Hebreos 8

1Da ni llonllen rao yeolol da ka' ba bnia' na': zo bxoz brao kello be'nn nakya'nne kan' lle'ne Dios na', na' ba llie' yebán' llnebia'rene' Diosen' txhen, be'nnen' nake' le zerawe be'nn za'ke. 2Llone' llin gan' llia Diosen', to latj la'ye ga noncha'o Diosen', na' kere lo yo' da ben be'nnach ga we'rao ake' Le'e. 3Le yeolol bxoz brao ke be'nn Israel ka', zo ake' lloe' ake' Diosen' bi da lloe' ake', na' llot ake' bayi'x llrarj ake' xchenba' rao Diosen'. Na' dan' nak Jesúsen' bxoz brao kellon', benen bien be'e kwine', bet ake' Le'e brarj xchene'n, ni ke da xhinnj kello na'. 4Chenak Jesúsen' nna nake' be'nnach ke yellrio ni, bi gak gake' bxoz, le zjazó bxoz ke be'nn Israel ka', lljasán ake' bi da lljasán ake' rao Diosen', kon kan' ne ley dan' bzoj da Moisésen'. 5Na' ka nak dan' llon bxoz ka' lla'a yellrio ni, llon ake'n gan' nak ka lwa'a ke dan' zo yebá gan' llia Dios na'. Na' nnézello naken ka lwa'a ke yebán', le kan' za gon da Moisésen' yoda'o dan' lladobte gan' ben bxoz ka' llin ke Diosen' kana', na' goll Diosen' le'e: “Yeolol dan' ba bnia' gonre na', legonen kon kan' ba broe'ra' rwe' kan' bzollo rao ya' na'.” 6Na' da llon Jesúsen', da xhen za'kllen ka dan' llon bxoz ke be'nn Israel ka'. Na' kan' bcheb Diosen' gakrene' lli'o dan' ba be'e kwin Jesúsen', ni ke xto'l-llo na', lekze da xhen za'kllen ka dan' golle' da xozxta'ollo ka' kana'. 7Le chenak ley nell na', bxha'ken nench da xozxta'ollo ka' gon ake' da wen, na' bi byalljen chixjwe' Diosen' to da kobe. 8Diosen' bre're' bi gok nnao ake' xti'lle'n, na' bne'e: Wllin lla kate nnia' to da kob da gona' gakrena' re', nakre xhi'nn dialla ke be'nn ka' blla'a Israel, na' ren be'nn ka' nak xhi'nn dialla ke be'nn ka' blla'a Judá. Nada' naka' Xanre Diosen' nia' ka'. 9Nlla'ren golla' da xozxta'ore ka', gona' gakrén ake' kana', bllie' akre', na' bena' nench ballach ake' rao na'a be'nn Egipto ka'. Leake' bi ben ake' kan' goll ake' na', nench gak wen ke ake'. Na' ke len na' bsana' bill gokrén ake', nada'n naka' Xanre Diosen' nia' ka'. 10Na' kin' gona' gakrena' xhi'nn dialla kere ka', nakre be'nn Israel katen' llin lla: Nada' Xanre Dios gona' nench cho' yichj ake' dan' nllia' bia'a gon ake' na'. Na' gona' gaken ka to da nyoj lo yichjra'llda'o ake', na' toz nada' wxenra'll ake', na' leake' gak ake' yell kia'. 11Na' ni ke yalljzen wzejnie' lwellj ake' gombia' ake' nada', na' ni ke yalljzen wzejnie' akre' no bi'ch lwellj ake', le kana' yeolole' gombia' nada', no xkwi'd no be'nn gore. 12Kana'n yezi'xhena' da xhinnj ke ake'n, na' bill lljadinra'lla' da xhinnj ka' ba ben ake' na'. 13Diosen' be'e di'll ke da koben' dan' bne'e gone' gakrene' lli'o, ke len na' ba nnézello ba blli'ye' ka'le dan' golle' xozxta'ollo ka' kana'. Na' da goren' dan' ba bkwase' ka'le ba rez yeranen.

will be added

X\