Hechos 21

1Bde bkwa'nnto' be'nn ka', na' byo'to' barcon' zejto' lilla gan' lli' to yellrio dan' lli' lo nisda'on dan' nzi'i Cos. Na' bateyó bllinto' ye to yellrio dan' lli' lo nisda'o dan' nzi'i Rodas, na' bza'to', na' bllinto' to yell nzi'i Pátara. 2Pátara na', jadi'to' to barco da le llza'te chej gan' nzi'i Fenicia, na' byo'to' zejto'. 3Ka zejto' na'n, bre'to' yellen' lli' lo nisda'on dan' nzi'i Chipre, na' bkwa'nnto'n ta'kllo rbese zejzeto' Siria. Kat bllinto' Tiro na' bletj ake' yoa' noa' barcon'. 4Tiro na' jadi'to' be'nn nxenra'll Jesucriston', na' bzoto' to xhman ren leake'. Na' lle ake' Pablon' bi cheje' Jerusalén na', ka' llzejnie' Spíritu ke Diosen' leake'. 5Gok to xhman na' bago'to' nez. Yeolol be'nn ka' llonlira'll Jesucriston' ren no'r ren xkwi'd, bza'rén ake' neto' txhen lloa' nisda'on, na' bche'k xhibto' balwillto' Dios. 6Na'll bde'l lwelljto', na' neto' byo'to' lo barcon', na' leake'n zayej rill ake'. 7Na' bza'to' Tiro, na' bllinto' yellen' nzi'i Tolemaida, na' ballojto' barcon', na' jawapto' lliox be'nn ka' nxenra'll Jesucriston' lla'a Tolemaidan', na' bzorén aktoe' tlla. 8Na' bateyó bza'rento' Pablon' bllinteto' Cesarea, na' byejto' rill be'nnen' re Felipe be'nn lloe' xti'll Jesucriston', leska' nake' txhen be'nn gall ka' llakrén postl ka', rille' na' bzoto'. 9Felipen' zo tap xhi'nne' no'r we'o, na' nne akbe' xti'll Diosen' kon ka llzejnie' Spíritu ke Diosen' leakbe'. 10Na' bzoto' zan lla, kat bra' to be'nn Judea be'nn re Agabo, lloe' xti'll Dios kon ka llzejnie' Spíritu ke Diosen' le'e. 11Na' badra'nne' neto', na' bnnabe' xpaydon Pablon', na' bcheje'n nia'ne'e, na'll bne'e: —Spíritu ke Diosen' ne, ki gone be'nn Israel ka' xan baydon ni, go'x ake' le'e gon ake' le'e rallna'a be'nn zi'te. 12Ka bayoll béneto' ka', neto' na' ren be'nn Cesarea ka', go'tyoeto' Pablon' zanakzen cheje' Jerusalén na'. 13Na'll Pablon' lle'e neto': —¿Bixchen bellre, na' llzoaya'chre nada'? Ba bchoyra'llkza' kere wchej akze' nada', wakse gata' Jerusalén na', ni ke Xanllo Jesucriston' chet ka'. 14La'kze da zan da golltoe', bi bzoekzeto' wza'ytoe', na'll lletoe': —Gakchaz kon kan' ne Xanllo Diosen'. 15Bde gok ka', bento' xhnid, na'll zejto' Jerusalén na'. 16Na' bal be'nn Cesarea ka' nxenra'll Jesucriston', bza'rén neto' nche'e akte' to be'nn re Mnasón be'nn Chipre, ba gok scha nawe' Jesucriston', rill le'e llinto' Jerusalén na'. 17Ka bllinto' Jerusalén na', llawé be'nn ka' nakllo txhen llonlira'll Jesucriston', ka bre'e akre' neto'. 18Bateyó byejrento' Pablon', jara'nnto' Jacobo na', gan' zoe' na', leska' balláyeto' yeolol be'nn gor brao ka'. 19Na' bwap Pablon' leake' lliox, na'll be'rene' leake' di'll toto kan' gokrén Diosen' le'e, ka nak de'e llroe're' xti'll Diosen' be'nn ka' bi nak be'nn Israel. 20Ka ben akre' di'llen' be'e Pablon', be'rao ake' Dios, na'll goll ake' le'e: —Rwe' nnézkzero' be'nn zan be'nn Israel ka', ba llejle' ke Jesucriston', na' yeolol ake' ne ake' llonen bien gonllo kan' ne ley dan' bzoj da Moisésen'. 21Na' ba ben akre', rwe'n da'o llroe'ro' be'nn Israel wrall kello ni't rall be'nn zi't ka', bill gon ake' kan' ne ley dan' bzoj da Moisésen', na' bi wzoa xhi'nn ake' sen dan' nzi'i circuncisión na', na' bi gon ake' billre da ka' nao lli'o be'nn Israel. 