Hechos 22

1—Re' be'nn bi'cha', re' be'nn gor xa, le wzenay di'llen' nia' ni. 2Ka ben akre' nne'e di'll hebreon', yezikre blla'a ake' lli. Na'll bne Pablon': 3—Lekze be'nn Israel nada', gorja' yellen' re Tarso gan' nbane Cilicia, na' Jerusalén ni blli'wa', be'nnen' re Gamaliel broe' bsedre' nada', na' bseda' kan' nak ley dan' bzoj da xozxta'ollo ka'. Do yichj do ra'lla' bena' da llakra' llo'ra'll Dios, kan' llonkze re' nna'. 4Bda'a blle'nawa' be'nn ka' nao nez koben', gokra'lla' got ake', na' be'x akse' bro' ake' rill ya ka be'nn byio ren no're. 5Be'nnen' nak bxoz brao, na' be'nn gor brao ka', nnez akre' kwasro kan' bena'. Leake' benn yich da llonn nada' latj cha'a gan' lla'a be'nn wrall kello ka' Damasco. Na' bya'a llje'xa' be'nn ka' llejle' ke Jesucriston', na' wache'e ake' Jerusalén ni, nench sa'kzi' ake'. 6’Bixha gok ka zya' Damasco, llonen ka do wawill byechjkze to beni' da za'a yebá nada'. 7Na' wixa' je'ttia' rao yo, na' benra' chi'i to be'nn bne'e: “Saulo, Saulo, ¿bixchen da'o llrayo' nada'?” 8Na'll ballia' xti'lle'n, llepe': “¿Noxha rwe' Xana'?” Na' bne'e: “Nada'n Jesús be'nn Nazaret, nada'n da'o llrayo'.” 9Na' be'nn ka' za'rén nada' txhen na' bre'e akre' beni'n, na' blleb ake', na' bi byejnie' akre' kan' bne be'nnen' balwill nada'n. 10Na'll llepe': “¿Bixha gona', Xana'?” Na'll bne'e: “Bayas, na' byejkze Damascon'. Ganna' nne ake' bi llaya'l gono'.” 11Bacholtia' ka nak byo' beni'n rawa'. Be'nn ka' zya'rena' txhen na', be'x ake' ta'ka', ka' gok bllina' Damascon'. 12’Na' zo to be'nn lloe'rao Dios re Ananías, llone' kan' ne ley kellon'. Yeolol be'nn Israel ka' lla'a Damascon', ne ake' nake' be'nn wen. 13Bede' gan' zoa'n, na' lle'e nada': “Saulo bi'cha', nna' yere'ro' da yobre.” Na' le bare'tera', na'll gok bre're'. 14Na'll bne'e: “Dios ke xozxta'ollo ka', ba breje' rwe' nench nnezro' bixhan' lle'nre' gono', na' ba bre'ro' Xhi'nne' be'nn zerao nak be'nn wen, na' ba benro' xti'lle'. 15Na'll we'o xti'lle'n rao yeolol be'nne, na' we'o di'll ke da ki ba bre'ro', na' ba benro'. 16Na' nna', ¿bi llbexho'? Le bayaste' blloa nis, na' balwill Xanllo Jesucriston' nench yezi'xhene' ko'o.” 17’Na' gok ka bayeda' Jerusalén ni, ka llalwilla' Dios lo yoda'o braon' bre'da'ora', broe'rao Jesúsen' nada'. 18Na' bne'e: “Be'la'll blloj Jerusalén na', le bi chejle' ake' di'llen' we'o kia'n.” 19Na' nada' llepe': “Xana', leake' nnez akre' kan' bena' jata'a toto gan' zo yoda'o, llayirja' be'nn ka' nxenra'll rwe'n, na' llgo' ake' rill ya, na' lloa' latj llon ake' zi' ke ake'. 20Kan' bet ake' Esteban be'nnen' be'e xti'llo'n, nada' zia' goka' txhen be'nn ka' bet le'en, nada' bdapa' xhara'n ake'n.” 21Bixha Jesúsen' bne'e: “Lla blloje, nada' wse'la' rwe' zi'te ga lla'a be'nn ka' bi nak be'nn Israel.” 22Zerao to kat bzenay ake' xti'll Pablon', na'll bzorao llosia' ake' da yobre ne ake': —¡Bill llaya'l so be'nnen' yellrio, llaya'l gate'! 23Yezikre llosia' ake', llza'l xhara'n ake', na' llza'l ake' bichte yo rao lla. 24Na' xan waka'a yan' golle' be'nn ka' bro' ake' Pablon' gan' lla'a waka'a ya ka', leska' golle' leake' chintat ake' le'e, nench nne'e bixchen llosia' be'nn ka' llwie le'en. 25Bixha ba nllejte' sorao chintat ake' le'en, Pablon' lle'e to be'nn ka' ze kwite'n: —¿Bixha de latj to be'nn nde le' yich nake' be'nn Roma chin ake' le'e, ka za gaktere yel koxchis ke'en? 26Ka bene be'nnen' ka', na' byeje' jelle' xan waka'a ya ka': —Bwiaya'nn kan' gono'n, nde be'nnen' le' yich nake' be'nn Roma. 27Na'll byejdo xan waka'a ya ka' gan' ze Pablon', na' lle'e le'e: —¿Da li de xhlicho' nako' be'nn Roma? Na'll bne Pablon': —Awa'. 28Na'll bne be'nnen': —Da xhen mell bxha'kra'n nada' nench goka' be'nn Roma. Na'll bne Pablon': —Ka gorjtia' naka' be'nn Roma. 29Be'nn ka' gokra'll chin le'en blle'yi'll ake', leska' xan waka'a ya ka', ka bnnezre' Pablon' ndie' yich nake' be'nn Roma, bllebe' kwis ke naken be'e latj bchej ake' le'en. 30Bateyó xan waka'a ya ka', lle'nre' nnezre' kwasro bixchen llao be'nn Israel ka' xhia ke Pablon'. Na' bake'e gden na', nllej ta'k Pablon', na'll batope' bxoz wnebia' ka', na' yeolol be'nn gor brao ka' llnebia' Israelen', na' breje' Pablon' bze'e le'e kllol ake'n.

will be added

X\