Gálatas 4

1Leska' nia': To be'nn wnia' cha' zo xhi'nne', lebe'n gak rao na'be' yeolol da de ke xabe'n. Na' chak nna nakbe' bida'o, nna nakbe' ka to be'nn wen llin, la'kze wllin lla gak rao na'be' yeolol dan' de ke xabe'n. 2Le lo yo'n llwia llyi akebe', na' llgo' akebe' nez chak nna ll-lli'obe', na' chak llin lla gon xabe'n rao na'be' dan' de ke'e na'. 3Ka'n gok ke neto' kan' bi nna yed Criston', gokto' ka xhi'nn be'nne, na' bnebia' dan' llzejnie' akre' neto' rao yellrio ni. 4Na' ka bllin lla bllia Diosen' bia'a bse'le' Xhi'nne'n yellrio ni, bxhan to no're Le'e. Na' gorje' radj be'nn ka' llnebia' leyen' leake'. 5Na' bede' badsre'e lli'o nench bill llonen bien nnaollo dan' nyoj le' ley ke be'nn Israel ka', na' bene' nench yeolol lli'o llonlira'll-lloe' ba non Diosen' lli'o ka xhi'nne'. 6Na' nench nnézello ba non Diosen' lli'o ka xhi'nne', ba bse'le' Spíritu ke Xhi'nne' Criston' zon lo yichjra'llda'ollo, na' Spíritun' llakrenen totollo nench llalwill-llo Diosen' llelloe': “Xa”. 7Na' dan' non Diosen' lli'o ka xhi'nne', bill llaya'l sollo ka to be'nn zo xan dan' llsa'kzi' leyen' lli'o; none' lli'o ka xhi'nne', na' dan' ba zerenllo Criston' si'llo yeolol dan' bcheb Diosen' gonne'. 8Kan' bi nna gombia're Diosen', benlira'llre lwa'a lsa'ke da ka' bi nak Dios, da ka' bi llaya'l we'raollo, na' leaken na' bnebia'n yichjra'llda'ore. 9Zan nna' ba nombia're Diosen' o cha' wenll nello Diosen' ba nombie' re'. ¿Na' bixchen llayechjzre, na' yeyonlira'llre da benlira'llre kana', na' lloe're latj llnebia'n re'? 10Ba llayonre xhen no lla nba'nn ka', no be'o, no bi da ka' llak rao to iz weje. 11Lleba' cha' bendadza' xchina'n, cha' bill wzenayre ke dan' ba broe' bsedra' re' na'. 12Be'nn bi'cha', lla'tyoera' re' legón nada' txhen kan' bena' nada' re' txhen, goka' ka be'nn bi nombia' ley ke be'nn Israel ka'. Na' kan' badsorena' re' kana', bitbi nia' bénere nada'. 13Nnézkzere badsorena' re' da nelle dan' goka' yillwe', na' be'rena' re' Di'll Wen ke Criston'. 14Na' dan' goka' yillwe'n goken to da bre're. Na'llen' bi bénere nada' kaze, na' do yichj do ra'llre brebre nada' ka ga brebe to angl ke Dios o cha' ka ga brebe kwin Jesucriston'. 15Nbaraz bzore kan' bzorena' re' kana'. ¿Bixchen bill llawere nna'? Wakte wa'a di'll rao noteze be'nn dan' gókere nada'. Chenak benen bien, bzántere da de kere, na' rente kwin yejraore bzánere gonnre nada' chenake. 16Na' nna', ¿llákere llwiera' re'n dan' lloe'rena' re' di'll li ni? 17Ka nak be'nn ka', le lli' yichj ake' re', kere llon ake' wen keré ka'zen', llon ake' ka' nench yebej ake' re', bill lenre neto'n, na' nench yeyoll na' kwe' yichjre leakze'. 18Naksen wen kwe' yichj be'nn ka' re', kon cha' do ra'll ake'n llon ake'n. Na' naksen wen kwe' yichj ake' re' batteze, kere katen' zerena' re' na'zen'. 19Xhi'nna' da'o, ka ll-llayrao to no'r zan, ll-llayrao lo ra'llda'wa' da yobre ni keré, llinte lla kat gakll yichjra'llda'oren' ka nak yichjra'llda'o Cristo na'. 20Yewera' kwis chenak gak sorena' re' nna'stek, na' gak we'rena' re' di'll, le llak zozé lo yichjra'llda'wa' ni keré. 21Re', lle'nere gonre xhen ley dan' nyoj ke be'nn Israel ka', ¿bi nna yénere kan' ne dan' nyojen? 22Nen bzo chop xhi'nn da Abraham na' bi byio ak, tobe' bzo rao be'nn no'ren', gok be'nn wet ke'e, be'nnen' gok be'nn wen llin ke'e, na' ye tobe' bzo rao no'r kekze', be'nnen' bi bene' ka be'nn wen llin ke'e. 23Na' xhi'nn no'ren' gok be'nn wen llin ke'e, gorjbe' dan' bzorén da Abraham na' no'ren', zan xhi'nn no'r kekze', be'nnen' bi none' ka be'nn wen llin ke'e, gorjbe' ni ke dan' bcheb Diosen' san no'r ke'en. 24Na' dan' gok ke no'r ki llzejnie'n lli'o ke chop dan' bne Diosen' gone' nench gakrene' be'nn Israel ka'. No'r wet na', be'nnen' golle Agar, nake' ka ley ke Diosen' dan' bzoj da Moisésen' rao ya' Sinaí. Na' be'nn ka' nao len na', nak ake' ka be'nn ka' zo xan. 25Na'll Agaren' za'krebe' ya' gan' nzi'i Sinaí gan' nbane Arabia, na' leska' za'krebe' ka Jerusalén na' gan' lla'a be'nn Israel ka' nna' lla. Leake' nak ake' ka to be'nn zo xan. 26Na' zo ye to Jerusalén dan' zo yebá, na' naken rall be'nn ka' bi llnebia' da bnao be'nn gor ka' kan' batna', na' lli'o ba nakllo ka xhi'nn be'nn Jerusalén na' dan' zo yebá. 27Kin' llia xti'll Diosen' nen: Bawé no'r will, no'r bi llzo xhi'nne', besia' yel llawé, rwe' bi nna gako' bes ke yel llzo xhi'nne'n. Le no'ren' bsanra'll be'nn ke'e le'e, nni'tll zan xhi'nne' ker ka no'r zokze xhyio. 28Be'nn bi'che, xhi'nn da Abraham na' bin' re Isaaken', gorjbe' dan' goll Diosen' Abraham na' san no'r ke'en, la'kze goke' no'r will. Na' ka'kze lli'o gonlira'll-llo Criston', Diosen' none' lli'o ka xhi'nn da Abraham be'nn gorj nench gok dan' bcheb Diosen' gak. 29Bixha xhi'nn da Agaren', bin' gorj ka bzorén da Abrahamen' le'e, bsa'kzi'be' Isaaken' bin' ben Spíritu ke Diosen' nench bxhan da Saran'. Na' ka'kzen' llak nna' lla, be'nn ka' nao dan' ne leyen' llsa'kzi' ake' lli'o. 30¿Na' bixha ne xti'll Diosen'? Dan' nyojen nen: “Babej no'r wet ko'on, be'nnen' llnebia'o ren xhi'nne' na', le bi wa'abe' dan' bcheba' wa'a bin' bzo ke no'r ko'o na'.” 31Ke len na' be'nn bi'che, nnézello nakllo ka xhi'nn da Sara na', no'ren' bi zo xane', kere nakllo ka xhi'nn no'ren' zo xan na'.

will be added

X\