira'lle Le'e bi kwiayie', na' ga't yel nban zejlikane ke'e. 17 Diosen' bi bse'le' Xhi'nne'n yellrio ni, nench gone' da wsa'kzi' be'nnach, zan bse'le' Le'e nench yesre'e leake' rao da xhinnj ke ake'n. 18 ’Noteze be'nne gonlira'll ake' Xhi'nn Dios be'nn ti'ch na', bi yellayrao ake' ke do'l ke ake'n, na' be'nn ka' bi gonlira'll ake' Le'e, ba nlloyen ke ake' sa'kzi' ake' ke chnare, le bi llonlira'll ake' Xhi'nn Dios be'nn ti'ch na'. 19 Kan' naken, ke be'nn ka' bi llonlira'll Xhi'nn Diosen', ba nlloyen ke ake', sa'kzi' ake' ke chnare, le ba bed Xhi'nn Diosen', nse'e beni' ke yichjra'llda'o be'nnach, bixha leake' na'n, llawé akllere' dan' nak da xcholen' kerke beni'n, le da ka' llon ake' na', naken da xhinnj. 20 Yeololte be'nn ka' llon da xhinnjen', llwie akre' beni' ke'en, na' bi llazra'll ake' wzenay ake' ke'e, nench ke wroe'rawe da xhinnj ka' llon ake'n. 21 Zan be'nn ka' llon kan' llia di'll li ke Diosen', llawé akre' lljabi'y ake' gan' nseni' beni' ke Diosen', len llroe'n zokze Diosen' llakrene' leake', nench llon ake' kan' llia di'll li ke'e na'. 22 Bde na' byej Jesúsen' ren be'nn ka' non Le'e txhen na', yell da'o ka' zjalli' do gan' nbane Judean', na' chak zo ake' na', bchoe' be'nne nis. 23 Na' leska' bchoa Juan na' be'nn ak nis yell gan' nzi'i Enón dan' lli' kwitze Salim, le na' de nis xhen, na' jak be'nn ka' gan' bzoe'n nench bchoe' leake' nis. 24 Ka'n gok ka bi nna ko' ake' Juan na' rill ya. 25 Na' be'nn ka' nao Juan na', go'd di'll lwellj ake' ren be'nn Israel ka', akren' llaya'l gon be'nne nench yeyak ake' xhira'll rao Diosen'. 26 Na'll byej ake' rao Juan na', na' lle ake' le'e: —Maestro, be'nnen' bzo ren rwe' ye chla' yeo Jordán na', be'nnen' lloe'o xti'll na', ba llchoe' be'nne nis, na' yeololze be'nne lljake' gan' zoe'n. 27 Na'll lle Juan na' leake': —Bibi yedo'l be'nnachen' cha' bi we'e Diosen' len. 28 Nnézkzere kan' ba bnia'n, kere Cristo na', nada', be'nnen' bse'l Diosen' yednnebie' lli'o. Zan nada' naka' be'nn bse'l Dios nench blliarawa' badia' xti'lle'n. 29 Kat llak to yel wachayna'a, toze be'nn byio na' zi'i no'ren'. Na' be'nnen' nak txhen be'nn byion' llchayna'n zerene' le'e, llawere' ka nak llzenaye' kan' ne be'nnen' llchayna'n. Kan' llakra' nada', llawera' kwis. 30 Le Le'en llaya'l chejlle' gon be'nne Le'e xhen, na' nada' llaya'l yeyexja'. 31 Leska' bne Juan na': —Ka nak Criston' be'nnen' za'a gan' llia Diosen', Le'en nake' be'nn zaklle ka yeolol be'nne. Na' be'nnach nak be'nn ke yellrio nize, di'll da de yellrio ni lloe'. Na' be'nnen' za'a gan' llia Dios na', za'klle' ka yeolol be'nne. 32 Le'en lloe' di'll ke dan' ba bre're'n, na' di'll ke dan' ba benre' gan' llia Diosen', na' nono llzenay xti'lle'n. 33 Na' be'nnen' llzenay xti'll be'nnen' za'a yebá na', le'en llroe're' lloe' Diosen' di'll li. 34 Be'nnen' bse'l Diosen', lekze'n lloe' xti'll Diosen', le Spíritu ke Dios na' zerenen Le'e, na' kat Diosen' we'e Spíritu ke'en, bi llyise' ra't wejen. 35 Diosen' nllie're' Xhi'nne' Criston', na' ba bene' rallne'e yeolol bi da de ke'e. 36 Na' be'nn ka' llonlira'll Xhi'nn Diosen', de yel nban zejlikane ke ake', zan be'nn ka' bi llzenay ke Diosen', bibi yel nban ke be'nn ka' ga'te, le Dios na' gone' sa'kzi' ake' ke chnare.
