Colosenses 2

1Lle'nra' nnézere llona' ga zerao za'kra' nench llakrena' re', ren be'nn lwelljllo ka' zjalla'a gan' nzi'i Laodicea, na' yezikre be'nn bi nna re'e nada'. 2Lle'nra' yexhenra'll yichjra'llda'oren' gakre toze, na' llie' lwelljre, na' nnezya'nnere kan' llaya'l gonre xhbab, nench chejnie're kan' ba bzejnie' Diosen' lli'o ke Cristo na', dan' nono bnneze do kana'. 3Le Le'en nse'e doxhen yel si'n, na' doxhen yel llejnie' ke Dios nench wzejnie'ren lli'o. 4Nia' ka' nench notno siye'e re' ren di'll da llákere nak nbaraz. 5La'kze zoa' zi't bi zorena' re', yo' yichja' re' dan' zorén Spíritu ke'en lli'o, na' llawera' llnnezra' llonre kan' llaya'l gonre, zechichre llonlira'llre Criston'. 6Ke len na' dan' ba bxhi're Criston' yoe' lo yichjra'llda'ore, ka' leseteze lewxenra'lle'. 7Lesoteze legonlira'll Criston' kan' ba bsedre na', na'll gakre ka to yay da ba nyin roen' zitj, na' lesó lewe'chga yel llioxken ke Diosen' kan' llakrene' re' na'. 8Lewiá ke no wko'yele re', nnaore di'll da llzejnie' krere da de rao yellrio ni. Be'nn lla'a yellrio ni, llzejnie' akre' da zan da ne ake' gonllo da bibi za'ke, na' bi llzejnie'n lli'o da nak ke Criston'. 9Le doxhen kan' nakya'nne Dios na'n nak Criston', na' yel wak ke Criston' leska' naken ka ke Le'e na'. 10Na' nna' ba nakllo ka to be'nn nya' ba badil-llo, dan' nxenra'll-llo Criston', le Le'en llnebia'lle' biteze da nap yel wak. 11Leska' dan' ba nakrenllo Criston' toze, ba nakllo ka to be'nn ba zo sen dan' nzi'i circuncisión, dan' ba bacha'a Criston' lo yichjra'llda'ollo nench bill nnebia' da xhinnjen' lli'o. Na' bi naken ka sen dan' bzoa be'nn ka' kwerp ke ake'. 12Na' dan' blloallo nis kan' benlira'll-lloe' na', zejen kon kan' got Criston' ni kello, leska' lli'o ba nakllo ka to be'nn wat rao da xhinnjen' nench bill gonllon. Na' nakllo ka to be'nn bga'ch kan' bga'ch Xanllo na'n, na' leska' nnello Dios na'n balis basbane' lli'o radj be'nn wat ka', dan' ba llejle'llo basbane' Criston' kone yel wak ke'e na'. 13Kana' gokllo ka to be'nn wat, ni ke da xhinnj kellon', na' dan' bi bzollo sen ke be'nn Israel ka'. Na' nna' kone Criston' ba benne' lli'o yel nban, ka naken bazi'xhene' da xhinnj kello ka'. 14Na' bnit yel za'k ke yich dan' xhoa llao xhia kello batna', na' ll-lliayi'llen lli'o. Le Cristo na'n bake'en kan' gote' le' yay cruzen'. 15Na'llen' kan' got Criston' le' yay cruzen', bake'e yel llnebia' ke yeololte biteze da llnebia', na' broe're' be'nnachen' ba bchochj blane'n. 16Bi chejle're ke be'nn ka' ll-lliayi'll re' kat bi da lle'j llaore, na' be'nn nnechach keré dan' bi llonre txhen no lla lnni, na' be'nn ne ake' be'o lle'n na', llaya'l gonllo lnni, na' no be'nn ne ake' lla ni o lla na' nak aken lla nba'nne. 17Yeolol da ka' ba bde, bzejnie'n lli'o ra'tze ka nak da za za'a, goken ka to bxenze, zan nna' ba bed Criston', bill naken ka to bxenze le ba nombia'lloe'n. 18Bi we're latj wlliayi'll be'nn ka' re', be'nn ka' llon ka ra'llda'o nexjra'lle, na' ne ake' llaya'l we'raore no angl, na' gonre bi da nne ake' bre'da'o akre', na' llonxhen kwin ake' kone di'll dan' llarjla'll ake' na'ze. 19Na' bi llzenay ake' ke Criston', le Le'en nake' yichj kwerpen', na' lli'o nakllo toze, nzap lwelljllo ka to kwerp, na' kone Le'en zi'ltipllo, na'll zejze gak gonllo kan' lle'ne Diosen' gakllo. 20Le ka nak ke lli'o nakllo txhen ren Criston', wak nello Criston' ba none' lli'o ka to be'nn wat rao da xhinnjen' nench bi gonllon. Len na' bi llaya'l wzenayllo ke be'nn nne'e billre da gonllo nench sollo nbaraz rao Dios, le bill nakllo be'nn ke yellrio ni. ¿Bixchen nna llzenayzre ke be'nn ka' lla'a rao yellrio ni, llxoa ake' to da zi'i ko'llre? 21Ne ake': “Bi go'xre da ni”, “Bi ye'j gaore da na'”, “Bi kanre da na'”. 22Na' yeolol da ka' llasné ake' ka', naken da llon llin chollzen', na'll llde ke. Na' dan' ne ake' llaya'l gonllo na', naken to da llarjla'llze lo ra'llda'o leakze'n. 23Na' dan' ne ake' llaya'l gonllon, wakte gonllo xhbab naken da si'n, dan' ne ake' gakllo ka be'nn nexjra'llre, na' dan' we'llo latj biteze da sa'kzi'llo, na' gákello wakrenjen lli'o yelwill-llo Diosen'. Zan ka nak da ki, bi zoen gakrenen lli'o bi gonllo da xhinnj.

will be added

X\