Hechos 2

1Ka bllin lla lnni dan' ne Pentecostés, yeolol be'nn ka' llonlira'll Jesucriston', nak ake' toze gan' lla'a ake'n. 2Kat gokse llakia yebán' ke ga za'a to be' xhen, bllinte lo yo' gan' lla'a ake'n. 3Na' bre'e akre' da nak ka bel yi', llalnninnen jasó ra't wejen yichj toto ake'. 4Yeolol ake' byo' Spíritu ke Diosen' yichjra'llda'o ake', na' bzorao llnne ake' wde wdere di'll, kon ka llzejnie' Spíritun' leake'. 5Na' be'nn zan be'nn Israel ka' lloe'rao Diosen' ba ndop ake' Jerusalén na', na' gateze yell za'k toto ake'. 6Ka ben akre' gok llakian', be'nn zan bdop gan' lla'a postl ka', na'll to nna'l-llej akze', ka nak llen akre' llnne be'nn ka' xti'll toto ake'. 7Na' lla'a ake' llabán akre', ne ake': —¿Kere be'nn Galilea be'nn ki? 8¿Akre llakze llnne ake' xti'll-llo da gorjrén totollo? 9Ganni lla'a bal-llo nakllo be'nn Partia, na' be'nn Media, na' be'nn Elam. Na' bal-llo nakllo be'nn Mesopotamia, na' be'nn Judea, na' be'nn Capadocia, na'll be'nn Ponto, na' Asia. 10Na' be'nn Frigia, na' be'nn Panfilia, na' be'nn Egipto, na' rente be'nn za'a yell ka' zjalli' África, zi'tre ka gan' nzi'i Cirene, bixha ren be'nn Roma zo ganni, be'nn nakse be'nn Israel, na' be'nn za bayak txhen be'nn Israel. 11Na'tell be'nn Creta, na' be'nn Arabia. ¡Na' ka nak be'nn Galilea ki, lloe'rén ake' lli'o di'll ren xti'll totollo, kan' nak yel wak ke Diosen'! 12Yeolol ake' lla'a llakgan akre', na' llabán akre' lle lwellj ake': —¿Akre ka chejnie're kan' llaken? 13Na' ye bal ake' lltitj akre', ne ake': —Zoll akre'n. 14Na' bzolla'a Pedron' ren be'nn chnej ka', na' bnne'e zillj, lle'e leake': —Re' be'nn Israel, na' yeolol re' lla'a Jerusalén ni nna' lla, lewzenay, llonen bien nnézere di'llen' we'rena' re' ni. 15Kere zolle be'nn ki kan' nere na', le nna nak tzire. 16Ganni llak kan' bzoj da Joel, be'nnen' be'e xti'll Diosen' kana', bzoje' kan' bne Diosen' ki: 17Kate ba zo rez wayoll yellrio, nada' Dios wse'la' Spíritu kia'n, na' sorenen yeolol be'nne, na' gona' nench xhi'nnre byio, na' xhi'nnre no'r, we'e akbe' xti'lla'n. Na' bi we'o ka', re'da'o akebe', na' be'nn gor ka', nne akre' yere. 18Be'nn ka' llon xchina'n be'nn byio ren no're, sorén Spíritu kia'n leake', nench we'e ake' xti'lla'n. 19Gona' le' yebán' da yebane be'nne, na' rao yellrio wroe'ra' yel wak kia'n, na' larj llen, na' xhen yi', na' kwe' llén da nak ka bej. 20Willen' wayaken da xchole, na' be'on wayaken xhna ka llen, katen' ba zon llin lla yeda' da yobre, nada' naka' Xanre. Kana' gaken to lla lliarao xhen, na' wroe'ra' yel wak kia'n. 21Ka nak nada' naka' Xanre, noteze be'nn yelwille nada', nada' yesre'e rao da xhinnjen'. 22’Na' re' be'nn Israel, lewzenay xti'lla'n. Ke nak Jesús be'nn Nazareten', Diosen' broe're' nake' be'nn za'ke. Diosen' bene' nench Jesúsen' bene' yel wak, na' billre da yebánello kan' ba nnézkzere na'. 23Bixha gok Jesúsen' rallna're kan' ba nwiakze Diosen', na'll benre' rao na'a be'nn wen da xhinnj ka', na' bet ake' Le'e bda'a ake' Le'e le' yay cruzen'. 24Bixha nna' Diosen' basbane' Le'e radj be'nn wat ka', yel goten' bi bzoen wza'yen Le'e. 25Le ka'kzen' bne rey Daviden' batna', be'e xti'll Jesúsen' bne'e: Llre'teze llre'ra' Xanllon', ze'e kwita', ke len na' notno soe wta wnne nada'. 