Santiago 2

1Be'nn bi'che, Xanllo Jesucriston' nake' be'nn zerawe za'ke, na' cha' wxenra'll-lloe', toz kan' llaya'l gónello noteze be'nne, kere balze'n gonllo xhen, na' ye bale gónello kaze. 2Cha' ra' chop be'nne gan' lldop ll-llayllo llonllo Jesucriston' xhen, na' toe' nake' be'nn wnia' nake' ra'll cha'o nak nbaraz, na' ngo' xhbene' to ya cha'o dan' nzi'i oro, na' be'nnen' ye to nake' be'nn ya'ch, na' nake' to ra'll da wllin kwis, 3na' cha' gonllo xhen toze be'nn wnia' na'ze yelloe': “Rao siy nile blle' ga kwe'o kwasro”, na' yello be'nn ya'chen': “Na'le jasé”, o cha' yelloe': “Blle'teze rao yo na'ze”, 4bi naken wen rao Diosen', le cha' ka' llonllo, ba llala'llo be'nne, na' ba llroe'llo noren' za'ke, na' noren' bibi za'kteke. Ke len na' bi llonllo wen, le bi nak yichjra'llda'ollo wen na'. 5Be'nn bi'che, ba brej Diosen' zan be'nn ya'ch, nak ake' rallne'e, na' llonlira'll ake' Le'e. Na' nni't ake' nbaraz kat yellín ake' gan' llie' na' llnebie', kan' gak ke noteze lli'o nllie' Le'e. 6Zan re' llonre be'nn ya'ch ka' ka be'nn bibi za'ke. Na' llonre be'nn wnia' ka' xhen kwis ka to be'nn za'ke. Rencha' leake'n llsa'kzi' ake' re', llxhoblle'o ake' re' do rao koxchis. 7Lekze leake'n llalli'i llasné ake' da nak krere ke Jesucristo be'nnen' nxenra'll-llo, be'nnen' nak be'nn za'k. 8Ley dan' nak lliarao rao yeolol xti'll Diosen' nen: “Lellie' lwellj be'nnachre ka nllie' kwinre.” Cha' da li llonre kan' nen na', llonre wen. 9Na' ley ke Diosen' llchoyraon keré, napre do'le cha' balze be'nne llonre xhen, na' ye bale' llónere ka be'nn bibi za'ke. 10Le cha' to be'nne nawe' llone' yeolol kan' ne ley na', na' cha' to da da'o ba bxinnje', ke doxhenkze ley na'n ba bxinnje' cha' ka'. 11Dios na'kzen' bne'e: “Bi tarenre no'r bi nak no'r keré, na' be'nn byio bi nak be'nn keré”, leska' bne'e: “Bi gotre be'nne”. Na' la'kze cha' bi darenllo no'r yobre, o be'nn byio bi nak be'nn kello, cha' ba nakllo be'nn wen xhia, naksen xhia kello rao ley na'. 12Xti'll Diosen' llakrenen lli'o nench bi wzenayllo ke da xhinnjen'. Na' llaya'l we'llo Di'll Wen, na' sollo gonllo billre kan' nen na', le Diosen' gonne' da sa'kzi'llo cha' bi llonllo kan' nen na'. 13Diosen' we'e da wsa'kzi' be'nn ka', bi llaya'chra'll lwellj be'nnache. Zan be'nn ka' llaya'chra'll lwellj be'nnache, ka'kze yeya'chra'll Diosen' leake'. 14Be'nn bi'che, cha' to be'nne nne'e nxenra'lle' Jesucriston' de di'llze, na' bi llone' da wen, ¿wak dan' nxenra'lle' na'ze wasrán le'e rao da xhinnjen'? 15Gonkello xhbab chet ka' zjani't bal be'nn lwelljllo nxenra'll ake' Jesucriston', na' bi de da ye'j gao ake', bi de no xhara'n ake'. 16Na' cha' yezlloe': “Lelljayakze wen wen, Dios gakrene' re' llélere da ye'j gaore”, na' bi we'e aklloe' bi da ka' llyallj akre', ¿bixha zejen na' cha' to ka'ze ye aklloe'? 17Len na' cha' kon to nnezllo nxenra'll-llo Jesucriston', na' ni ke llonzllo da wen, bikzbi zejen dan' nnello nxenra'll-lloe'. 18Zjani't be'nne llasné ake': “Rwe' nxenra'llo' Jesucriston', na' nada' llona' da wen.” Broe'chk nada' dan' nxenra'llo'n, na' bi gono' da wen, na' nada' wroe'ra' rwe' dan' nxenra'lla'n kone da wen ka' llona'n. 19Rwe' llejle'o toze Diosen' zo, llonkzo' wen. Leska' llejle' daxi'o ka', toze Diosen' nake' be'nn za'ke, na' xhiz aken lleb aken. 20¿Bi nnezro' bibi za'k dan' nello nxenra'll-llo Jesucriston' cha' bi llonllo wen? Kere wakrenen lli'o cha' nnello ka' de di'llze nxenra'll-lloe'. 21Da xozxta'ollo Abraham na', broe're bxenra'lle' Dios dan' bzenaye' ke'e, bzanre' xhi'nne' Isaaken' gotebe' nench gone' xhen Diosen'. Na' dan' bzoe' xti'll Dios na', na'llen' bne Diosen' ke'e, nake' be'nn wen rawe'. 22Na' nnézello kan' ben da Abraham na', kere to bxenra'llze' Diosen' ka'zen', bene' yeolol da golle' le'e. Na'llen' broe'n bxenra'lle' Dios. 23Ke len na' gok dan' nyoj xti'll Diosen' ke le'e, nen: “Abraham na' bxenra'lle' Dios, na'llen' bne Diosen' ke'e, nake' be'nn wen rao Le'e.” Na' leska' nyoj ke Abraham na', goke' migo ke Dios. 24Na' llre're na', Diosen' ne'e nakllo be'nn wen rawe', ni ke dan' llonllo na', kere dan' nello nxenra'll-lloe' na'zen'. 25Lekze ka' gok ke da Rahab goke' to no'r re'e, na' bzenaye' ke Dios dan' brebe' be'nn chop ka' jawiá ralle' na'. Na' bawe' leake' jayake' ye to nez yobre, nench bi je'x be'nn waka'a ya ke rey na' leake'. Na' dan' gokrene' be'nn ka', broe'n llonlira'lle' Dios. Na' bwia Diosen' nake' be'nn wen rawe' na'. 26Le kin' naken: Cha' to be'nne billbi bich yoe', ba nakse' be'nn wat. Ka'kzen' naken ke lli'o, cha' nello llonlira'll-llo Diosen', na' bi llonllo da wen.

will be added

X\