Hechos 4

1Nna zete Pedron' ren Juan na', lloe'rén ake' be'nn ka' di'll kat bllin bxoz ka' ren be'nnen' nak xan be'nn ka' llap yoda'o braon', na' ren be'nn ka' nzi'i saduceo. 2Llaklla'a ake' dan' llroe' postl ka' be'nn yell kan' gok babán Jesúsen', ka'kzen' yebán yeolol be'nne. 3Na'll be'x ake' leake', bro' ake' leake' rill ya bllinte bateyó, le ba llonen ba wlle' kan' be'x ake' leake'n. 4Na' be'nn zan ka' bzenay xti'll Diosen' benlira'll ake'n, na' be'nn byio ka' ba nonlira'll Jesucriston', nak ake' do ga'y mire. 5Bateyó badop be'nn wnebia' ka' gan' nzi'i Jerusalén na', na' be'nn gor brao ka', na' be'nn ka' llsedre ke ley dan' bzoj da Moisésen', 6na' be'nnen' nak bxoz brao, be'nnen' re Anás, na' Caifás, na' to be'nn re Juan, na' Alejandro, na' ren no bi'ch lwellj bxoz brao ka'. 7Na'll jaxhi'i ake' Pedron' ren Juan na', bze ake' leake' kllol ake'n, na'll bnnab akre' leake': —Lennechk neto', ¿no bse'l rwe' dan' llonre ki? ¿No ben latj bayonre be'nnen'? 8Bixha llnebia'teze Spíritu ke Diosen' yichjra'llda'o Pedron', lle'e leake': —Re' be'nn llnebia' rao yell, na' re' be'nn gor brao ke Israelen', 9ka nak nna' llnnábere neto' akre goken bayak to be'nn xhinnj. 10Llaya'l nnézere, na' llaya'l nneze yeolol be'nn Israel, be'nnen' ze nga, bayake' kone yel wak ke Jesús be'nn Nazaret na', be'nnen' betre bda're le' yay cruzen', bixha Diosen' basbane' Le'e. 11Jesúsen' wsa'krébelloe' ka to yej, na' re' be'nn wnebia' nakre ka be'nn llon to yo'. Re' bi byo'ra'llre yejen', na' yejen' bi byo'ra'llren', ba naken to yej da za'ke. 12Gatga zo to be'nn gak yesrá lli'o rao da xhinnjen', nono noe' Diosen' yel wak rao yellrio, be'nn gak yesrá lli'o, zeraoze Jesucristo na'. 13Bixha be'nn wnebia' ka', llwia ake' kan' llon Pedron' ren Juan na', bi lleb ake' llalli'i ake' xti'll ake'n. Na' llabán akre', le nak ake' be'nn bi nsedtek. Na'll bayakbe'e akre' leake'n bdarén ake' Jesúsen'. 14Na' llwia akte' ze be'nn xhinnjen' bayaken' kwit Pedron' ren Juan na', na' bi llallel akre', akre ye ake' leake'. 15Na'll bchach ake' leake' lia're choll, chak be'rén lwellj ake' di'lle. 16Na' lle lwellj ake': —¿Akre gonllo ke be'nn ki? Yeolol be'nn Jerusalén ka', nneze da yel wan na' ben ake'n, bikzbi de nnello ke be'nn ki. 17Lete to da gonllo wcheb aklloe', nench ni ye to nollno we'rén aklle' xti'll Jesúsen'. 18Na'll goxh ake' Pedron' ren Juan na', na' goll ake' leake', chras bill we'e ake' xti'll Jesúsen'. 19Bixha Pedron' ren Juan na', lle ake' leake': —Lennechk re' cha' nakllen wen wzenayto' ke re' be'nnach, na' bi wzenayto' ke Diosen'. 20Bi gak soto' lli, dekz de llaya'l nneze be'nn ka' da ka' ba bre'to'n, na' da ka' ba béneto'. 21Na'll da zan da goll ake' leake', ben akre' leake' znia nench lleb ake'. Na'll basán ake' leake', le billbi llallel akre' ka gon akre' leake', le yeolol be'nn yell lloe'rao ake' Dios dan' bayak be'nnen'. 22Ka nak be'nnen' bayaken', ba llone' ka do choa (40) iz wde. 23Na' Pedron' ren Juan na', kate basán ake' leake'n, jayake' gan' lla'a be'nn ka' non ake' txhen na', be'rén ake' leake' di'll, kan' goll bxoz wnebia' ka' ren be'nn gor brao ka' leake'. 24Ka ben akre' ka', gok ake' toze, na' balwill ake' Diosen', bne ake': —Xanto' Dios, rwe' beno' yebá ren yellrio, na' nisda'o, na' yeolol da de rawe na'. 25Na' rey da David na', be'e xti'llo' kan' bzejnie'roe'n, bne'e: ¿Bixchen llach be'nn ka' nench gon ake' da xhinnj? ¿Bixchen be'nn ka' lla'a yellrion' llon akze' xhbab da bibi za'ke? 26Na' badop yeolol be'nn ka' llnebia' rao yellrion', gok ake' toze nench blliayi'll ake' Xanllo Diosen', na' blliayi'll ake' Criston' be'nnen' bse'le' nnebia' na'. 27’Na' da li da gokte rao yell nga, rey Herodes, na' Poncio Pilato, na' ren be'nn bi nak be'nn Israel, gok ake' txhen be'nn Israel ka', nench bet ake' xhi'nno'n, Jesúsen' be'nnen' nak la'y, na' be'nnen' brejo' nnebia'. 28Gok ka' nenchk gok da ba nwiakzo' rwe' gak. 29Na' nna' Xanto' Dios, bwia kan' llon ake'n llcheb ake' neto', na' gokrén neto' be'nn wen llin ko'o, nench bi llebto' we'to' xti'llo'n. 30Na' rwe' wroe'ro' yel wak ke xhi'nno' Jesús, be'nnen' nak la'yen', wayak be'nn llak yillwe', na' gak billre da yebane be'nne. 31Bixha ke bayoll balwill ake' Diosen', bxho' na' bxhiz gan' lla'a ake'n, na' Spíritu ke Diosen' byo'n yichjra'llda'o yeolol ake', na' gok be'e ake' xti'll Diosen', ni ke lleb akze'. 32Na' be'nn zan ka' llonlira'll Jesucriston', toze ka gok yichjra'llda'o ake'. Bi da zjadé ke ake', toze ben ake'n, nono bne: “Kia' da ni”, na' “Kia' da na'”. Yeolol bi da zjadé ke ake' non ake'n toze. 33Na'll postl ka', kone yel wak ke Dios, lloe' ake' di'll kan' babán Jesúsen', na' llonla'yte Diosen' yeolol ake'. 34Ni to be'nn ren radj ake'n bibi byalljre', le ren be'nn zjadé yellrio ke ake', na' no yo' ke ake' llayo't ake'n, na' lljwa'a ake' mellen' gan' lla'a ake' na'. 35Na' ben ake'n rallna'a postl ka', na' leake' llyis ake'n kon ka yallje toto ake'. 36Ka ben to be'nn Chipre be'nn re José, nake' xhi'nn dialla ke Leví, na' postl ka' bsi'i ake' le'e Bernabé, lle'nen nen Be'nn Llayoe'xhen. 37Le'e de to yellrio ke'e, na' bayo'te'n, na' bene' mellen' rallna'a postl ka'.

will be added

X\