San Juan 19

1Na'll goll Pilaton' be'nn ka', bdin ake' Jesúsen'. 2Na' waka'a ya ka', ben ake' to da bro' ake' yichje' de lba ye'che. Bayoll na', bwakw ake' Le'e to ra'll morad, ka da ka' llonrén no be'nn wnebia' ka' llin. 3Na'll lltitj akre' Le'e, na' bro' ake' ke xa'ye', na' llasné ake': —¡Sechga ke be'nn wnebia' ke be'nn Israel ka'! 4Na'll blloj Pilaton' da yobre lle'e leake': —Kweja' be'nnen' da yobre, nench nnézere bibi da xhinnj llallelra', cha' bi none'. 5Na' blloj Jesúsen' yo'te dan' yichje', dan' nak de lba ye'ch na', na' nakte' ra'll moraden'. Na' bne Pilaton': —Ganni ba ze be'nnen' nna'. 6Na' xan bxoz ka', na' ren be'nn ka' llape yoda'o braon', ka bre'e akre' Jesúsen', na'll besia' ake' da zan ras bne ake': —¡Bde'e le' yay cruz! ¡Bde'e le' yay cruz! Na'll lle Pilaton' leake': —Lewche'e chet ka', na' lewde'e re' le' yay cruzen', le bibi da xhinnj llallelra' cha' bi none'. 7Na' be'nn Israel ka', lle ake' le'e: —De to ley keto' da nen, llaya'l gate' dan' ne'e nake' Xhi'nn Dios, le be'nnachze Le'e. 8Na' ba llalleb Pilaton' kan' ba llaken, na' ka benre' xti'll ake'n, blleblle'. 9Na' bayoe' da yobre gan' llie' llnebie'n, zanche'e Jesúsen', na' llnnabre' Le'e: —¿Gaxha be'nne rwe'? Na' bi balli'kze Jesúsen' xti'lle'n. 10Na'll lle Pilaton' Le'e: —¿Bi llalli'o xti'lla'n? ¿Bi nnezro' nada' napa' yel llnebia' da yesana' rwe', na' napa' yel llnebia' wchoybia' ko'o, wda'a ake' rwe' le' yay cruzen'? 11Na' balli'i Jesúsen' xti'lle', golle' le'e: —Bibi yel llnebia' napo' chenak bibi nonn Diosen' rwe'. Zan be'nnen' bde nada' rao na'on, naplle' do'l ka rwe'. 12Na'll bayirjla'll Pilaton' akre gone' wasane' Jesúsen'. Na' be'nn Israel ka', besia' ake' ne ake': —Cha' ba llasano' be'nn ni, bi llono' kan' ne be'nn wnebia' ke Roman', le noteze be'nn cha' llone' kwine' ka to be'nn llnebia', na' llkwase' be'nn wnebia'n nzi'i César ka'le. 13Na'll ka bayoll bene Pilaton' xti'll ake'n, breje' Jesúsen' lia're, na' renkze le'e bllojrene', na' bllie' gan' llone' yel koxchisen', to latje dan' nzi'i Gan' Nak Rao Yej, di'll hebreo nzi'n Gábata. 14Ka do wawill, ka wxere za sorao lnni Paskwn' goll Pilaton' be'nn Israel ka': —Ganni zo Rey kerén'. 15Na'll bzorao ake' llosia' ake' da yobre, llasné ake': —¡Llaya'l gate'! ¡Bde'e le' yay cruz! Na'll lle Pilaton' leake': —¿Rey keré nin', wda'a Le'e le' yay cruz? Na'll bne bxoz wnebia' ka': —Kere rey keto' be'nnen', toze César na'n nak be'nn llnebia' neto'. 16Na'll bde Pilaton' Jesúsen' rao na'a ake', nench wda'a ake' Le'e le' yay cruzen'. Na'll bza'a ake' Jerusalén na', bche'e akte' Jesúsen' lloa' yellre. 17Na' zej Jesúsen' noe' yay cruz ke'en, na' blline' to latje gan' nzi'i Latj ke Llit Wat, di'll hebreo nzi'n Gólgota. 18Na' bda'a ake' Le'e le' yay cruzen', na' leska' bda'a ake' ye chope be'nne le' yay cruzen' chla' weje kwit Jesúsen'. 19Na' Pilaton' bzoje' yichj yay cruz ke'en. Di'llen' bzojen' nen: “Jesús be'nn Nazaret, Rey ke be'nn Israel ka'”. 20Bzoje'n di'll hebreo, na' di'll griego, na' di'll latín. Na' zan be'nn Israel ka' bel ake'n, le gan' bda'a Jesúsen' le' yay cruzen', naken awlloze Jerusalén na'. 21Na' bxoz wnebia' ka' ke Israelen', goll ake' Pilaton': —Bi wzojo'n: “Rey ke be'nn Israel ka'”, wenre bzojen: “Le'en bne'e nake' rey ke be'nn Israel ka'.” 