Hechos 3

1Gok to lla zej Pedron' ren Juan na' yoda'o braon', ka do lladá chonne, hor na' llalwill be'nn Israel ka' Diosen' yeo lla. 2Na' to be'nn bi llak sa'a ka gorjte', yeo lla lljalek ake' le'e lloa' yoda'on, puert dan' nzi'i Da Nbaraz. Na' llbie' llnnabe' lmoxh rao be'nn ka' llo' yoda'on. 3Bixha kate bre're' Pedron' ren Juan na', ka za cho' ake' yoda'on, le bzete ta'ke' llnnabe' lmoxh. 4Na'll bwiachich ake' le'e, na' lle Pedron' le'e: —Bwiake neto'. 5Na'll bwie' leake', llakre' cha' we'e ake' le'e mellen'. 6Bixha Pedron' lle'e le'e: —Bibi mell kia' de, ni plat ni oro, zan ka da napa' gonna' rwe', kone yel wak ke Jesucristo be'nn Nazareten', bayas na' badá. 7Le be'xte Pedron' ta'ke' cha'we, le gokte bazelle'e, balí nie' ka'. 8Na'll bxhi'te' na' bzorao de'e, na' byo'rene' leake' yoda'on, xhi'te' llawere' lloe'rawe' Dios. 9Yeolol be'nn yell bre'e akre' kan' de'en, na' kan' llone' lloe'rawe' Diosen'. 10Na' bayombia' akre' le'e, nake' be'nnen' llbe' llnnab lmoxh lloa' puerten' nzi'i Da Nbaraz. Na'll llabán akre', nna'l-llej akte' dan' bre'e akre' bayak be'nnen'. 11Na' be'nnen' bayaken', no'xe' Pedron' ren Juan na', bi llsankze' leake'. Na'll yeolol be'nn ka' lla'a yoda'on, llabán akre' kwis zjakdo ake' gan' ze Pedron' ren Juan na', ren be'nn xhinnjen' bayak na', ze ake' gan' ze to lchir kwit yoda'on da nzi'i Lchir ke Salomón. 12Ka bre'e Pedron' be'nn zan ka', na' lle'e leake': —Re' be'nn Israel, ¿bixchen llabánzere, na' llwiachichre neto'? ¿Llákere kone yel wak ke neto'n bayak be'nnen'? 13Dios ke xozxta'ollo Abraham na', na' Isaac na' Jacob, ba be'e Xhi'nne' Jesúsen' doxhen yel bara'nnen', be'nnen' benre rallna'a koxchis, la'kze Pilaton' gokra'lle' yesane' Le'e, na' re' bi be're latje. 14Latje da bnnabre yesán Pilaton' be'nnen' nak ra'llda'o yall be'nnen' llon da li na', bnnabzre yesane' to be'nn wen xhiare. 15Na' betre be'nnen' nak xan yel nban na'. Bixha Diosen' balise' Le'e radj be'nn wat ka', na' neto' bre'to' da likzen' babane'. 16Na' llre're be'nn ni, bi gok se'e, na' nombia're', na' nna' ba bayak nie'n kone yel wak ke Jesúsen', be'nnen' nxenra'llto' na'. Le dan' llonlira'llto' Jesúsen', ke len na' bayone' nia' be'nn ni, na' ba llre're kan' bayake'n. 17’Na' nna' bi'cha', nnézkzera', re' ren be'nn gor brao keré ka', betre Jesúsen' le bi nnezya'nnere bixhan' benre. 18Na' dan' benre ka', gok kan' bne Diosen' gak, kan' bdixjwe' be'nn ka' be'e xti'lle'n kana', bzoj ake' ke Criston' yellayrawe'. 19Na' nna' lewayate ke da xhinnjen' nonren', nench yezi'xhen Diosen' keré, na'llen' wzoe' re' nbaraz. 20Wse'l Xanllo Diosen' Jesúsen' da yobre rao yellrion', be'nnen' breje' kana'te, nench na' yednnebie' lli'o. 21Na' dekz de yega'nn Jesúsen' yebán', llinte kat Diosen' yewe' xhnneze doxhen kan' llak rao yellrion'. Kana'llen' yede', le ka'n bne be'nn ka' be'e xti'll Diosen' kana'. 22Da Moisésen' golle' xozxta'ollo ka': “Wllin lla kat Xanllo Diosen' kweje' to be'nn radjren', na' we'e xti'll Diosen' kan' bene' breje' nada', na' llaya'l wzenayre ke'e. 23Na' noteze be'nn cha' bi wzenaye' ke'e, llaya'l bi'y be'nnen' ka'le, na' kweyie'.” 24’Yeolol be'nn ka' be'e xti'll Diosen' kana', bzoraozen be'nnen' re Samuel, bdixjwe' akre' gak dan' llre'llo llak nna'. 25Re' nakre xhi'nn dialla ke be'nn ka' be'e xti'll Diosen', na' dan' goll Diosen' xozxta'ollo ka' gone', lekze naken ke re'. Ka di'llen' be'renkze' xozxta'ollo Abraham na', kan' golle' le'e: “To xhi'nn dialla ko'on zaza'a, gone' gak la'y be'nn lla'a rao yellrio.” 26Ke nak Diosen' ba balise' Xhi'nne'n, zga'tek bse'le' Le'e radj lli'o be'nn Israelen', badyenla'ye' lli'o, nench wayakbe'llo da xhinnj kellon', na' wayátello.

will be added

X\