Hechos 28

1Na' ka' ballojto' lo nisda'on wen kwis, ni toto' bibi goke. Na' bnnézeto' yellrion' bllinto'n nzi'n Malta, naken to yellrio da lli' lo nisda'o. 2Be'nn Malta ka' le wen ben akre' neto', bxhen ake' to yi' xhen ka nak bllinto'n, le llak yejw, na' llak zay. 3Na' Pablon' jatope' to chop xhis ye'che, na' bxoe'n rao yi'n, bixha ballojkze to bel znia, ka nak bllebba' yi'n, go'lba' ta'k Pablon'. 4Ka bre'e be'nn Malta ka' na'l belen' ta'k Pablon', na' lle lwellj ake': —Be'nn wen xhia be'nnen', la'kze ba bare'e lo nisda'on, Diosen' bi lloe'kze' latj soe'. 5Na' Pablon' bllibe' ta'ke'n rao yi'n, na' baxho'p belen', na' bibi gokre'. 6Na' llbexh ake' kwe' Pablon' yi, na' sete yale' na' gate'. Ba gokte scha bexh ake', na' Pablon' bibi llakre', na' balla'a xhbab ke ake'n. Na'll ne ake', cheke Pablon' nake' to dios. 7Awllo ganna' de to yellrio ke to be'nn re Publio, na' Publion' nake' be'nn wnebia' ke doxhen Malta na'. Le'e brebe' neto', bzoto' rille'n chonn lla. 8Na' xa Publion' de'e llake' yillwe', yoe' da la res, na' yiche' goll llen. Na' byej Pablon' jawie' le'e, na' balwille' Dios. Bayoll na' bxoa ta'ke'n yichje'n, na' bayake'. 9Ka bre'e be'nn ka' ka', na'll kon be'nn llak yillwe' rao yellrion', byej ake' rao Pablon', na' bayak akte'. 10Leska' ben ake' wen keto', ka bllin lla baza'to'n, benn ake' yeolol da yálljeto' rao nezen'. 11Gok chonn be'o zoto' Maltan', na'll baza'to' byo'to' to lo barco da bza'a yellen' nzi'i Alejandría, leska' gan' nzi'i Malta, na' brexhen chak bde da zayen'. Na' nben le' barcon' lwa'a lsa'k ke be'nn ka' re Cástor na' Pólux. 12Na' ka bllinto' yell nzi'i Siracusa na', bzoto' ganna' chonn lla. 13Na' bdeto' to lloe', to lloe' yellrion', na'll bllinto' yellen' nzi'i Regio. Bateyó dá to be' da'o za'a lle'lre, na' bza'to', ballop lla bllinteto' yellen' re Puteoli. 14Puteoli na' balláyeto' be'nn lwelljto' ka' nxenra'll Jesucriston', na' go'tyoe akre' neto' nench ga'yto'. Na' bzorén aktoe' to xhman, na'tell byejto' yellen' nzi'i Roma. 15Be'nn lwelljto' ka' nxenra'll Jesucriston' lla'a Roman', bnnez akre' ka', na' bro' ake' nez badlez ake' neto' gan' nzi'i Foro de Apia, na' gan' nzi'i Chonn Tiend. Ka bre'e Pablon' leake', be'e yel llioxken ke Dios, na'll da xhen bayakxhenre'. 16Ka bllinto' Roman', be'nn xan waka'a ya ka', bene' pres ka' rallna'a be'nn wnebia' ke waka'a ya ka'. Na' Pablon' be'e ake' latj bzoe' to kere, na' ka' bzo akte' to waka'a ya bdape' le'e. 17Ba gok chonn lla zo Pablon' Roman', na' goxhe' be'nn ka' nak be'nn brao ke be'nn Israel ka' lla'a Roman', na' bdop ake' lle'e leake': —Re' be'nn bi'cha', nada' bibi da xhinnj nna gona' da wlleyi' yell kellon', na' bibi nna nnia' ke da ka' nao xozxta'ollo ka', na' be'nn wrall kello ka' be'x ake' nada' Jerusalén na', na'll ben ake' nada' rallna'a be'nn Roma ka'. 18Na' be'nn Roma ka', bnnabyoll akre' nada', na'll gokra'll ake' yesán ake' nada', le bibi da xhinnj bena' da nello llaya'l gata'. 19Ka gokra'll ake' yesán ake' nada'n, bi be'e be'nn wrall kello ka' latj. Ke len na' bnnaba' wde ake' nada' rao kwin rey Césaren', na' kere za'a gawa' xhia ke yell kello na'n. 20Na'llen' ba goxha' re' nench re'ra' re', na' we'rena' re' di'lle. Nlleja' gden ki, ni ke dan' llbexha' yesbán Diosen' be'nn wat ka', ka'kze llbexh zan be'nn Israel ak. 21Na'll lle be'nn ka' le'e: —Ni to yich bi nna si'to' da za'a Judean' we'n xti'llo', leska' ni to be'nn wrall kello ka', bi nna yed yedtawe' xhia, nne'e bi llono' wen. 22Na' lle'neto' nnézeto' bixhan' nsa'o, gateze lléneto' llwie akre' da koben' nao'n. 23Na' be'e ake' di'll dop ake' to lla. Kat bllin llan', be'nn zan jak gan' zo Pablon'. Na' bzorawe' tzirte bllinte tlle'le lloe'rene' leake' di'll kan' nak yel llnebia' ke Diosen', na' llzejnie're' leake' dan' ne ley dan' bzoj da Moisésen', na' dan' bzoj be'nn ka' be'e xti'll Diosen' kana' ke Jesús, nench chejle' ake'. 24Bale' llaze di'll kan' ne Pablon', na' ye bale' bi llaz akse' xti'lle'n. 25Ka nak bi llak toze di'lle, na' bzorao llallach ake'. Na' lle Pablon' leake': —Da li kwis llakte kan' bzejnie' Spíritu ke Diosen' Isaías be'nnen' be'e xti'll Diosen' kana', nench golle' xozxta'ollo ka': 26Byej jell be'nn ka': Da li yénere, na' bi chejnie'kzere, da li re'tere, na' bi gakbe're bi dan'. 27Le ba nakchoch yichjra'llda'o be'nn ki, na' nsej nay ake', na' nchod rao ake', nench bi re'e akre', na' bi yen akre', na' bi chejnie' akre' lo ra'llda'o ake', na' ni ke wayechj akse' wanao ake' nada' nench wayón ake'. 28Na' nna' llaya'l nnézere, ba bse'l Diosen' yel wasrá rao be'nn ka' bi nak be'nn Israel, na' leake' wzenay, na' yesrá Diosen' leake' rao da xhinnj ke ake'n. 29Bayoll bne Pablon' ka', na' ballach be'nn Israel ka', zayej ake' llak dilrén lwellj ake'. 30Pablon' bzoe' chop iz Roman' lo yo' ga bdixhje', na' brebe' yeolol be'nn jawiá le'e. 31Na' llyixjwe're' kan' nak yel llnebia' ke Diosen'. Latj xhen go't nench bzejnie're' xti'll Xanllo Jesucriston', nono bze wllone'.

will be added

X\