Gálatas 2

1Na' ka gok chda' (14) iz bya'a Jerusalén na' da yobre, bya'rena' Bernabén', na' leska' bchia' Tito na'. 2Na' bya'a le bzejnie' Diosen' nada' llaya'l cha'a. Na' btopa' be'nn ka' nak be'nn brao ke be'nn ka' llonlira'll Jesucriston', na' leakze' bzejnie'ra' bin' llyixjwe'ra' be'nn ka' bi nak be'nn Israel kate lloe'rena' leake' Di'll Wen ke Criston', le gokra'lla' nnez akre' nench ke nne ake' bibi za'k dan' llona'n, na' dan' bena'n. 3Ka goken bi ben ake' bien so be'nnen' sen dan' nzi'i circuncisión, be'nnen' nake' nada' txhen re'e Tito la'kze bi nake' be'nn Israel. 4Kan' gok la'kze blla'a ren bal be'nn lwelljllo, be'nn ka' kere do ra'll ake'n benlira'll ake' Criston', kon to blle'nao ake' nench wlliayi'll ake' lli'o, dan' bi naollo klle'llo yeolol dan' nyoj le' ley ke be'nn Israel ka'. Le leake'n gokra'll ake' gon ake' bien nnaoto' yeolol da ka' nao leake'n nak ake' be'nn Israel. 5Na' neto' ni ra't bi bzenayto' ke ake', le gokra'llto' bi ga't da wllon wzenayre Di'll Wen ke Criston' dan' nak da li na'. 6Na' ka nak be'nn ka' gok be'nn brao ke be'nn ka' llonlira'll Criston' Jerusalén na', bi gokra'll ake' yexoa ye ra't ke ake' kan' llsed llroe'ra' ke Criston'. (Le bibi de wroe' dan', cha' gok ake' be'nn brao o cha' bi gok ake' be'nn brao, le rao Dios na'n toz ka za'k yeololte be'nne.) 7Le gokbe'e akre' ngo' Diosen' rao na', llyixjwe'ra' Di'll Wen ke Criston' rao be'nn ka' bi nak be'nn Israel, kan' none' ke Pedron' ngoe' rao ne'e llyixjwe're' xti'll Criston' rao be'nn ka' nak be'nn Israel. 8Le Diosen' be'nnen' bse'l Pedron' nench chixjwe're' xti'll Criston' rao be'nn Israel ka', Lekze'n llakrene' nada' nench llyixjwe'ra' xti'll Criston' rao be'nn ka' bi nak be'nn Israel. 9Ke len na' Jacobon' ren Pedron' ren Juan na', be'nn ka' nakll be'nn brao rao be'nn ka' llonlira'll Criston' Jerusalén na', kate gokbe'e akre' kan' llakrén Diosen' llona' xchine'n, na'll be'x ake' ta'ka', na' ren ta'k Bernabén' nench broe' akre' neto' llon ake' neto' txhen, na' byazra'll ake' kan' llonto' na'. Le llak akre' wenkzen' gonto' xchin Diosen' rao be'nn ka' bi nak be'nn Israel, na' leake' gon ake' xchine'n rao be'nn Israel ka'. 10Toz dan' goll ake' neto' gonto', gakrento' be'nn ya'ch ak. Na' da likze lli' yichja' llona' ka'. 11Na' kan' bed Pedron' yellen' nzi'i Antioquían' bdile' kan' llone'n, le broe'rawe llone' dan' bi llaya'l gone'. 12Ka blline' Antioquía na', lle'j llaorene' be'nn ka' llonlira'll Criston' txhen la'kze bi nak ake' be'nn Israel. Na' bde na' bllin be'nn Jerusalén ka' bse'l Jacobon', na'll bill gokra'lle' ye'j gaorene' txhen be'nn ka' bi nak be'nn Israelen'. Le bllebe' si'chi'll be'nn ka' le'e, be'nn ka' ne, noteze be'nn llonlira'll Criston', llaya'l so ake' sen dan' nzi'i circuncisión. 13Na'll yezikre be'nn Israel ka' llonlira'll Criston' leska' wix ake', na'll bill we'j bdaorén ake' be'nn ka' bi nak be'nn Israel ka' txhen, na'll bko'yelrén aktere' Bernabén' nench na' rene' wixrene', bene' kan' llon ake' na'. 14Gokbe'ra' bi llon ake' kan' llaya'l gon lli'o nombia'llo di'll li ke Criston'. Na' ke len na' bdila' Pedron' rao yeolol be'nn ka' ndopen', na' golle': “Rwe' nakte'o be'nn Israel, na' ba brej yichjo' ka dan' nao be'nne Israel ka', nench na' llono' txhen be'nn ka' bi nak be'nn Israel. Na' nna', ¿bixchen llchie'zro' be'nn ka' bi nak be'nn Israel gon ake' kan' nak dan' nao be'nn Israel ka'?” 15Neto' gorj radj be'nn Israel ka', bi gorjto' radj be'nn wen da xhinnj ka' bi nombia' Dios. 16Na' ba nnézkzeto' Diosen' bi ne'e nakto' be'nn wen rawe'n, ni ke dan' llonto' kan' ne le' ley dan' bzoj da Moisésen'. Le ne'e kon be'nn nxenra'll Jesucriston', nak akse' be'nn wen rao Diosen'. Na'llen' ren neto' ba llonlira'llto' Criston' nench nne Diosen' keto' naksto' be'nn wen rawe'n. Ne'e ka' kere dan' llonto' kan' ne ley na', le nono zo be'nn nak be'nn wen rao Diosen', ni ke dan' llone' da ka' llia le' ley na'. 17Neto' ba llonlira'llto' Criston' nench non Diosen' neto' be'nn wen. Ke len na' llakbe'to' toz ka' nakto' ren noteze be'nn wen da xhinnj. ¿Llákere Criston' llone' lli'o be'nn wen da xhinnjen'? Cha' ka' llake no be'nne, kreren' llon ake' xhbab. 18Na' ba brej yichja' leyen' dan' bi bzoe yeyonen nada' be'nn wen, na' cha' yezorawa' yenawa'n da yobre, da xhinnj xhen gona' chet ka. 19Le dan' bi bxha'kra' gona' kan' ne leyen', na' ba naka' ka be'nn ba got rao leyen', na' nna' nbana' yo'kze yichja' soa' wzenaya' ke Diosen'. 20Criston' gote' le' yay cruzen', na' naka' ka be'nn got ren Le'e txhen. Bill zoa' ka zo to be'nn zo ka'ze, le nna' ba zoteze zorén Criston' nada'. Na' dan' llona' na', llona'n kon kan' ne Xhi'nn Dios be'nnen' llonlira'lla' na'. Le Le'en nllie're' nada' be'e latj gote' ni kia' nada'. 21Bi wzia' chla're dan' nllie' Diosen' lli'o. Le chenak leyen' bxha'ken bayonen lli'o be'nn wen rao Diosen', bibi za'ken got Criston' chet ka'.

will be added

X\