22Na'll bne Pilaton': —Da ba nzoja' ba nyojkzen na'. 23Ka bayoll bda'a be'nn waka'a ya ka' Jesúsen' le' yay cruzen', na'll bxhi'i ake' xhara'ne'n, na' ben ake'n tapre, na' bxhi'i ake' tweje'n. Na' leska' bxhi'i ake' ye to xhe'e dan' nak to chewalize, bibi dia zon. 24Na'll lle lwellj ake': —Bi wche'zllon, wenre chitjenllon, na' norllo yedo'le len. Na' kan' ben ake' na', bzoa di'll kan' nyoj xti'll Diosen' nen: “Bla' ake' xhara'na'n, na' ra'll dan' llaka' na', bditj ake'n.” 25Na' ka'lze gan' zo cruz ke Jesúsen', ze María be'nnen' nak xhne'e na', ren bir xhna' Jesús na', na' María be'nnen' nake' no'r ke Cleofas, na' María Magdalena. 26Ka bre'e Jesúsen' ze xhne'en ka'lze, na' ren ye to be'nnen' nak le'e txhen, be'nnen' nllie' Jesúsen' kwis, na'll lle'e xhne'en: —Be'nn na' gake' ka xhi'nno'. 27Na'll lle'e be'nnen' non Le'e txhen na': —Be'nn ni gake' ka xhna'o. Na' lla na'te be'nnen' non Le'e txhen na', bxhie' le'e, bene' le'e ka xhne'e. 28Bde na', ba nneze Jesúsen' ba gok yeolol da ka' llaya'l gak ke'en, kan' ne xti'll Diosen' dan' nyoj na', bne'e: —Bilra' nis. 29Na' de ra't zo zichj da yoll to lo leo da'o. Na' to be'nnen' bza'lle' zo zichjen' to da nak ka xhi're, bzoe'n to rao xhis ke yay dan' nzi'i hisopo, na' blise'n lla're, na' bzoe'n lloa' Jesúsen'. 30Na' bayoll bxho'p Jesúsen' da zichjen', bne'e: —Ba gok yeolol da llaya'l gak, na'll le baxhexjte yichje'n, na' bayone' spíritu ke'en rallna'a Diosen', na' gote'. 31Na'llen' be'nn wnebia' ke Israel ka', ba llsenia' ake' ga'l lnni Paskw ke ake'n, na' jannab ake' rao Pilaton', we'e latj lljatichj waka'a ya ke'e ka' nia' be'nn ka' zjada'a le' yay cruzen', nench yob gat ake', na' yeletj ake' leake' le' yay cruz ka', le bill lle'n akre' ta'lle be'nn ka' le' yay cruzen' lla nba'nne ke ake'n. 32Na'll jak waka'a ya ka', jatichj ake' llop la'te nia' be'nnen' da'a kwit Jesúsen' chla'. Na' leska' ben akre' be'nnen' bda'a ye chla'. 33Na' ka bllin ake' gan' da'a Jesúsen', na' bre'e akere' ba gote'. Na'll bill bdichj ake' nie' ka'. 34Na' to waka'a yan' go'de' to da látit lwit Jesúsen', na' bra'n llen ren nis. 35Nada' bre'ra' kan' goken, na' nnezra' lloa'a di'll li, nench chejle' re'. 36Na' da ka'n gok ke Jesúsen', nench gok kan' ne xti'll Diosen' dan' nyoj ke'e, nen: “Ni to llit yoe' bi chichj ake'.” 37Na' ye to gan' nen: “Yeswia ake' be'nnen' ba bllia ake' we'e.” 38Bayoll gok yeolol da ka', José be'nnen' nak be'nn yell gan' nzi'i Arimatea, jannabre' Pilaton' we'e latj yeletje' Jesúsen'. Na' be'e Pilaton' latj. Na'll byej Josén' jaletje' Jesúsen'. Josén' ba llejle' ka nak dan' broe' bsede Jesúsen', na' ba llonlira'lle' Le'e llillize, le llebe' be'nn wnebia' ka'. 39Na' leska' byej Nicodemon' be'nnen' ba byej gan' zo Jesúsen' ba gole, na' no'xe to da la' xhix, da nchix nell dan' nzi'i mirra, na' ren to yezj dan' nzi'i áloes, ka do chonn rroben'. 40Na'll bchel ake' kwerp ke Jesúsen' to ra'll xhen, na' ren dan' la' xhix na', le ka' llon be'nn Israel ka', llkwa'ch ake' be'nn wat ke ake' ka'. 41Kwitze gan' bda'a ake' Jesúsen' le' yay cruzen', de to re'j ga naz ake' yay ak. Na' ganna' ben ake' to bloj, nench ben ake'n ka to ba, na' nono nna cho' be'nn wat rao yellrion'. 42Ka llan' got Jesúsen' naken llan' llsinia' ake' ke lla nba'nne, na'llen' llyen akre' wkwa'ch ake' Le'e awlloze.

will be added

X\