26Na'll llawé ra'llda'wa', na' llola' nench lloe'rawe'. Na' leska' nnezra' katen' gata', kere ke chnaren' gata'. 27Le nnézkzera' bi wsanra'llo' nada' gan' lla'a be'nn wat ka'. Bi we'o latj go'll xpe'ra'n, nada' naka' rallna'o. 28Broe'ro' nada' ka nak nez dan' zej rao yel nban na', na' yewera' kwis ke naken zereno' nada'. 29’Re' be'nn bi'che, nnézello xozxta'ollo Daviden' gote', na' bkwa'ch ake' le'e, na' llre'tello ba ke'en nna' lla. 30Na' rey Daviden' goke' to be'nn be'e xti'll Dios, be'e di'll kan' bzejnie' Diosen' le'e, na'llen' bnnezre' kwasro kan' gaken, le kwin Diosen' bchebe' bne'e, Criston' garje' rao xhi'nn dialla ke'e, na' nnebie' roraze'. 31Ke len na' gokbe'e Daviden' kan' yebán Criston', bne'e bi ga'ye' gan' lla'a be'nn wat ka', na' bi go'll xpe're'n. 32Na' ba gok kan' bne'en, ke nak Diosen' basbane' Jesúsen' radj be'nn wat ka', na' neto' lloe'to' xti'lle'n, bre'to' kwasro kan' babane'n. 33Na' nna' Diosen' ba balise' Le'e, bazie' Le'e kwite', na' ba llnebia'rene' Le'e txhen. Na' Diosen' bene' rallne'e Spíritu ke'en, kan' ba bchebe' na'. Jesús na'n ba bene' yel wak ni, kan' ba bénere, na' kan' ba bre're. 34Ka nak rey Daviden' kere bayepe' yebán', le kwine'n bne'e ki: Xanllo Dios na', lle'e Xana'n: “Blle'kero' kwita' ni, 35llinte lla kat gona' nni't be'nn ka' xhnia'o, be'nn ka' llwie rwe' na'.” 36’Na' nna' llaya'l nneze yeolol be'nn Israel ka', Jesús be'nnen' betre bda're le' yay cruzen', Le'en ba brej Diosen' nake' Xanllo, na' leska' Le'en Cristo be'nn brej Dios nnebie'. 37Ka bayoll ben akre' di'll ki, da xhen gok akre', na'll lle ake' Pedron' ren be'nn ka' non le'e txhen na': —¿Akxha gonto' nna' cha', bi'cha'? 38Na'll lle Pedron' leake': —Lewayate ke da xhinnjen' nonre na', na' choare nis, nench wroe'n llonlira'llre Jesucriston'. Na'llen' yezi'xhen Diosen' keré, na'll gonne' re' Spíritu ke'en son yichjra'llda'ore. 39Le ke re'n ba bchebe' gonne'n, ke xhi'nnre, ke be'nn lla'a zi'te, na' ke yeolol be'nn gaxh Xanllo Diosen'. 40Na' ka' di'll zan da lloe'rén Pedron' leake', llawe' leake' nez, lle'e leake': —Bi gonre be'nn wen da xhinnj ki txhen, nench ke gak keré kan' gak ke ake' na'. 41Na' ka nak be'nn ka' bxhi'i xti'lle'n, blloa ake' nis. Na' byan ake', ke lla na' badil ake' ka do chonn mire'. 42Na' bni'tteze bni't ake', bzenay ake' dan' llroe' llsede postl ka'. Na' toze ka llon yichjra'llda'o ake', na' llao ake' txhen, na' llalwill ake' Diosen'. 43Yeolol be'nne llon ake' yel wan kwis kan' llon postl ka', da zan da yebánello llon ake', da llroe' yel wak ke Diosen'. 44Yeolol be'nn ka', ba byejle' ke Jesucriston', lla'a ake' toze, na' toze non bi da de ke ake'. 45Bayo't ake' no yellrio, na' bi da de ke ake', na' mellen' bda'on na', llyis ake'n kon ka yallje totoe'. 46Na' yeo lla lldop ake' yoda'o braon', na' we'j bdao ake' txhen rill toto ake', na' nbaraz kwis blla'a ake' txhen bawé akre'. 47Lloe'rao ake' Diosen', na' yeolol be'nn yell llayo'ra'll kan' llon ake'n. Na' Xanllo Diosen' llone' tlla tlla llren yezikre be'nn llonlira'll Jesucriston'.

will be added

X\