San Juan 2

1Bayónn lla go't to yel wachayna'a yell gan' nzi'i Caná gan' nbane Galilea. Na' xhna' Jesúsen' byeje' gan' gok yel wachayna'n. 2Na' leska' goxh ake' Jesúsen', na' ren be'nn ka' non Le'en txhen na'. 3Na't babillkze xis uvan' lle'j ake' gan' llak lnnin', na'll xhna' Jesúsen' golle' Le'e: —Billbi xis uva ke be'nn ka' de. 4Na'll lle Jesúsen' le'e: —¿Bixchen ne'o ka'? Rencha' bi nna llin lla wroe'rawa'n. 5Na'll lle xhne'en be'nn ka' dá llwia bi da yallj rao lnni na': —Legón kon bin' ne'e na'. 6Na' zjazó xop ye's de yej, ga llga'a ake' nis da llonrén be'nn Israel ka' llin da llayib kwin ake' kon kan' llia le' ley na'. Na' toto ye's ka' lloll aken do chop chonn lle' nis. 7Na'll goll Jesúsen' be'nn ka' dá llwia bi da yallj rao lnni na': —Leyeslla'a nis lo ye's ka'. Na'll bda'a ake'n nis balla'a akten. 8Na'll lle'e leake': —Lega'ch ra'ten', na' lewe'n be'nnen' nak rallna'a lnni na'. Na'll ben ake' kan' bne'e na'. 9Na' be'nnen' nak rallna'a lnnin' kon bnixe'n, na' bi nnezre' ga za'n, kon be'nn ka' dá llwia bi da ka' yallj rao lnni na'ze, nnez akre' nisen' bayak xis uvan', le leake'n go'ch ake' nisen'. Na' be'nnen' bnix len na', goxhe' be'nn byion' llchayna'n, 10na'll lle'e le'e: —Yeololte be'nn ka' llon lnnin', llde ake' xis uva cha'on ka zorao lnni na', na' kat ba we'j ake' da xhen, na'll zorao ake' llde ake' xis uva da bi naktek wen na'. Na't rwe' nza'yo' xis uva cha'on, llde'on nna'll ba llayoll lnnin'. 11Ka'n ben Jesúsen' yell Canán' gan' nbane Galilean', goken yel wak nell dan' bene' nench broe're' nake' be'nn za'k xhen, na' benlira'll be'nn ka' non Le'e txhen na' Le'e. 12Bde na', byeje' gan' nzi'i Capernaum ren xhne'e na', ren bi'che' ka', na' ren be'nn ka' non Le'e txhen na', na' na'ze go'y ake' to chop chonn lla. 13Na' ba zo ga'l lnni Paskw ke be'nn Israel ka', na' byej Jesúsen' Jerusalén na'. 14Ka blline' lia' yoda'o braon', be'nn zan zjalla'a llo't ake' no bell, no xhi're, no plom, ba llonrén ake' llin kat llayoe'xhen ake' Dios, na' zjalli' be'nn llcha'a ak mell. 15Ka bre'e Jesúsen' kan' llaken, na' bene' to sot nench bachache' yeolol be'nn ka' zjalla'a lia' yoda'on, yeolol no bell ka' llo't ake'n, no xhi'r ka' ren be'nn ka' llcha'a mell ka', bese' xhmell ake'n rao yo, na' bllo'nne' gan' nkwa'a ake' xhmell ake'n. 16Na'll golle' be'nn ka' llo't plomen': —Leyechach yeolol ba ki ganni. Bi gonre ya'a rill Xa'n. 17Na'll jadinra'll be'nn ka' non Le'e txhen na', kan' nyoj xti'll Diosen' gan' nen: “Dan' lli' yichja' kwis ke rillo'n za'kzia'.” 18Na' be'nn Israel ka' llasné ake': —¿Bi yel wak wroe'ro' neto', nench chejle'to' ko'o za'ko' bachacho' be'nn ka'? 19Na'll balli'i Jesúsen' xti'll ake'n, lle'e leake': —Leyechinnjchek yoda'o ni, na' chonn llaze wayontia'n. 20Na'll be'nn Israel ka', goll ake' Le'e: —Xopayon (46) iz blle akre', ka ben ake' yoda'on. ¿Na' rwe' wayonchko'n chonn llaze? 21Bixha Jesúsen' kwine'n bsa'kre' yoda'on bne'e ka', na' llake leake'n cha' yoda'o na'kzen' ne'e ka'. 22Na' ka bllin lla babane' radj be'nn wat ka', be'nn ka' non Le'e txhen na', jadinra'll ake' kan' bne'en, na'll byejle' ake' xti'll Diosen' dan' nyoj ke'e na', leska' benlira'll ake' xti'll Jesúsen'. 23Na' chak zo Jesúsen' lnni Paskwn' Jerusalén na', be'nn zan bre'e akre' yel wak ka' bene'n, na'll byejle' ake' ke'e, nakse' be'nn bse'l Dios. 24Bixha Jesúsen' bi gotra'llteke' radj be'nn ka', le nombie' yichjra'llda'o ake'n. 25Bi byalljre' no ye Le'e bi xhbab yo' lo yichjra'llda'o be'nn ka'. Kwinkze' nnezre' bin' yo' lo yichjra'llda'o toto be'nnach.

will be added

X\