Hebreos 6

1Ke len na' ba llaya'l garllo, kere le da leze wiallo ka da ka' bsedllo kan' bxenra'll-llo Xanllo Jesucriston', na' bill wabi'llo wiallo akre zejen dan' llayate be'nn, o cha' akre gak ke be'nn llon da xhinnj, na' akre llaya'l wxenra'll-llo Diosen', 2na' akre zejen dan' llchoa' be'nn ka' nis, na' dan' llxoa ta'kllo yichj be'nne llnnabllo gakrén Diosen' le'e. Bill yalljen wsedllo kan' gak kat yesbán Diosen' be'nn wat ka', na' katen' choybie' sa'kzi' be'nn ka' ben da xhinnje. 3Na'llen' chejll-llo chi'ollo cha' Diosen' gonne' latj. 4Ni't be'nn ba byo' beni' ke Criston' yichjra'llda'o ake', na' ba llakbe'e akre' kan' nak yel nban dan' llonn Criston', na' zo Spíritu ke Diosen' lo yichjra'llda'o ake'. 5Ba nnez akre' xti'll Diosen' naken da wen, na' ba nombia' ake' yel wak ke Diosen' dan' wroe'llre' be'nnache. 6Cha' llin to lla wsanra'll ake' chras, na' bill gonlira'll ake' Criston', na' kwej yichj ake' xti'lle'n to chi'ze, kere waklle wayat akre' ke dan' ba brej yichj ake' Le'en, le lo ra'llda'o ake' na'n, ba llon ake' txhen be'nn ka' bda'a Xhi'nn Diosen' le' yay cruzen', na' llon ake' nench be'nn yobre wie' Le'e. 7Llaya'l gak yichjra'llda'ollon' ka to yellrio cha'o ga llaz be'nne. Llayoll llak yejen' doxhen, na'll llak bi da llaz ake'. Na' llak da yallje be'nn ka' llaz na'. Na'll ba benla'y Diosen' yellrion' nak ka'. 8Zan be'nn ka' bi lle'ne wzenay xti'll Diosen', nak ake' ka to yellrio ga llra' yay ye'che, na' billre yi'x da bi llon llin. Yellrion' nak ka' bibi za'ken, na' ba lle'ne xane'n kweje'n yichje', na' yi'x dan' llachj rawe na', wllin lla wzeye'n. 9Re' be'nn bi'che, nllie'ra' re', la'kze ba bia'a di'llen' ka', llakra' bije gonre kan' llon be'nn ka' llsanra'll xti'll Diosen', na' gonjere wen, le ba basrá Diosen' re' rao da xhinnjen'. 10Diosen' zeje' lixheje, bi ganra'lle' kan' ba benre xchine'n, na' ka yel nllie'n zo lo yichjra'llda'ore, na' kan' nna llonre nna', llakrenre yezikre be'nne nxenra'll Le'e. 11Na' zera'llto' totore nnaore gonre bi da ka' llaya'l gonre do yichj do ra'llre, chaga bi nna llin lla gatre, nench nnézere yellinre gan' llia Dios na'. 12Lle'neto' bi gakre be'nn xhawatraz ka dan' ne Dios na'. Na' lle'neto' gonre kan' ben be'nn ka' blla'a kana', bxenra'll ake' Dios, byejle' ake' gon Diosen' kan' golle' leake' na', na' bdap ake' yel llxhenra'll bllinte lla bene'n. 13Kan' goll Diosen' da Abraham na', be'nn zan gak xhi'nn dialla ke'e, bzoa kwine' gak kan' bne'e na', le nollno zo be'nn napll yel llnebia' ka Le'e. 14Na' bne'e: “Da li gonkza' nench gak wen ko'o, na' cha'a be'nn zan xhi'nn dialla'o.” 15Na' Abraham na' bdape' yel llxhenra'll chak breze', na'll bllin lla bzorao llak kan' bne Diosen'. 16Be'nnach ka' yo'rao ake' llzo ake' Diosen' kat bi da ne ake', le llnebia'll Diosen' ka leake'. Kone ka' billbi de da gakyollrén ake' leake'. 17Na' bzoa Diosen' kwine' nench nneze be'nn ka' nak xhi'nn dialla ke da Abraham na', kere da te ke dan' bne'e gone'n. 18Diosen' bene' chop da ki: bne'e kan' gone', na' lekze' bzoa kwine' nench nnézello Le'en gak gone' kan' bne'e na', na' kere da te gon bi gak kan' bne'en. Na' lli'o ba llejle'llo xti'lle'n, ba bazi'xhene' kello, na' yewello nnézello yellinllo gan' llie'n, na' Diosen' bi llak we'e di'll wenra'lle. 19Na' nnézello Le'en gone' kan' ba golle' lli'o. Ke len na' zello choch, ka lli' to barco kat nllejen to ya zi'i, na' lloa' xti'lle'n nen de to latj kello yebá gan' llie' llnebie'n. 20Jesúsen' ba blliarawe' byoe' gan' zo Diosen', gan' nono be'nnach gok cho', na' bene' nench lli'o gak cho'llo. Le nake' bxoz brao ke chnare, nake' kan' gok bxoz Melquisedec.

will be added

X\