San Juan 12

1Na' ka ye xop llare ga'le lnni paskwn', byej Jesúsen' yell Betania na', gan' zo Lázaro be'nnen' basbane' radj be'nn wat ka'. 2Na' bsinia' ake' da bdao Jesúsen' xche', nench ben ake' Le'e xhen. Na' Marta na', bdie' yel wao ke ake'n, na' Lázaron' blle'rene' be'nn ka' txhen, bdaorene' leake' ren Jesús na'. 3Na' Marían' no'xe' ka do tya ceit xhix ke'e da za'k da xhen, na' naken dogarje da blloj yay yej xhix dan' nzi'i nardo. Na' jabi'ye' awllo xhnia' Jesúsen', na'll broe' ceit xhixen' nie'n. Na'll bayoll na', bachechte'n kone yich yichje'n. Na' doxhen lo yo'n, bla' xhix kwis. 4Na' Judas Iscariote xhi'nn to be'nn re Simón, be'nnen' nak txhen be'nn chllinn ka', be'nnen' ba naken wdie' Jesúsen' rao na'a be'nn ka' llwietate Le'en, bne'e: 5—¿Bixchen bi be'te' ceiten', na' ga't mell nench gakrenen be'nn ya'che? Le ceiten' za'ken ka chonn gayoa (300) mell dan' nzi'i denario. 6Ka' bne Judasen', na' kere dan' llaya'chra'lle' be'nn ya'ch ka'n bne'e ka', dan' goke' be'nn wan na'. Le le'en no'xe' mell dan' benrén yeolole' llin, na' brejrane' mellen'. 7Na'll lle Jesúsen' le'e: —Bitbi ye'we', le ba bene' da non gone' kia' kat ga'cha'n. 8Be'nn ya'ch ka', lla'renkzre be'nn ka' batteze, zan nada' bill sorena' re' ye scha. 9Be'nn zan be'nn Israel ka', bnnez akre' zo Jesúsen' yell Betanian', na' byej ake', na' kere dan' re'e akre' toze Jesús na'n, lle'n akzere' re'e akre' Lázaro be'nnen' basbane' radj be'nn wat ka'. 10Na' bxoz wnebia' ke Israel ka', leska' ben ake' di'll gotrén ake' Lázaron', 11le be'nn zan be'nn Israel ka', ba llara'll ake' leake', na' ba llonlira'll ake' Jesúsen' dan' bnnez akre' basbane' Lázaron'. 12Na' ka bateyó, baza'a Jesúsen' Betanian' zayeje' Jerusalén na', na' be'nn zan llay Jerusalén na', dan' ba zo rez ga'le lnni na'. Na' be'nn zan ba bnnez akre' llin Jesúsen' Jerusalén na', 13bllach ake' jalexh ake' Le'e no'x ake' no zi'n, na' llosia' ake' llasné ake': —¡Nbaraz, be'nn nak la'y be'nn ni! ¡Nbaraz be'nnen' za'a, nse'l Xanllo Diosen' le Le'en nnebie'! ¡Nbaraz be'nnen' nak Rey ke Israelen'! 14Na' bllele Jesúsen' to burr da'o ba bllie', na' gok kan' nyoj xti'll Diosen' nen: 15Re' llonre Diosen' xhen gan' nzi'i Sión na', bi llebre na', ba za'a Rey kerén' llie' to burr da'o. 16Na' be'nn ka' non Jesúsen' txhen bi byejnie' akzere'n. Bayoll got Jesúsen', na' broe'rao Jesúsen' nake' be'nn za'k xhen, kana'll jadinra'll ake' di'll ka' nyoj ke Jesúsen', na'll byejnie' akre'n. 17Be'nn ka' bre'e kan' balwill Jesúsen' Lázaron', basbane' le'e nench balloje' lo ba na', be'rén ake' be'nn ka' lla'a yellen' di'll kan' goken. 18Na'llen' jalez be'nn zan kwis Jesúsen', dan' ba ben akre' di'll ke yel wak dan' basbane' Lázaron'. 19Na'll lle lwellj be'nn fariseo ka': —Ba bre're bikze bi llak gonllo. Yeololze be'nne ba llzenay ake' ke'e. 20To chop be'nn griego ak jen ake' Diosen' xhen rao lnni na'. 21Na' be'nn ki ballín ake' gan' zo Felipen', be'nnen' nak be'nn Betsaida gan' nbane Galilea, na' lle ake' le'e: —Si'xhenchgo', lle'neto' we'rento' Jesúsen' di'lle. 22Na'll byej Felipen' jawie' Andrésen', na'll llop akte' jell ake' Jesúsen' ka'. 23Na'll lle Jesúsen' leake': —Nna' ba bllin lla gak yeolol da llaya'l gak, nench na' wroe'rawa' naka' be'nn za'k xhen. 24Di'll li, di'll li nia' re': Cha' to nbaz trigon' bi chazen lo yo, na' yexhinnjen, naksen toze nbaz; zan cha' yexhinnjen, na' ra'n, da zan trigo yeyaken. 25Noteze be'nn kon lli' yichj ake' gak wen ke ake' yellrio nize, be'nn ka'n kwiayi' ake'. Na' noteze be'nne llsanra'll kwine', biteze da llak ke yellrio ni, wa't yel nban zejlikane ke ake'. 