Colosenses 1

1Brej Jesucriston' nada' Pablo nench na' naka' postl ke'e, le ka'n lle'ne Diosen'. Na' llwapa' re' lliox ren be'nn lwelljllo Timoteo na'. 2Llzoja' re' lla'a Colosas, re' llonlira'll Criston', na' nakre rallna'a Dios. Na' llnnaba' rao Xallo Diosen' ren rao Xanllo Jesucriston', gakrén akchgue' re', na' wzoa ake' yichjra'llda'oren' so kwezre nbaraz. 3Yo'y ras kat llalwillto' Dios be'nnen' nak Xa Xanllo Jesucriston', lloe'to' yel llioxken ke'e kan' llonre na'. 4Le ba béneto' di'll kan' llonlira'llre Xanllo Jesucriston', na' kan' nllie're yezikre be'nn ka' nak rallna'a Dios. 5Llonre ka', dan' zore rez yellinre gan' llia Diosen'. Na' byejnie're gak keré ka', kan' bzorao llzenayre xti'll Dios dan' nak da wen na' da li. 6Na' xti'll Dios dan' ba bdixjwe'to' re', ba goslasen doxhen, na' be'nn zan ba llejle' ake'. Na' lekze ka' ba llon leake'n wen, kan' bzorao llon re', kan' byejnie're di'll li dan' llzejnie' nllie' Diosen' re', na' nna' naotere llonre wen nna' lla. 7Kan' ba bzejnie'kze Epafrasen' re', le'e nake' be'nn nllie'to', na' nake' neto' txhen llonto' xchin Diosen', na' leska' zeteze ze'e llakrene' re'. 8Le'en ba golle' neto' ba ben Spíritu ke Diosen' nench nllie're be'nn lwelljre. 9Ke len na' ka bnnézeto' ka wen na' llonre, na' bzoraoto' yo'y ras kat llalwillto' Diosen' llnnabto' gakrene' re'. Llnnabto' gonn Spíritu ke'en re' yeololte yel si'n, na' ren yel llejnie'n nench nnézere akre ya'nnen' lle'nre' gonre. 10Na'llen' gak gonre kan' llaya'l gon lli'o nombia' Xanllon'. Na' yewere' yeolol dan' llonren', na' llnnabto' gakrene' re' gonre zan kwen da wen, ka ke to yay da llbia daxhix wen, na' zjazell gombia're'. 11Llnnabto' gakrén Diosen' re' kone yel wak xhen ke'en, na' sere war, na' soere biteze da gak keré, na' gapre yel llxhenra'll biteze da llak keré. 12Na' sore nbaraz we're yel llioxken ke Xallo Diosen', le Le'en ba breje' lli'o, nench nakllo txhen ren be'nn ka' nak rallne'en, na' yellinllo gan' llie' na', gan' yo' beni' xhen ke'e na'. 13Le Le'en babeje' lli'o rao na'a da wxhiye'n dan' nak ka da xcholen', na' nna' llnebie' lli'o, na' bawe' lli'o rao yel llnebia' ke Xhi'nne' Jesucriston' be'nnen' nllie're'. 14Le Le'en bzane' yel nban ke'en gote', nench bake'e da xhinnj kellon' na' llazi'xhen Diosen' kello. 15Criston' nake' kan' nakya'nne Xe'e Dios, be'nnen' nono llre'e. Criston' ba zokze' ka za xe yellriote. 