Gálatas 6

1Be'nn bi'che, cha' to be'nn lwelljllon' ba bre'lloe' bene' da xhinnj, lli'o llzenayllo ke Spíritu ke Diosen', llaya'l gakrenlloe' yeyatre' nench yezoe' wen rao Dios. Na' llaya'l wia kwinllo, le nxholl lekze ka' lli'o bixllo gonllo da xhinnjen'. 2Totollo llaya'l gakrén be'nn lwelljllo biteze da llak ke ake', na' kone ka' llonllo kan' nllia Criston' bia'a gonllo. 3Na' cha' gonllo xhbab nakllo be'nn wen la'kze bi nakllo ka', llziye'ze kwinllon' chet ka'. 4Ke len na' totollo llaya'l wayonllo xhbab cha' dan' ba benllon' naken da wen. Na' yewello cha' benllo da wen, na' bi gonllo xhbab, wenlle ba ben lli'o kerke no be'nn yobre. 5Le totollon' llaya'l gonllo dan' bkwa'nn Diosen' rallna'llo gonllo. 6Na' cha' no wroe' wsede lli'o xti'll Diosen', llaya'l we'lloe' cha' bi da cha'o da wen da ba benla'y Diosen' lli'o. 7Bi we're latj siye'e kwinre, bi gak wkwa'chllo dan' llonllo rao Diosen'. Na' zeje di'll dan' ne: Kon da gazllo len na' yerapllo. 8Le be'nn gone' kon kan' ne da xhinnjen' yo' lo ra'llda'we' na', wllin lla kat kweyie' ke chnare; zan be'nnen' gone' kan' llazra'll Spíritu ke Diosen', Spíritu na' we'n yel nban ke'e ke chnare. 9Na' bi llaya'l wedllo gonllo da wen na', le wllin lla kate Diosen' wzoe' lli'o nbaraz kwis, kon cha' bi kwej yichjllo gonllo dan' llazra'lle' na'. 10Ke len na' llaya'l gonllo da wen rao yeolol be'nn kate gonnen to latj, na' nakllen lliarao gonllo wen ke be'nn ka' ba llonlira'll Criston'. 11Lewiakero' ke letr yel ki llzoja' re', le kwina'n llzoja'n. 12Be'nn ka' lle'n akre' gon ake' bien sore sen dan' nzi'i circuncisión, nench na' yega'nn ake' wen rao be'nn Israel ka'. Llayirj ake' akre gon ake' nench nono wsa'kzi' leake', dan' llejle' ake' ke Criston' gote' le' yay cruzen' ni ke lli'o. 13Le be'nn ka' llasné llaya'l sore sen na', ni leake' bi llaso'n ake' kan' ne ley na'. Kon lle'n akre' sore sen na', nench yeyoe'rao kwin ake' rao be'nn Israel ka'. 14Ka nak nada', bi yeyoe'rao kwina', zan wayoe'rawa' Xanllo Jesucriston' dan' gote' le' yay cruzen' ni ke lli'o. Bill zoa' nench na' gona' kan' ne be'nn ka' lla'a yellrio ni, na' ba naka' ka to be'nn wat ke da de rao yellrio ni. 15Le lli'o ba llonlira'll-llo Xanllo Jesucriston', nnezra' bibi llonen cha' zollo sen dan' nzi'i circuncisión o cha' bi zollo sen na', zan dan' nnezra' za'k kwis dan' ba bakob Diosen' yichjra'llda'ollon'. 16Rao Diosen' nakllo dogarje be'nn Israel cha' ba llonlira'll-llo Criston'. Na' llnnaba' gakrén Diosen' yeolol re' ba llzenayre ke'e, nench na' gone' so kwezre lo yichjra'llda'ore nbaraz ren yel nllie' ke'e na'. 17Na' nna' llnnabchga' bill gonre chla're ka di'll ka' ba be'rena' re'n, le kwerp kia' ni, nsa'n yill ke dan' bsa'kzi' be'nn ka' nada' dan' lloa'a xti'll Xanllo Jesucristo na'. 18Be'nn bi'che, llnnaba' sochga Xanllo Jesucriston' gakrenchgue' re' lo yichjra'llda'oren'. Ka'n gakchga.

will be added

X\