Hebreos 13

1Sochga yel nllie' lo yichjra'llda'ore. 2Na' bi ganra'llre dan' llaya'l wrebre be'nn za'k zi't rillren'. Bal xozxta'ollo ka' breb ake' be'nn zi'te rill ake'n, na' breb ake' angl ke Dios, ni ke gokbe'e akzere'. 3Llaya'l lljadinra'llre ke be'nn lwelljllo ka' lla'a rill ya nench gakrén akre'. Llaya'l gonre xhbab, gákere renkze re'n yo're rill yan'. Na' bi ganra'llre be'nn lwelljllo ka' bi da llsa'kzi' be'nne leake'. Na' llaya'l gonre xhbab, gákere renkze re'n llak ke re', kan' llak ke be'nn ka'. 4Na' re' nchayna're yeololre lesó do ra'llre rao no'r keré, na' rao be'nn keré, bi tarenre be'nn yobre, le Dios na' wsa'kzie' be'nn lljatile be'nn yobre. 5Bi sera'll-llo, llaya'l sollo yewello bi da da'o de kello, le Diosen' ba bne'e: “Bi ganra'lla' re', na' bi kwej yichja' re'.” 6Ke len na' bibi de da llebllo, na' wak nnello: Xanllo Diosen' zoe' llakrene' nada'. Bi lleba' cha' bi da gone be'nnach nada'. 7Lelljadinra'll be'nn ka' blla'a be'rén re' xti'll Diosen'. Lewayón xhbab kan' ben ake'n, lenni't lewxenra'll Dios kan' ben leake' na'. 8Na' Jesucriston' lekze kan' nej nnase, ka'kze nake' nna' lla, na' ka'kze gake' ke chnare. 9Bi we're latj siye'e be'nn re', bi di'll yobre da llzejnie' akre' re', le da xhen nlla'a llroe' llsede bale'. Zan nbaraz naken dan' llroe' Diosen' lo ra'llda'ollon', ni ke dan' nllie're' lli'o, len na' llakrenen lli'o, ker da ka' llasné be'nne ye'j gaollo. Ka nak da ka' ne ake' llaya'l ye'j gaollo nench yewé Diosen' lli'o, bi nna gakrenen be'nn ka' ne ka'. 10Bxoz ka' be'e ake' da llaya'l we'e ake' kan' batna', na' bdao akte' bayi'x ka' bet ake'n. Na' dan' got Criston' ni ke lli'o, ba zi'llo yel nak la'y ke Diosen' ke dan' bene' na'. Na' bxoz ka' bi gak si'i ake'n. 11Na' be'nn ka' nak bxoz brao ke be'nn Israel ka', twej rao to iz llot ake' bayi'x, nench lljwa'a ake' xchenba'n lo yoda'on gan' nzi'i Latj Ga Llroe'rao Dios, nench llnnab ake' yezi'xhene' do'l ke ake'. Na' llzey ake' bayi'x ka' lloa' yellte. 12Na' ka'n gok ke Jesúsen' dan' bet ake' Le'e lloa' yell Jerusalén na', bzane kwine' nench na' bake'e do'l kellon' ren xchene' dan' brarje' na'. 13Na'llen' llaya'l wxenra'll-llo Jesúsen', na' kwej yichjllo yeolol bi da benllo batna', la'kze cha' wie no be'nn lli'o kan' llonllon'. 14Gateze zollo da te ke yellrio ni, zan llonkzllo rez yellinllo gan' llie' na', yell dan' bi te ke na'. 15Dan' ba baka'a Jesucriston' do'l kellon', llaya'l we'llo yel llioxken ke Dios chak nna nbanllo, na' we'xhenlloe' kate we'llo xti'lle'n. 16Na' bi gatra'll-llo gonllo da wen, na' we'llo arke sa'kello we'llo gakrenllo be'nn bi de ke, le ka'n llazra'll Diosen', na' llonxhenlloe' kat llonllo ka'. 17Lewzenay ke be'nn ka' lle re' kan' lle'ne Diosen' gonre, na' legón kan' ne ake' gonre, le leake'n llwia llyi ake' re' nench gakrén ake' yichjra'llda'oren', na' leake' wadé ake' di'll rao Diosen', cha' akren' ben ake'. Lewzenay ke ake' nench yewé akre', na' dan' llon ake'n bi gaken da zede, le cha' bi wzenayre ke ake', bibi da wen gak keré. 18Lennab nench gakrén Diosen' neto'. Nnézeto' llonto' kan' llazra'lle' na', na' lle'neto' gontezto' da wen. 19Na' lla'tyoera' re' yelwillre Dios, nnabre gonne' latj le yedtia' gan' zore na'. 20Na' nna' zo Diosen' nzoe' lli'o nbaraz. Le'en balis basbane' Xanllo Jesucriston' radj be'nn wat ka', le dan' brarj xchene'n le' yay cruzen', bzorao llak da kobe da bne Diosen' gone' gakrene' be'nn wxenra'll Le'e. Na' kere da te ke dan' bne'e gone'n. Na' dan' nllie' Xanllo Jesucriston' lli'o, nake' ka to be'nn llap xhi're, be'nn llon da wen kwis ren xhi'r da'o ke'e ka'. 21Na' llnnaba' gakrén Diosen' re' biteze da yálljere nench sore gonre yeolol kan' lle'nre' na', na' gone' yichjra'llda'ollon' kan' lle'nre', dan' nombia'llo Jesucristo na'. Lewxenra'll Jesucriston' to chi'ze. Ka'n gakchga. 22Be'nn bi'che, llnnabchga' bi gákere zed dan' bzoja' llnneyoera' re' ni, le ra'tzen' ba bzoja' re'. 23Na' llyixjwe'ra' re', be'nn bi'chllo Timoteon' ba balloje' rill yan', na' zoa' bexhe' ganni. Na' cha' ba byob bare'e ni, na' wchie' katen' yedwia' re' na'. 24Ka nak nada', llwapa' re' lliox ren be'nn brao ka' be'nn ka' llzejnie' re', na' llwia llyi ake' re', na' leska' nollre be'nn nxenra'll Dios yeolol akte' llwapa' lliox. Be'nn lwelljllo ka' za'k gan' nzi'i Italia, leska' llwap ake' re' lliox. 25Dios na' gakrenchgue' re'. Ka'n gakchga.

will be added

X\