16Le Dios na' ren Cristo na', ben ake' yeolol da de yebá, na' da de yellrio nga, da nla', na' da bi llak llre'llo. Bene' nench ni't angl wnebia' ka', na' da ka' bayak daxi'o, na' billre da ka' llnebia' yichjra'llda'o be'nn ka'. Na' Criston' bene' yeolol da ka' nench gake' xhen. 17Criston' ba zokze' ka za ga't yeolol da de yellrio ren le' yebá. Na' yeololte biteze da zjadé, nak aken kan' llaya'l gaken na', le Criston' llone' nench ga't yeolol bi da de. 18Na' yeolol lli'o ndop llayllo llonlira'll-lloe', nakllo ka to kwerp, na' Le'en nake' yichj kwerpen', ka yichjllo llnebia'n kwerpen', kan' nak Criston'. Le Le'en bxie' yel nban zejlikanen', na' nake' be'nn nell babane' radj be'nn wat ka'. Ke len na' nake' le zerawe be'nn brao, na' llnebie' yeolol be'nne, na' billre da de. 19Byazra'll Xallo Diosen' gak Criston' ka Le'e. Na'llen' nak Criston' doxhen kan' nak Diosen'. 20Na' leska' byazra'll Diosen' gone' nench yeololte be'nn lla'a yebá, na' be'nn lla'a yellrio ni, yezorén ake' Le'e wen, ke len na' Criston' bzane' yel nban ke'e brarj xchene'n le' yay cruzen', nench yeni't be'nne nbaraz ren Dios na'. 21Kana' bi nombia're Dios. Benre ka be'nn llwie Le'e dan' benre da xhinnj. Zan nna' ba bazoa Criston' re' wen ren Diosen', 22le bzane' yel nban ke'en ni ke lli'o, kan' bet ake' Le'e na'. Na' bayibe' lli'o nench billbi do'l xhia kello de, na' nono zo wlliayi'll lli'o kat yellinllo rao Diosen'. 23Na' lli'o llaya'l sollo gonlira'll-llo Criston', na' gontezllo rez yellinllo gan' llie' na', kan' bzera'll-llo gak kello kan' bzorao bzenayllo xti'lle'n da nellte, na'llen' bibi do'l kello de kat yellinllo rao Diosen'. Na' Di'll Wen ke'en ba goslasen doxhen yellrio nench wzenay be'nnach len, na' Diosen' breje' nada' Pablo chixjwe'ra'n be'nne. 24Nna' llawera' da zan da ll-llayrawa' ni ke dan' llyixjwe'ra' re' xti'll Criston', na' ll-llayrawa' yeolol dan' lle'ne Criston', le naken da gakrén re', nakre ka kwerp ke'e lldop ll-llayre llonlira'llre'. Na' ka' llaka' txhen Criston' kan' bllayrawe'n. 25Dios na' bzoe' nada' nench na' gaka' be'nn wen llin ke'e rao yell ke'en. Na' wzejnie'ra' re' xti'lle'n, nench gakrenen re' lldop ll-llayre llonlira'llre Jesucriston', nench wzejnie'ra' re' doxhen kan' zeje xti'lle'n. 26Kana' nono nna nneze ka da wen na' llon Diosen' ke be'nn nxenra'll Le'e, dan' ba nonkze' xhnid kan' batna'te, na' nna' ba bzejnie're'n lli'o nakllo rallne'e. 27Diosen' lle'nre' nnézello llone' wen ke noteze be'nn, la'kze bi nak ake' be'nn Israel. Le ba broe're' lli'o dan' gok ka to dan' nga'chen', le Cristo na' goke' ka dan' bga'che, na' nna' ba zerene' lli'o, na'llen' zollo rez yellinllo gan' llie' na', gan' yo' beni' xhen ke'e na'. 28Na' lloe'rena' yeolol be'nn di'll ke Criston', lla'tyoe akre' yeolole' gon ake' kan' ne'e na', na' yeolole' llzejnie'ra' xti'lle'n nench chejnie' akre' kwasro, le lle'nra' yeolol be'nn gonlira'll ake' Criston', na' yeolole' gak ake' kan' lle'ne Dios na'. 29Ke len na' llona' kon ga zerao sa'kra' llzejnie'ra' be'nne xti'll Diosen', le Lekze'n llakrene' nada' kwis kone yel wak xhen ke'en.

will be added

X\