Santiago 1

1Nada' Santiago naka' be'nn wen llin ke Dios, na' ke Xanllo Jesucriston'. Llwapa' re' lliox, re' nakre chllinn (12) kwe' xhi'nn dialla da Israel, re' nxenra'llre Jesucriston' na' naslasre yellrio ni. 2Be'nn bi'che, llaya'l yewello kwis kat llak bi da llak kello. 3Na' kate llak bi da llak kellon', llroe'n cha' zello da war nxenra'll-llo Diosen'. Na' cha' ka' llonllo na', nnézello wakrenen lli'o nench gapllo yel llxhenra'll ke biteze da llak kello. 4Ke len na' llaya'l gapre yel llxhenra'll biteze dan' llak ke re', na' sere war wxenra'llre Diosen' nench gakre kan' lle'nre' na'. 5Cha' noteze re' bi nnézere akren' lle'ne Diosen' gonllo, lewnnab wzejnie're' re', na' wzejnie'kzere' re', le llawere' llakrene' lli'o, na' bi dile' lli'o kat llnnabllo gakrene' lli'on. 6Na' kate nnabllon na', llaya'l gonlira'll-llo gonnkze'n, na' bi gakgánello. Le be'nn llakganre cha' we'en le'e, ba llone' ka to nisda'o llej lljata'n, to ni to na', kat llde to be' rawe na'. 7Be'nn llakganre cha' we'e Diosen' dan' nnabe' na', bi kwexhe' cha' we'e Diosen' dan' llnnabe'n, le bi llejle' ke Dios. 8Be'nn llon ka' bi nnezre' bi xhbaben' llone', bi llakbe'e yichjra'llda'we'n bin' lle'nre'. 9Be'nn bi'chllo nxenra'll Dios, cha' nake' be'nn ya'ch, llaya'l soe' nbaraz, le nake' be'nn za'k rao Diosen'. 10Na' be'nnen' nak be'nn wnia' llaya'l soe' nbaraz kat llxhexj yichje' rao Diosen', le yel wnia'n naken da te ke, kan' llak ke yej da'o zjalla'a yi'xe. 11Kat nna' willen' znia kwis, le llkwadte yi'x ka', na' llyinnj xhla'y yejen', na' bill nla'n nbaraz. Ka'n llak yej da'o ka', na' lekze ka'n gak ke be'nn wnia' ka', yenit yerán ake' rao xchin ake'. 12Cha' llaora'll-llo bi da llak kello, na' zediallo wxenra'll-llo Dios, na'llen' zollo nbaraz. Na' kat te dan' za'kzi'llon', kana'n banrenllo Diosen' ke chnare kan' bne'e gak ke yeolol lli'o nllie' Le'e. 13Na' kat lli'o nen gonllo da xhinnjen', bi nnello Dios na'n llko'yele lli'o gonllo da xhinnjen', le Diosen' bi llko'yelre' be'nne gone' da xhinnj, leska' Le'e bibi de wko'yelen Le'e gone' da xhinnj. 14Yel llzera'll kello dan' yo' lo yichjra'llda'ollon', llonen nench llzera'll-llo llonllo da xhinnj. 15Na' cha' lli'o ba llonllo ka dan' zera'll lo yichjra'llda'ollon', na' zollo llonllo da xhinnjen', na'llen' wllin lla kwej yichj Diosen' lli'o, bill yellinllo gan' llie' na'. 16Be'nn bi'che, bi siye'e kwinre. 17Dios be'nnen' zo yebá, Le'en llse'le' da wen na' llak kello, na' bi da de kello. Xallo Dios be'nnen' ben will, be'o, na' berj ka' nench llseni'n kello, llone' nench gak wen kello, na' bi llache'e ka gone' kello, zotez zoe' llone' wen. 18Byazra'll Diosen' bakobe' yichjra'llda'ollon' kan' byejle'llo ke di'll li ke'en. Na' bakobe' yichjra'llda'ollon' nench lliaraorenllo be'nn nell ka' byejle' ke'e. 19Ke len na' be'nn bi'che, llaya'l zga'tek wzenayllo, na' llaya'l gonllo xhbab kat za nnello, na' bi yóbello gaklla'llo. 20Le kat llaklla'llon', bi llak llonllo wen kan' lle'ne Dios na' gonllo. 21Ke len na' llaya'l kwej yichjllo yeolol da xhinnj ba benllo, na' yeolol da llwie Diosen', da blli'o bxhe lo yichjra'llda'ollo ka bi nna wxenra'll-lloe'. Len na' llaya'l wxhexj yichjllo wzenayllo di'll li ke Diosen', dan' ba yo'kze lo yichjra'llda'ollo na', len wasrá lli'o. 22Na' llaya'l gonllo dan' ne di'll li ke Diosen' gonllo, kere kon yénzello kan' nen na'. Le cha' kon llénello kan' nen na', na' bi gonllon, kwinzllon' ba llaziye'e kwinllo cha' ka' llonllo. 23Be'nn llene di'll li ke Diosen', na' bi llone' kan' nen na', ba llone' ka to be'nn llwia lloa'rawe' lo yejwan. 24Le kon llwie' kan' nak lloa'rawe'n, na' llayoll llwie'n na', le llayanra'llte' kan' nake' na'. 25Zan be'nnen' zokze llzenaye xti'll Diosen' do yichj do ra'lle', na' llone' kan' nen na', bi llayanra'lle'n, be'nn na'n zoe' nbaraz, le xti'll Dios na'n llakrenen le'e biteze da llone'. 26Cha' no llake llonkze' kon ka ne Diosen', na' bi llwie' ka kwell nne'e, kwinze' ziye'e kwine'. Le cha' bi nak xti'lle'n wen rao Dios, bi za'k dan' ne'e nxenra'lle' Diosen'. 27Cha' lle'nello gonllo kan' llawé Xallo Diosen', llaya'l gakrenllo no xkwi'd wazebe, na' no no'r wazeb ak, cha' bi yallj akre', na' kwej yichjllo bill gonllo da xhinnj da llon be'nn bi nombia' Dios.

will be added

X\