San Juan 10

1Di'll li, di'll li nia' re': Be'nne bi choe' gan' nake lloa' re'j ke xhi'ren', na' choe' ga yobre, le'en nake' be'nn wan. 2Be'nn wsarje' choe' lixhej lloa' re'jen', le'en llap xhi'ren'. 3Na' be'nnen' llape lloa' re'jen' wsarje', na' cho' gop xhi'ren'. Na' llzenay xhi'r ka' xti'll be'nnen' llwia leakba'n, nombia' akba' chie'n kat llaxheba', lloe' ra akba' kat llbejeba'. 4Na' kate ba bchache' yeololteba' lo re'jen', llbiarawe' rao akba'n, na'll nao xhi'r ke'e ka' le'e, le nombia' akba' chie' na'n. 5Bill nnao akba' no be'nn yobre, to llxhonnj akzba' le bi nombia' akba' chie' na'. 6Jesúsen' be'e di'll ke be'nn gop xhi'ren', nench bzejnie're' be'nn ka' lla'a na', na' bi byejnie' be'nn ka', akre zeje'n dan' golle' leake'n. 7Na' lle Jesúsen' leake' da yobre: —Di'll li, di'll li nia' re': Nada' naka' ka to lloa' re'j gan' llalla'a xhi'r ka'. 8Yeololte nollre be'nn ba bede' ka za yeda' nada', nello nak ake' be'nn wan. Na' be'nn ka' nak ka xhi'r da'o kia', bi bzenay ake' xti'll be'nn ka'. 9Nada'n naka' ka lloa' re'j ke xhi'r ka', na' noteze be'nne gonlira'll nada', yerá ake' rao da xhinnjen', na' gak ake' ka xhi'r da'o ba llo' lo re'j, na'll llalloj akba', na' llel da llao akba'. 10’Le be'nn wan na', ze'e nench kwane' xhi'r da'o ka', na' goteba', na' wlleyie'ba'. Zan nada' za'a lloa'a yel nban zejlikane ke be'nn ka' llonlira'lle nada', nench nni't ake' wen kwis. 11Na' nada' llona' ka to be'nne llap xhi'r ke'en kwasro. Na' be'nn llap xhi'r ke'en kwasro llsanra'll yel nban ke'en, ni ke dan' nllie're' xhi'r ke'e ka'. 12Na' be'nn zi'i raxhje' gape' xhi'r ke be'nnen', to wxhonnjze' wsanra'lleba' ka re're' za'a be'kw yi'on, le bi nak xhi'r ka' ba ke'e. Na'llen' lloe' latj llje'x be'kw yi'on leakba', na' lloslasba' xhi'r da'o ka'. 13Na' be'nn bi nak xan xhi'r ka', llxhonnje' le bi nllie're' xhi'r ka', le bi nak xhi'r ka' ba ke'e. Dan' zi'i raxhje' na'zen' llwieba'. 14’Nada' llona' ka llon to be'nn llape xhi'r ke'en kwasro, na' nombia' be'nn ka' nak ake' ka xhi'r da'o kia', na' leake' nombia' ake' nada'. 15Ka'n nombia' Xa'n nada', na' ka' nombia' Le'e, na' llsanra'll kwina' gata' ni ke ake'. 16Na' zjani't be'nn yobre be'nn bi nak ak be'nn Israel. Be'nn kin' llaya'le lljatop ake' nench wzenay ake' kia', na'll gak ake' ka xhi'r da'o ka' lla'a toze re'j, na' toze be'nn llap leakba'. 17’Llsanra'll kwina' yeso't be'nn ka' nada', na' te na', yebana' da yobre, na' Xa'n nllie're' nada', le llazra'lle' kan' llona' na'. 18Nono llaka'a yel nban kia'n. Nadkza'n llsanra'll kwina' gata'. Wak wsanra'll kwina' got ake' nada', na' leska' wak yeyas yebana' radj be'nn wat ka', kan' nllia Xa'n bia'a gona'. 19Da yobre gok be'nn Israel ka' chopre, ni ke xti'll Jesús na'. 