Gálatas 5

1Kan' benlira'll-llo Criston', Le'e babeje' lli'o rao yeolol da llonllo llákello llawé Diosen' lli'o dan' benllo na'. Ke len na' lesellá bill we're latj wchie' akre' re' yenaore da ka' bi za'k rao Diosen'. 2Nada' Pablo llepa' re' to da lliarao. Cha' sore sen dan' nzi'i circuncisión na', bibi za'ken dan' ba bzoraore llonlira'llre Criston'. 3Lle'nra' yepa' re' da yobre, noteze be'nne soe' sen dan' nzi'i circuncisión, lekze llaya'l gone' yeolol dan' llia le' ley dan' bzoj da Moisésen'. 4Na' cha' llákere gonre doxhen dan' ne ley na', nench gakre be'nn wen rao Diosen', ba llzoare Criston' chla're cha' ka'n llákere, na' bi llayonre xhbab kan' nllie' Diosen' lli'o. 5Na' lli'o dan' llonlira'll-llo Jesucriston', zokze Spíritu ke Diosen' lo yichjra'llda'ollon', na' llpen lli'o zello bexhllo, nne'e Diosen' nakllo be'nn wen rawe'n. 6Ke len na' lli'o llonlira'll-llo Xanllo Jesucriston', bitbi llonen rao Diosen' cha' ba zollo sen dan' nzi'i circuncisión o cha' bi zollon. Le da naken lliarao xhen rao Diosen', soteze sollo llie' lwelljllo dan' llonlira'll-lloe'n. 7Zjazetere wen kan' llonre llzenayre ke Diosen'. ¿Noxhan' ba ben nench bill llzenayre di'll li ke'en? 8Dios be'nnen' breje' re' nakre rallne'e, kere nello Le'en llon nench llzenayre di'll yobre. 9Legón xhbab kan' ne di'll ni: “Ra'tze kwa binn llponpen doxhen yezjen'.” 10Na' zoa' rez gon Xanllo Jesucriston' nench bill gonre xhbab krere, na' Diosen' we'e yel llza'kzi' ke be'nnen' llonllejla'lle re', noteze nake'. 11Be'nn bi'che, ka nak nada' chenak nna llroe' llsedra' nia' yeolol be'nn byio, llaya'l soe' sen dan' nzi'i circuncisión nench nni't ake' wen rao Diosen', ¿bixchen nna llsa'kzi' be'nn ka' nada' chet ka'? Zan dan' nia' got Criston' le' yay cruzen' nench sollo wen rao Diosen', ke len na' bi llazra'll ake' xti'lla'n. 12Ka nak be'nn ka' llon chix akre' re', yewera' chenak leake' wchoy kwin ake' ye ra'te. 13Be'nn bi'che, Dios be'nnen' brej lli'o, lle'nre' nnézello bill llonen bien nnaollo kan' ne leyen' nench gakllo be'nn wen rawe' na'. Na' kere nello dan' ne'e ka'n, wak gonllo biteze da xhinnj nen lo ra'llda'ollo na'. Dan' llaya'l gonllon', llaya'l gakrén lwelljllo bi da llak ke totollo, na' llie' lwelljllo. 14Na' doxhente ley dan' nyojen' llzejnie'n lli'o ki: “Llaya'l llie' lwelljllo ka nllie' kwinllo.” 15Zan cha' llakyollrén lwelljllo, na' cha' zi'chi'll lwelljllo, ll-lliayi'kze lwelljllon' chet ka'. 16Yepa' re' to da gonllo, llaya'l soteze sollo gonllo kan' lle'ne Spíritu ke Diosen'. Na' bill wzenayllo ke da xhinnjen' yo' lo yichjra'llda'ollon'. 17Kate llonllo da xhinnjen' kon kan' ne lo ra'llda'ollo na', bi llonnen latje wzenayllo ke Spíritu ke Diosen'. Na' kate llzenayllo ke Spíritu ke Diosen', bi llonllo kon kan' nen kello. Na' llakdil lo ra'llda'ollon', bi llak gonllo kan' lle'nello na'. 18Zan cha' llzenayllo ke dan' llsed llzejnie' Spíritu ke Diosen' lli'o, bill llnebia' ley dan' bzoj da Moisésen' lli'o. 19Nakbie'kze be'nn ka' llzenay ke da xhinnjen' yo' lo ra'llda'o ake'n, llon ake' biteze da xhinnj ki: darén ake' xhyio xho'r be'nne; zorén lwellj ake' na' bi nchayna'a ake'; na' llon ake' da nak zi waye'llo, na' da nak zdo'; 20llonlira'll ake' lwa'a lsa'ke; llon ake' yel walla'a; llwie lwellj ake'; bi ni't ake' wen ren no lwellj ake'; na' llaxhé' lwellj ake'; llcha'a lwellj ake'; llakyollrén lwellj ake'; na' llxe ake' wdil; na' llra' lwellj ake'; 21llaxhé' akre' bi da de ke be'nne; llot ake' no be'nne; nak ake' be'nn wazó; na' zjake' no lnni gan' llon ake' bi da ke nxhia; na' llon ake' billre da xhinnj da nak ka da xhinnj ki da ka' ba bnekza'. Na' llepa' re' da yobre kan' ba bnekza' na', nono yellín gan' llia Diosen' llnebie' cha' llone' da xhinnj ka' nak ki. 22Zan cha' llzenayllo ke Spíritu ke Dios, len llakrenen lli'o: llie'llo lwelljllo; sollo nbaraz; sollo wen lo yichjra'llda'ollo; gapllo yel llxhenra'll ren lwelljllo; gonllo wen ke yezikre be'nne; gakllo be'nn cha'o rao yeolol be'nne; wxenra'lltezllo Diosen' gonllo da lixhej bi da yo' lo na'llo gonllon; 23na' gakllo be'nn nexjra'lle; na' nnebia' kwinllo. Na' cha' llonllo da wen kon kan' lle'ne Spíritu ke Diosen', bibi ley de da nen llonllo da xhinnj. 24Na' be'nn ka' ba nak txhen Criston', ba bda'a ake' le' yay cruzen' yeololte bi da xhinnj ka' zera'll lo yichjra'llda'o ake'n. 25Na' cha' nna' ba zollo llonllo kon kan' ne Spíritu ke Dios na', llaya'l we'llo latj gonllo kan' lle'nre' na'. 26Na' bi llaya'l gonxhen kwinllo, na' bi wlokllo lwelljllo, na' bi llaya'l yexhé' lwelljllo.

will be added

X\