Hechos 25

1Na' bllin be'nnen' re Festo, gok chonn lla bze'e Cesarean' byeje' Jerusalén na'. 2Na' jak bxoz wnebia' ka', na' ren be'nn ka' nak be'nn gor brao ke be'nn Israel ka', jak ake' rao Feston' llao ake' xhia dan' llon Pablon'. 3Llnnab ake' gone' okré lljasane' Pablon' Jerusalén na'. Na' leake'n ba noe' ake' di'll got ake' le'e tnez. 4Feston' lle'e be'nn ka' ka nak Pablon' yoe' rill ya Cesarean', na' le'en le wayejte' Cesarean', 5na' lle'e leake': —Lelloj balre nak be'nn wnebia', sa'renre nada' chejllo Cesarean', cha' bi da xhinnj ben be'nnen' na' gaore xhia. 6Feston' bzoe' Jerusalén na', ye xo'n ga chi lla, na'll baze'e zayeje' Cesarean'. Na' bateyó ka balline'n, bllie' gan' llone' yel koxchisen', na' bse'le' be'nn ka' jaxi'i ake' Pablon'. 7Ka bllin Pablon' rawe'n na', jabi'y be'nn Israel ka' za'k Jerusalén. Na' bzorao ake' llao ake' xhia ke Pablon', lltob akre' le'e da zan da ne ake' bene', bixha ni to da ki bi broe'n cha' naken da li. 8Leska' Pablon' llakrén kwine', bne'e: —Bibi nna gona' da wkwa'nn nada' tore rao ley ke be'nn Israel ka', ni kon ren yoda'o braon', ni kone César be'nnen' llnebia' doxhen Roma bibi da xhinnj nna gona'. 9Na' Feston' gokra'lle' yega'nne' wen rao be'nn Israel ka', na'll lle'e Pablon': —¿Lle'nro' wayejo' Jerusalén na' gona' yel koxchis ko'o ganna'? 10Na' bne Pablon': —Ba zekza' rao' ni, le nzoa rey Césaren' rwe' gono' yel koxchis, ganni llaya'l gak yel koxchis kia'n. Rwe' nnézkzero', bibi bena' ke be'nn Israel ka'. 11Cha' bi da xhinnj bena' da llaya'l gata', wakse gata', kere lleba'n. Zan ke dan' lltob akre' nada'n, ni ton bi nak da li, na' bi gak kwa'nnre nada' rallna'a be'nn ka'. Lle'nkzra' kwin rey Césaren' gone' yel koxchis kia'n chet ka'. 12Feston', bayoll be'rene' di'll be'nn ka' llnebia'rene' na', na'll lle'e Pablon': —Ka naken lle'nro' kwin Césaren' gone' yel koxchis ko'on, dekz de chejo' rao le'e. 13Bde chop chonn lla, reyen' re Agripa ren bi zane' no'ren' re Berenice, bllin ake' Cesarean' jara'nn ake' Feston'. 14Ka nak bzo ake' zan lla na', be'rén Feston' le'e di'll ke Pablon', bne'e: —Zo to be'nn bkwa'nn Félixen' rill ya. 15Ka bya'a Jerusalén na', bed be'nn ka' nak bxoz wnebia' ak, na' be'nn gor brao ke be'nn Israel ka' rawa'n, llao ake' xhia, lle'n akre' wsa'kzie'. 16Na'll goll ake', lli'o be'nn Roma bi gak wchoyllo ke be'nne gate', cha' bi nna ga't latj nne'e gakrén kwine' rao be'nn ka' llao xhia ke'en. 17Na' kate bra' ake' ganni, bi brexha'; bateyoze le bya'tia' gan' llak yel koxchisen', na' goll ake' lljaxhi'i ake' be'nnen'. 18Na'll bed be'nn ka' llao xhian', na' llakra' cha' billre da xhinnj yobre wtob akre' le'en. 19Rencha' da llak ke dan' nao ake' na'zen', na' ke ye to be'nn ba got re Jesús, bixha Pablon' de'e ne'e nbankze'. 20Nada' bi nnezra' ke da ka', na'll bnnabre' cha' lle'nre' wayeje' Jerusalén na', gak yel koxchis ke'en ganna'. 21Na' Pablon' bnnabe' tie' rao kwin Césaren', nench gak yel koxchis ke'en. Ke len na' bkwa'nne' lo rill yan', llinte katen' wse'le' rao rey César na'. 22Na'll Agripan' lle'e Feston': —Leska' nada' lle'nra' wzenaya' di'llen' lloe' be'nnen'. Na'll bne Feston': —Wxe wzenayo' xti'lle'n. 23Bixha bateyó ka bllin rey Agripan' ren Berenicen', da nne xhen gok ka bllin ake'n, na' blle' ake' gan' llbe' Feston' llone' yel koxchisen', na' ren be'nn nak xan waka'a ya, na' bal be'nn nak be'nn brao rao yellen'. Na' bse'l Feston' be'nn ka' jaxhi'i ake' Pablon'. 24Na'll bne Feston': —Rey Agripa, na' yeololre lla'llo txhen ganni, ni ze be'nnen', yeolol be'nn Israel ka' llao ake' xhia ke'e, ka be'nn lla'a Jerusalén, na'll be'nn ka' lla'a Cesarea, na' llchie' akre' kwis, llnnab ake' llaya'l gate'. 25Na' kon ka' llakra' nada', bibi da xhinnj bene' da nnello llaya'l gate'. Lete to da bnnabe' tie' rao Césaren' gone' yel koxchis ke'en. Na' llwia' wse'le'. 26Bixha ka nak bibi de wzoja' chixjwe'ra' Césaren' bi ya'nnen' bene'; ke len ba breje', ba nzie' raore ni, na' rao rwe' rey Agripa, na' wakse wnnabyoll rwe', na' ga't da wzoja' Césaren'. 27To da ke nxhia gona' cha' wse'le', na' bi yepa' Césaren' bi ken llse'le'.

will be added

X\