20Zan ake' bne: —Daxi'on yo' yichjra'llda'we'n, bi ne bi zille'. ¿Bixchen llzenayrizre xti'lle'n? 21Na' ye bale' ne ake': —Ni to be'nn yo' daxi'o bi gak nne'e ka'. ¿Bixha wak gon daxi'on yeyak be'nn lchol yere're'? 22Ka bllin lla byo' lnni dan' llon ake' ka nak lljadinra'll ake' llan' benla'y ake' yoda'o brao ke Diosen', na' ba bllin lla llak zay Jerusalén na'. 23Na' dá Jesúsen' lo lchir ke Salomón na'. 24Na' be'nn wnebia' ke Israelen', byechj ake' Jesúsen' ne ake': —¿Bixchen llonllejla'llo' neto', cha' rwe'n nako' Cristo? Bnetega neto' chet ka' rwe'n. 25Na'll lle Jesúsen' leake': —Ba bnekza', na' re' bi llejle're. Da ka' ba bena'n kone yel wak ke Xa' na'n, llroe'n naka' be'nn bse'l Le'e. 26Na' bi llejle're kia', le bi llonre txhen be'nn ka' llonlira'll nada', kan' ba bnekza' re'. 27Be'nn ka' nak ka xhi'r da'o kia' ka', nombia' ake' chia'n. Na' nada' nombia' ake', na' nao ake' nada'. 28Na' lloe' ake' yel nban zejlikane, na' kbat kweyi' ake', na' nono gak yeka'a leake' rao na'. 29Xa' na', ba breje' be'nn ka' llonlira'll nada', nench llwia ake', na' notno gak yeka'a leake' rao na'a Xa'n, le nape' yel llnebia' ga zeraoze. 30Nada' ren Xa' na', nakto' ka toze be'nne. 31Bayoll bne'e ka', le bxhi'te be'nn wnebia' ka' yej, gokra'll ake' wchekw ake' Le'e. 32Na'll lle Jesúsen' leake': —Da zan da wen ba bre're bena' kone yel wak ke Xa'n. ¿Bixha ken lle'nere wchekwre nada' yej? 33Na'll lle be'nn wnebia' ka' Le'e: —Kere ke da wen ka' beno' na'n, wchekwto' rwe' yejen', dan' llkadi'o ke Dios na', le be'nnachze rwe', na' llon kwino' Dios. 34Na'll lle Jesúsen' leake': —Nnézkzere kan' nyoj xti'll Diosen' dan' nzedren' gan' nen: “Nada' ba bnia' re', nakre ka dios ka'.” 35Na' xti'll Dios dan' nyojen kere da te ken, na' len na' nen Diosen' bne'e ke be'nn ka' bzenay xti'lle'n kana', gok ake' ka Le'e. 36Diosen' breje' nada' nench gakrena' be'nnach lla'a yellrio ni, na' ¿bixchen nere llkwasa' Diosen' ka'le, dan' nia' naka' Xhi'nne'n? 37Cha' bi llona' yel wak ke Xa' Diosen', bi llaya'l chejle're kia' chet ka'. 38Zan cha' llakbe're llona' da za'k kone yel wak ke Diosen', llaya'l chejle're, Le'en bse'le' nada', la'kze bi lle'nere chejle're xti'lla'n. Na' cha' chejle're ke da ka' ba llona' na', na'llen' nnézere zerenkze Xa'n nada', na' leska' nada' zerena' Le'e. 39Na'll gokra'll ake' go'x ake' Jesúsen' da yobre, na' bi bdo'le'. 40Jesúsen' bayeje' gan' zoe' ye chla' yeo Jordán na', latje gan' bzo da Juan na', chak bchoe' be'nne nis. 41Na' be'nn zan jak gan' zoe'n nench bzenay ake' xti'lle'n, na' bne ake': —Da Juan na', ni to yel wak bibi bene', zan yeolol dan' bne'e ke be'nn ni, naken da li. 42Na' be'nn zan benlira'll Jesúsen' latj na'.

will be added

X\