26Na' noteze be'nne lle'n akre' gon ake' xchina'n, llaya'le gon ake' nada' txhen. Na' gan' soa' nada', lekze na' so be'nn ka' yeso'n xchina'n. Noteze be'nne gon xchina'n, Xa' na' gone' gak ake' xhen. 27’Ba llak zozeze lo yichjra'llda'wa'n. ¿Akxha yepa' Xa'n? ¿Llákere nnabre' yesre'e nada' dan' ba zo gak kia' na'n? Bi gona' ka', le ke len na' za'a gak kia' yeolol da ki. 28Na'll balwille' Dios, bne'e: —Xa, ben nada' nench gakbe'e be'nne nako' be'nn za'k kwis. Bayoll bne'e ka'n, blloj to be xhnne yebán': —Nada' ba benkza' nench gakbe'e be'nn naka' be'nn za'k, na' gonllkza' ka' ye to, nench yeyakbe'e akre' naka' be'nn za'ke. 29Na' be'nn zan ka' lla'a na', ben akre' kan' bne Diosen', na' bale' llasné yi'wzi'on gochj. Na' ye bale' llasné ake': —To anglen' bne'e le'e. 30Na' Jesúsen' bne'e: —Diosen' bnne'e nada' zillje, kere nench yenra' nada'n, bnne'e zillje nench yene re'n. 31Ba bllin lla wchoybia' Diosen' ke be'nn ka' bi llejle' kia'. Na' ba bllin lla yelloj daxi'on ka'le, dan' llnebia' be'nn ka' lla'a yellrio ni. 32Na' kate wlis ake' nada' rao yellrion', kana'll gona' nench gonlira'll be'nn lla'a doxhente yellrio nada'. 33Bne'e ka' nench bnnez akre' akren' got be'nn ka' Le'en. 34Na' be'nn ka' zjalla'a na', lle ake' le'e: —Neto' ba béneto' kan' ne xti'll Dios dan' nyojen, Criston' soe' ke chnare. Na' rwe', ¿bixchen nezo' nako' Be'nn Gorj Radj Be'nnach, na' ne'o got ake' rwe' to le' yay cruze? ¿Noxha nako' na'n? 35Na'll goll Jesúsen' leake': —Ye chollzen' zorena' re', na' nsa'a beni' ke yichjra'llda'oren'. Lewzenay kia' chaga nna de latje cho' beni' kia'n lo yichjra'llda'oren', nench bi kweyi'renre da xhinnjen' dan' llnebia' re'n. Le be'nn dá ga nak xchole bi llakbe're' gan' zeje'n. 36Legonlira'll nada' chak nna zorena' re', nench cho' beni' kia'n lo yichjra'llda'ore. Bayoll bne Jesúsen' ka', le baza'te' jakwa'chre' leake'. 37Na' la'kze bre'e be'nn Israel ka', ben Jesúsen' zan yel wak, bi byejle' akze', 38nench bzoa di'll kan' bzoj da Isaías be'nnen' be'e xti'll Diosen' kana', bne'e: Xana', nono llejle' di'll dan' chixjwe'to'n, na' nono ba bayakbe'e yel wak ka' ba beno'n. 39Bi gok chejle' ake', le ka'kzen' bzoj da Isaíasen', bne'e: 40Diosen' bene' nench nak ake' ka be'nn lchole, na' bene' nench nak ake' be'nn nak yichjra'llda'o war. Na' bene' ka' nench bi re'e akre', na' bi llayakbe'e lo yichjra'llda'o ake'n bi zejen dan' llroe're' leake'n, na' bi wayat akre', na' bi wayone' leake'. 41Ka' bne Isaíasen', le bre're' batna'te Jesúsen' nake' be'nn za'k kwis, na'llen' be'e di'll ke'en. 42Na' la'kze naken ka', be'nn zan byejle' ke'e, ren no be'nn wnebia' ka', benlira'll ake' Le'e, na' bi be'e ake' di'll cha' llonlira'll ake' Le'e, le lleb ake' bill wreb be'nn fariseo ka' leake' lo yoda'on. 43Lle'n akllre' sorén be'nnach leake' wen, kerke da sorén ake' Diosen' wen. 44Na'll bne Jesúsen' zillje, golle' be'nn ka' zjalla'a na': —Be'nn gonlira'lle nada', kere toze nada'n gonlira'lle', renkze Xa' be'nnen' bse'l nada' na'n llonlira'lle'. 45Na' be'nnen' llre'e nada'n, llre're' be'nnen' bse'l nada'n. 46Nada' za'a yellrio ni, llgoa' beni' lo yichjra'llda'o be'nn ka' llonlira'll nada', nench bill so aklle' rao da xcholen', na' bill gon aklle' da xhinnj. 47Na' noteze be'nne nnezre' kan' ba bnia'n, na' cha' bi llzenaye' kia', kere nada'n wa'a yel llza'kzi' ke do'l ke'en, le kere za'a yellrion' wa'a yel llza'kzi' ke do'l ke be'nnachen', za'a nench yesra'a be'nn gonlira'll nada'n. 48Na' de da wchoybia' ke be'nn ka' bi llonlira'll nada'n, le bi llzenay ake' ke dan' ba bnia' na', xti'lla' dan' ba bnia' na', len na' choybia'n ke be'nn ka' nap ake' do'le, kat llin lla yeyoll yellrio ni. 49Kere to wrazza'n nia' ka', Xa' be'nnen' bse'l nada' na'n, golle' nada' bi da ka' llaya'l nnia'n, na' bi da llaya'l wroe' wsedra'. 50Nnezra' dan' nllie' bia'a, nsa'n yel nban zejlikane ke be'nn wzenay len, na' da li kon kan' ne Xa' na'n, ka'n lloe'rena' re' di'll.

will be added

X\