Santiago 4

1¿Bixchen llakdilre llchachrén lwelljre? Llonre ka' dan' yo' nyaz da xhinnjen' yichjra'llda'ore, llnebia'n re' nench llonre ka nen keré. 2Zera'llre kwis bi da ga't keré, na' dilre chachrén lwelljre, na' lle'ntere got lwelljre nench na' ga't dan' zera'llre na'. Na' kere bi ga't keré dan' lle'neren', ka naken llonre da xhinnjen', na' bi llnnabre rao Dios nench gonne' ga't dan' yálljere na'. 3Na' kate llnnabre rao Diosen' nench gonne' bi dan' lle'nere ga't keré, kere gonne'n, le to lo ra'llda'oren' lle'nere ga't dan' zera'llre, nench gonre ka nen keré. 4Ba llonre ka to no'r zo xto, no'r bill llejle' ke xhyiwe'. Dan' llzenayre ke dan' ne xhbab keré na', llonre txhen be'nn ka' bi nombia' Dios, na' ll-lliayi'llre Diosen'. Na' cha' lle'nello gonrenllo be'nn wen da xhinnj ka' txhen, ba ll-lliayi'll-llo Diosen', bill nllie'lloe' ka llaya'le. 5Llonjere xhbab bibi za'k xti'll Diosen' gan' nen: “Spíritu ke Diosen' dan' zo lo yichjra'llda'ollon', zera'llen kwis wzoallo xti'll toze Diosen'.” 6Diosen' llakrene' lli'o kwis, nench na' llzenayllo ke toze Le'e. Na'llen' nyoj xti'll Diosen' nen: “Diosen' llwiere' be'nn ka' llayoe'rao kwin, na' llakrenkze' be'nn ka' nak nexjra'lle'.” 7Ke len na' llaya'l serenllo Dios, na' gonllo war bi wzenayllo ke daxi'on. Cha' ka' gonllo, wkwaskze daxi'on ka'le. 8Lesó leyelwill Diosen', na'll soe' gakrene' re'. Llaya'l kwej yichjre da xhinnj ka' llonre. Na' cha' llákere wakse wxenra'll-llo Diosen', na' gontezllo bi da za'ra'll lo ra'llda'ollon', kreren' llonre xhbaben' chet ka', na' llaya'l we're latj yeyón Diosen' yichjra'llda'oren' yalle. 9Legakzede, na' legake, na' lekwell. Yel llawé kerén' lewacha'n yel bell, na' yel zo nbaraz kerén' leyezoya'che. 10Llaya'l wxhexj yichjre rao Xanllo Diosen', na'll Diosen' gone' nench gakre xhen. 11Be'nn bi'che, bi llaya'l nnechachllo ke lwelljllo. Be'nn nnechach ke lwellje' na', ll-lliayi'lle lwellje'n, be'nn na'n nne'e ke ley ke Dios, llzoe' leyen' ka'le. Na' be'nn ka' llon ka', bi llzoe' di'll kan' ne ley na'n. Llone' ley ke Diosen' ka to da bi za'ke. 12Toze Dios na'n bdixje' leyen', na' toze Le'en za'ke wchoyrawe' ke totollo cha' de do'l kello. Na' toz Le'e za'k yesre'e be'nn lo yi' gabil, na' lekze Le'en za'k nench yese'le' be'nn lo yi' gabilen'. Zan lli'o nono nakllo nnello ke be'nn lwelljllo nape' do'le. 13Na' nna' lewiá ke, re' nere: “Nna' ren wxe, chejllo yell zi'te, na' lljasollo to iz, na' ga'ollo bi da wayo'tllo, na' gonllo gan.” 14Na' ni ke nnézzere bin' gak keré wxe. Le ¿akre nak yel nban kellon'? Da li naken ka to bej da llroe'rao chollze, na' le llaranten. 15Llaya'l nnere: “Cha' Xanllo Diosen' gonne' yel nban, na'll gona' da lle'nra' gona'.” 16Zan da xhinnjen' llonre llayoe'rao kwinre, ba llwiare akre gonre. 17Na' be'nnen' nnezre' akren' llaya'l gone' da wen, na' bi llone'n, naken xhia ke'e rao Dios.

will be added

X\