Efesios 3

1Ke len na' nada' Pablo, yoa' lo rill ya, ni ke dan' lloe'rena' re' xti'll Xanllo Jesucriston', re' bi nake be'nn Israel. 2Na' ba llaya'l nnézere nllie' Diosen' nada', na' ba bkwa'nne' rallna' wzejnie'ra' re' xti'lle'n. 3Ba bzejnie're' nada' da nono bnneze, ka'n ba bzoja' re' to chop di'll le' yich ni. 4Kate wrabre yich ni, gakbe're llejnie'ra' dan' nono byejnie' kana' ke Criston'. 5Le kana' bi bzejnie' Spíritu ke Diosen' be'nne, na' nono bnneze ke Criston'. Zan nna' ba bzejnie'n neto' nakto' postl ke'e, rente nollre be'nn ba breje' we'to' xti'lle'n, neto' ba nakto' rallna'a Dios. 6Dan' bzejnie'n lli'o, llroe'n be'nn ka' bi nak be'nn Israel ren be'nn ka' nak be'nn Israel, si'i ake' dan' bcheb Diosen' gonne' ke lli'o nakllo rallne'e, ni ke dan' llejle'llo ke Di'll Wen ke Xanllo Jesucriston', na' nakllo ka toz be'nne, na' to chi'ze llakrén Diosen' lli'o kan' ba bnekze' gone'. 7La'kze bi za'kteka', kone yel wak ke Dios na', breje' nada' chixjwe'ra' Di'll Wen ke'e na'. 8La'kze nada' naka' le zeraoze be'nn da'o, bibi za'ke rao yeolol be'nn ka' ba brej Diosen', nak rallna' chixjwe'ra' be'nn ka' bi nak be'nn Israel, ka da wen na' gone' ke yeolol lli'o llonlira'll Criston'. 9Diosen' bene' rallna' wzejnie'ra' yeolol be'nn dan' ba nchoye' gaken. Kan' bxhe yellriote, nono bnneze dan' bllie' bia'a gaken, toze Le'e nnezre', Diosen' be'nnen' ben yeolol da de. 10Ka'n gok nench be'nn ka' lldop ll-llay llonlira'll Criston', gon ake' nench angl brao ka', na' angl wnebia' ka' lla'a yebá na', nnez akre' ka yel si'n nap Diosen' ke yeolol da llone'. 11Diosen' llone' kan' bne'e gak kana'te, kan' bi nna xe yellriote, bne'e kan' gone' ke Xanllo Jesucriston'. 12Nakllo txhen Xanllo Jesucriston' dan' nxenra'll-lloe' na'. Na'llen' bi llebllo Diosen', na' llawello nnézello llak lloe'renlloe' di'lle. 13Ke len na' lla'tyoera' re', bitbi gákere dan' llak kia' ni, za'kzia' dan' lloe'rena' re' xti'll Jesucriston'. Na' naken da yewere, le ni ke re'n llak kia' ka'. 14Ke len na' llzoa xhiba' rao Xa Xanllo Jesucriston'. 15Le Le'en bxie' yeolol dialla ke lli'o zollo yellrio ni, na' ke be'nn lla'a yebá. 16Llnnaba' rao Diosen' be'nnen' za'k kwis, gonne' re' Spíritu ke'en cho'n lo ra'llda'oren' ren yel wak ke'e na'. 17Llnnaba' sorenteze sorén Criston' re', dan' llonlira'llre'. Na' llnnaba' serén yel nllie' ke Diosen' re', na' gaken da lliarao rao yel nban keré, 18nench chejnie're, ren yezikre be'nne nak rallna'a Dios, katek nllie' Criston' lli'o. Ga zeraoze ga bi yeyoll yedokze nllie're' lli'o. 19Na' llnnaba' chejnie're kan' nllie're' lli'on, nench na' gakre ka to be'nn ba bxhi'i yeolol bi da de ke Dios. Le Le'en nllie're lli'o da xhen gore, nono chejnie'kze katken' nak yel nllie' ke'en. 20Diosen' llak llone' yeololte, na' llonnlle' ye ra't ka dan' llnnabllon', na' da llonllo xhbab gonne'. Ke len na' lloe'llo yel llioxken ke'e, le yel wak ke'e na'n zorenen lli'o. 21Na' lli'o lldop ll-llayllo llonlira'll-llo Xanllo Jesucriston', llaya'l gonllo xhen Diosen' ke chnare. Ka'n gakchga.

will be added

X\