Gálatas 3

1Re' be'nn Galacia, nchol yichjra'llda'oren'. ¿Noxha bxhiye'e re', na' bsanra'llre bill byejle're da li ke Diosen'? Ba bzejnie'ra' re' kwasro dan' got Criston' le' yay cruzen' ni ke lli'o. 2Toz dan' lle'nra' nnabra' re': ¿Badsó Spíritu ke Diosen' lo yichjra'llda'ore dan' llonre kan' llia le' ley dan' bzoj da Moisésen' o cha' dan' benlira'llre Cristo na'n? 3Zi'tere nakre. ¿Bi llejnie'kzeren'? Spíritu ke Diosen' byo'n lo yichjra'llda'oren' kan' bzorao llonlira'llre Criston'. ¿Llákere lle'nllen gonre billre da yobre nench yeyoll gakre kan' llazra'll Dios na'? 4Da zan da bsa'kzi' be'nn ka' re' dan' llonlira'llre Criston'. ¿Na' bixha zejen na' bdaora'llre da ka' cha' llákere llaya'l gonre bi da gonre nench yerare? 5Nnézkzere Dios na' ba benne' Spíritu ke'en zorenen re', na' llone' yel wak da llre'tere ni ke dan' llejle're xti'll Criston', kere llak llonre da ki ni ke dan' llonre bi dan' ne ley na'. 6Da Abraham na' benlira'lle' Diosen', na'llen' bne Diosen' goke' be'nn wen rawe'n. 7Ke len na' llaya'l nnézere, yeolol be'nn gonlira'lle Diosen', Diosen' none' leake' ka xhi'nn dialla da Abraham na'. 8Batna' Diosen' bllie' bia'a noteze be'nn gonlira'lle Le'e, gone' leake' be'nn wen rawe' la'kze bi nak ake' be'nn Israel. Ke len na' nyoj xti'lle'n llian golle' da Abrahamen' di'll wen ki: “Dan' llonlira'llo' nada', na' gona' wen ke be'nn lla'a yeololte yell ka'.” 9Na' ka'n llon Diosen' wen ke be'nne llonlira'll Le'e nna', kan' bene' wen ke da Abraham be'nnen' benlira'll Le'e. 10Na' noteze be'nne llakre gake' be'nn wen rao Diosen' dan' llone' dan' llia le' ley dan' bzoj da Moisés na', kweyi'chgue' ke chnare chet ka', le nyoj xti'll Diosen' llian: “Gakchga de'e ke be'nn, cha' bi soteze soe' gone' yeolol kan' llia le' ley na' batteze.” 11Na' nnézello Diosen' bi llone' lli'o be'nn wen rawe' dan' llonllo dan' ne leyen', le xti'll Diosen' nyojen nen: “Be'nnen' llonlira'll Diosen' nake' be'nn wen rawe', na' ga't yel nban ke'e.” 12Na' ley na' bi llsedren lli'o cha' llaya'l gonlira'll-llo Dios, kon nen: “Noteze be'nne cha' llone' doxhen kan' ne ley na', ga't yel nban ke'e.” 13Cristo na' bnitrawe' do'l kellon' dan' ba nchoybia' ley na' kwiayi'llo. Be'e latj ben akre' Le'e dan' llaya'l gak ke lli'on chenake. Gok ke'e kan' nyojen na', gan' nen: “Ba nak be'nnen' de'e, be'nnen' bda'a ake' le' yay.” 14Kan' gok nench renkze be'nn ka' bi nak be'nn Israel gonlira'll ake' Criston', na' so ake' nbaraz kan' bzo da Abraham na' dan' benlira'lle' Diosen'. Na'llen' dan' gonlira'll-llo Xanllo Jesucristo na', wse'l Diosen' Spíritu ke'en zorenen lli'o kan' bne'e gone' na'. 15Be'nn bi'che, ni wzejnie'ra' re' dan' llak yellrio ni: Kat to be'nne llkwise' to yich ga llkwa'nnrene' to be'nn bi da nape', kate ba bayoll na', llchi'che'n xhbene', na' nollno gak wachinnj len o wlliallen da zanll kan' llian na', la'kze naken to da llon be'nnach. 