Efesios 1

1Nada' Pablo naka' postl ke Jesucriston' kan' byazra'll Diosen', na' llzoja' re' lla'a Éfeso, re' nak rallna'a Dios llonlira'llre Xanllo Jesucristo na'. 2Na' llnnaba' rao Xallo Dios ren Xanllo Jesucristo na', gakrén akchgue' re', wzoa ake' yichjra'llda'oren' so kwezre nbaraz. 3Llaya'l gonllo Diosen' xhen be'nnen' nake Xa Xanllo Jesucristo na', lli'o nakllo Criston' txhen, ba benn Diosen' lli'o yeolol da yallje yichjra'llda'ollo, yeolol da de yebá gan' zoe' na'. 4Le brej Diosen' lli'o kan' za xete yellrion' nench na' gakllo rallna'a Cristo, na' sello rao Diosen' gakllo ra'llda'o yalle, bibi do'l gapllo rawe'n. 5Ba nllie' Diosen' lli'o kan' bi nna sotello. Na'llen' none' lli'o ka xhi'nne' kan' byazra'lle' na', ke len na' bse'le' Jesucriston' ni ke lli'o. 6Llaya'lkze sollo gonllo Diosen' xhen kateken' nllie're' lli'o na', le bse'le' Jesucristo be'nnen' nllie're' na' gokrene' lli'o. 7Kan' got Cristo na'n, brarj xchene' ni ke da xhinnjen' benllo. Na'llen' bazi'xhen Diosen' ke da xhinnj kellon' le nllie're' lli'on. 8Na' llone' wen kello, llonne' lli'o doxhen yel si'n, na' yel llejnie' ke'en. 9Na' bzejnie're' lli'o dan' llwie' gone' na', dan' nono bnneze kana', le yel be'nn wen ke'en ba benen nench bed Criston' rao yellrio ni. 10Le bne'e wllin lla kat yeolol be'nn lla'a yebá ren be'nn lla'a yellrio, wzenay ake' ke Criston' gak ake' rallne'e. 11Ka nak lli'o nakllo Cristo txhen, kana'te brej Diosen' lli'o nench gak rallna'llo dan' lle'nre' gonne' lli'o. Na' Le'e gone' nench gak yeolol kan' bllie' bia'a gone'. 12Le Le'en gokra'lle' zga'tek neto'n bxenra'llto' Criston', na' brej Diosen' neto' nench sorentoe' txhen gontoe' xhen dan' nake' be'nn za'k kwis. 13Leska' re', kate bénere Di'll Wen ke Criston' dan' nak da li, bnnézere Le'en wasre'e lli'o, na'llen' benlira'llre', na' ba naksre Criston' txhen. Na' ba benne' re' Spíritu ke'en zon lo ra'llda'ore kan' bne'e gone' na'. 14Spíritu ke'e na'n dan' ba benne' lli'on naken ka to da bkwiarawe', na' naken to da llroe' lli'o gonnkze Diosen' lli'o dan' ba bchebe' na', kana'n yekobe' xpe'rllon', na' gone' lli'o yell ke'e, be'nn ba bkwa'nnrene' yeolol da nak ke'e, nench na' we'raolloe', le nake' be'nn za'k kwis. 15Ke len na' ka benra' di'llen' llonlira'llre Xanllo Jesúsen', na' kan' nllie're' yezikre be'nn llonlira'll Le'e, 16na'llen' ni ke llsanza' lloa'a yel llioxken ke Dios, ni ke re' katen' llalwille'n. 17Dios be'nnen' llon Xanllo Jesucriston' xhen, be'nnen' nak Xe'e be'nn za'ke, Le'e llalwilla'. Na' llnnabre' gone' cho' yel si'n na' lo ra'llda'ore, na' chejnie're xti'lle'n, na' gombia're' kwasro. 18Na' llnnaba' cho' beni' ke'en lo ra'llda'ore, nench na' nnézere bi da wen na' bexhllo gone' ke lli'o ba breje' nakllo rallne'e. Na' llnnaba' nench nnézere ka da wen na' nak yeolol da ka' za gonne' gak ke lli'o. 19Leska' llnnaba' cho' beni' ke'en lo ra'llda'ore nench nnézere ba napre yel wak xhen ke'en, re' ba llonlira'll Le'e, kon ka ba broe're' lli'o yel wak xhen ke'e na'. 20Ka'n bene' kan' basbane' Criston' radj be'nn wat ka'. Bde na' brekwe' Le'e kwite gan' llie' yebán', na' llnebia' ake'. 21Na' Criston' llnebia'lle' nna' rao yeolol angl, na' rao yeolol be'nnach, na' rao yeolol daxi'o, na' rao yeolol biteze da llonlira'll be'nne, na' noteze wnebia'. Na' leska' llnebie' da za za'a. 22Na' ba bene' rao na'a Criston' yeolol be'nne, na' billre da de nench Le'en llnebia'. Na' ba bzoe' Criston' nake' Xanllo be'nn llnebia' yeolol da de. 23Na' lli'o llonlira'll-lloe' nakllo ka to kwerp, na' Cristo na' nake' ka yichj kwerp na'. Na' nnello nya' Criston' ren lli'o llonlira'll-lloe', Le'en zoe' llnebie' doxhente.

will be added

X\