22¿Akxha gonllo nna'? Nnez akre' ba bayedo', na' wadop be'nn yell. 23To da ben, ganni zo tap be'nne ncheb ake' we'e ake' Diosen' to da we'e ake' Le'e, na' ba bllin lla we'e ake'n. 24Byejrén ake' yoda'o braon', jadib kwino' ren leake', na' bdixhj dan' llaya'l chixhj ake' na', nench gak wchip yichj ake'. Ka' ben nench re'e be'nn ka' llonkzo' kan' ne leyen', na' gakbe'e akre' kere da li kan' goll ake' leake'n. 25Ka nak be'nn ka' bi nak be'nn Israel, ba bzoj akstoe', bi gon ake' da ka' nao lli'o. Lete to da gon ake', bi gao ake' yel wao da bxoa ake' rao lwa'a lsa'k dios, bi gao ake' llen, na' bi gao ake' no bayi'x ba llchok ake' yen, na' cha' bi nchayna'a ake', bi gak sorén lwellj ake'. 26Na' bche'e Pablon' be'nn tap ka', na' bateyó bayib kwin ake' ren le'e. Na'll byo' ake' yoda'o braon', nench bdixjwe' akre' bxozen' ba bllin lla yeyib kwin ake', na' yera' dan' bcheb ake' we'e ake' na'. 27Bixha ka le gakte gall lla, na' wayoll yera' dan' bcheb ake'n, bal be'nn Israel zaya'k Asia, bre'e akre' Pablon' lo yoda'o braon', na' bta bnne ake' be'nn, na' be'x ake' Pablon'. 28Na' llosia' ake' ne ake': —¡Re' be'nn wrall, legakrén go'xllo be'nnen'! Le'e doxhente de'e llroe're' be'nne, wiello yell kellon', na' rente yoda'o braon', na' bi gonllo kan' ne ley dan' bzoj da Moisésen'. Na' ye to da xhinnj xhen ba bene', ba broe' be'nn bi nak be'nn Israel lo yoda'on. 29Ne ake' ka', le bre'e akre' Pablon' de'e lyell ren to be'nn re Trófimo be'nn Éfeso, na' llak akre' cha' broe' le'e lo yoda'o braon'. 30Yeolol be'nn lla'a rao yell Jerusalén na', ben ake' da nne xhen, na' bdop ake' be'x ake' Pablon'. Na' bxhobxexj ake' le'e, babej ake' le'e lo yoda'o braon', na'll le basej akte' yeololte kon ga nyarjkze ke yoda'on. 31Na' ba llot akse' le'en, kat bllin di'll rao be'nnen' nak xan yeolol waka'a ya ka', na' bnnezre' llak da nne xhen Jerusalén na'. 32Na'll bza'do be'nnen' nche'te' txhonnj waka'a ya rente xan ake'. Ka bre'e akre' be'nn waka'a ya ka', bsan ake' bill ben ake' zi' ke Pablon'. 33Ka bllin be'nnen' gan' lla'a be'nn ka', na' golle' waka'a ya ka' be'x ake' Pablon', na' bchej ake' le'e chop gden. Na'll bnnabe' no be'nnen', na' bixha bene' na'. 34Bixha be'nn zan ka' kon llosia' ake', wde wdere da ne toto ake', na' be'nnen' ni ke llejnie'zre' bixhan' ne ake', kon llak llakia. Na' golle' waka'a ya ka' bache'e ake' Pablon' gan' lla'a ake' na'. 35Ka bllin ake' gan' xhoa ne'p ke gan' lla'a waka'a ya ka', na' blen waka'a ya ka' Pablon' rao llaze, le be'nn zan ka' llon ake' zban, lle'n akre' wzap ake' le'e. 36Le ne nao ake' llosia' ake' ne ake': —¡Llaya'l gat be'nnen'! 37Ka ba llgo' ake' le'e gan' lla'a waka'a ya ka', Pablon' lle'e xan waka'a ya ka': —¿Bi gonnre latj nnia' to chop di'lle? Na' lle be'nnen' le'e: —¿Bixha llakse nne'o di'll griegon'? 38¿Kere rwe'n be'nn Egipto be'nn bwie be'nn wnebia' ka' kan' batna', na' byejo' latj dachen' bche'o tap mir be'nn wen xhia ake? 39Na'll bne Pablon': —Kere nada'n, be'nn Israel nada', na' naka' be'nn Tarso to yell za'k gan' nbane Cilicia, ben okré benn latj we'rena' be'nn ki di'lle. 40Na' be'e be'nnen' latj. Na'll bze Pablon' rao ne'p ka', na' bene' sen ren ta'ke' nench blla'a be'nn ka' lli, na'll bnne'e di'll hebreo bne'e:

will be added

X\