16Na' ka nak dan' goll Diosen' Abraham na', gone' da wen ke'e, na' ren ke xhi'nn dialle'e, xti'll Diosen' dan' nyojen bi lloe'n di'll nen, be'nn zan dialla da Abraham na', kon lloe'n di'll ke toze', na' nello Cristo na'kzen'. 17Na' dan' goll Diosen' Abraham na', gone' gak da wen ke'e na', llonen ka ga llkwis to be'nn yichen', le Diosen' bi bache'e kan' bne'e gone'n. Na' bde tap gayoa chilloa (430) iz kan' bcheb Diosen' gone' da wen ke da Abraham na', kat bene' nench bzoj da Moisésen' ley ke'en. Na' la'kze Diosen' be'e le'e leyen', bi nnello bill gone' kan' bne'e gone' ke da Abraham na', na' ren xhi'nn dialle'e ka'. 18Cha' llákello llonen bien na' gonllo kan' ne ley na', nench si'llo dan' bcheb Dios na' gonne' lli'o, bill nxenra'll-llo dan' bcheb Diosen' gonne' lli'o chet ka'. Le Dios na' gonne'n lli'o ka'ze, le ka'n bchebe' rao da Abraham na'. 19Cha' ka' naken, ¿bixchen byallj ley dan' bzoj da Moisés na'? Diosen' be'en da xozxta'ollo be'nn Israel ka', nench gokbe'e akre' bi llon ake' dan' nllia Diosen' bia'a gon ake' na'. Na' bllie' bia'a gonen llin llinte lla yed be'nnen' bne Diosen' garje' rao dialla da Abraham na', ke Le'en be'e Diosen' di'll kan' bne'e gone' wen ke xhi'nn dialle'e. Na' ka nak leyen', Diosen' bene' nench be'e angl ka' da Moisésen' len, nench na' bzejnie're' da xozxta'ollo be'nn Israel ka' kan' llian na'. 20Na' kan' goll Diosen' da Abrahamen' gone' wen ke'e, kwinkze bzejnie're' da Abrahamen', na' bill byalljre' be'nn yobre wzejnie're' le'e kan' gone'n. 21¿Bixha wak nnello kreren' llon ley dan' bzoj da Moisésen' ren dan' bcheb Diosen' gone'? Bi naken ka'. Le chenak leyen' nsa'an yel nban zejlikane, wak gonllo kan' ne ley na', na'll gakllo be'nn wen rao Diosen' chenake. 22Na' xti'll Diosen' dan' nyojen llian yeolol be'nnach, ba nbeyi' ake' ke chnare, ni ke do'l ke ake' ka', na' kon be'nne llonlira'lle Jesucristo na', wnitrawe' do'l ke ake'n, nench na' be'nn ka' wxenra'll Jesucriston', wak si'i ake' dan' ba bcheb Diosen' we'e leake'. 23Na' ka bi nna yed Cristo na', leyen' bnebia'n be'nn ka' bllinte lla bnnézeto' llaya'l gonlira'llto' Criston'. 24Le ley na' benen ka to be'nne llwia xhi'nn be'nne, llinte lla yed Criston' nench be'nn gonlira'll Le'e, gak ake' be'nn wen rawe' na'. 25Na' ka nak ba bed Criston', bill nak leyen' ka be'nn llwia llyi neto'. 26Na'llen' yeololte lli'o llonlira'll-llo Xanllo Jesucriston', naksllo xhi'nn Dios. 27Na' notezllo cha' ba blloallo nis dan' llroe'llo nakllo Criston' txhen, ba bayak yichjra'llda'ollon' kan' nak yichjra'llda'we' na'. 28Ke len na' bibi llroe'n cha' nakllo o cha' bi nakllo be'nn Israel, na' cha' nakllo o cha' bi nakllo be'nn wen llin zo xan, na' cha' nakllo be'nn byio o cha' nakllo no're. Le yeolol-llo naksllo toz be'nne dan' nxenra'll-llo Xanllo Jesucristo na'. 29Na' dan' nakllo txhen Criston', rao Dios na'kzen' nakllo xhi'nn dialla Abraham, ka' gonkze Diosen' wen kello kan' ba bne'e gone' ke xhi'nn dialla Abraham na'.

will be added

X\