Colosenses 4

1Na' re' nak xan llin, legone wen be'nn wen llin keré ka', ka llon to be'nn llon da zej lixheje, le leska' re' zo to Xanre be'nn zo yebá. 2Leseteze lewalwill Diosen', legón ka be'nn llnna' yere, na' lewe'e yel llioxken ke'e. 3Lennab rao Xanllo Diosen' gakrene' we'rento' be'nne xti'll Criston', da bi nna chejnie' akre', le ni ke len na' yoa' lo rill ya ni. 4Na' lennab rao Dios gakrene' nada' akre we'rena' be'nn ka' xti'lle'n. 5Llaya'l sollo gonllo wen ren be'nn bi nna gonlira'll Xanllo, chaga nna de latje. 6Na' llaya'l we'llo di'll cha'o di'll nyejnie'ra'lle ren yeolol be'nne, na' gonllo xhbab akre yelli'llo xti'll ake'n. 7Be'nn lwelljllo Tíquico ye'e re' yeolol kan' llak kia' na'. Nllie'lloe' le zoe' llakrene' nada' llonto' xchin Criston'. 8Ba bse'le' gan' zore na', nench nnézere kan' llak keto'n nench wtipra'lle' re'. 9Na' za'rene' Onésimon' txhen be'nn lwelljllo nllie'llo na', be'nnen' nak be'nn wrall keré. Be'nn ki chop we'rén ake' re' di'll yeolol dan' ba llak ganni. 10Aristarcon' yo'rene' nada' txhen rill yan' ganni, llwape' re' lliox. Leska' Marcos be'nnen' nake bi'ch lwellj Bernabé llwape' re' lliox. Na' ba bnekza' kan' llaya'l gónere Marcosen' wen katen' yede' gan' sore na'. 11Na' leska' Jesús be'nnen' lle ake' Justo, leze llwape' re' lliox. Le zeraoze be'nn ki be'nn Israel llakrén ake' nada', ke nak llyixjwe'ra' yel llnebia' ke Diosen'. Na' da xhen lltipra'll ake' nada'. 12Leska' be'nn wrall kerén' re Epafras llwape re' lliox. Llone' xchin Xanllo Jesucriston', na' yo'y ras kat llalwille' Diosen', llnnabe' kwis wzejnie' Diosen' re', yeolol dan' lle'nre' gonre na', nench seteze sere gonren. 13Na' nada' nnezera' da li zoe' llalwille' Dios, ni ke re' llonlira'll Criston', re' zjalla'a gan' nzi'i Colosas na', na' yell gan' nzi'i Laodicea, na' yellen' nzi'i Hierápolis. 14Na' be'nn wen rmellen' re Lucas, be'nnen' nllie'llo, llwape' re' lliox, leska' be'nnen' nzi'i Demas. 15Na' be'nn ka' lla'a Laodicea na', lewap akgalle' lliox, ren be'nnen' nzi'i Ninfas, na' be'nn ka' lldop rille'n lloe'rao ake' Dios. 16Na' kat yeyoll wrabre yich ni, lewe'n be'nn ka' lldop ll-llay llonlira'll Criston' gan' nzi'i Laodicea, na' wrab ake'n. Na' leska' lewrab dan' wase'l be'nn Laodicea ka' keré. 17Na' leyé be'nnen' nzi'i Arquipon', wiachgue' wzerawe' gone' yeolol xchin Dios dan' bro' Xanllo Criston' rallne'e gone'. 18Kwinkza' nada' Pablo llzoja' ra't da ni, llwapa' re' lliox. Bi ganra'llre nada' gan' yoa' lo rill ya ni. Dios na' gakrenchgue' re'. Ka'n gakchga.

will be added

X\