Hechos 14

1Na' gok ka bllin Pablon' ren Bernabén' yellen' nzi'i Iconio, jake' yoda'o ke be'nn Israel ka'. Na' jazejnie' akre' xti'll Diosen' kwasro, na' be'nn zan benlira'll Jesucriston' ka be'nn Israel na' ren be'nn griego ka'. 2Na' be'nn Israel ka' bi nxenra'll Jesucriston', bko'yel akre' be'nn ka' bi nak be'nn Israel, nench gok akre' Pablo ren Bernabén' be'nn wen da xhinnj ak. 3Ni ke len na' baga'nn ake' scha Iconion', lloe' ake' xti'll Xanllon', ni ke lleb akze', llroe' akre' kan' nllie' Diosen' be'nn ka'. Na' Diosen' llroe're' di'll likzen' lloe' ake', ke nak be'e leake' yel wak, na' llon ake' da yebánello. 4Na' be'nn Iconio ka' gok ake' chopre, bal ake' bda'a be'nn Israel ka', na' ye bal ake' bda'a postl ka'. 5Na' be'nn Israel ka', na' ren be'nn ka' bi nak be'nn Israel, gok ake' toze ren koxchis ka', na' bzi'chi'll ake' Pablon' ren Bernabén', na' lle'n akre' wchekw ake' leake' yej. 6Ka gokbe'e Pablon' ren Bernabén' ka', na'll baza'a ake' jake' yell ka' nzi'i Listra, na' Derbe ga nbane Licaonia. Na' jatá ake' yell ka' lli' do kwite, 7na' ganna' jatixjwe' akre' Di'll Wen ke Jesucriston'. 8Gan' ne Listra jadi' akre' to be'nn nxhinnj nia' ka gorjte, na' bi llak se'e. 9Bixha ka llzenaye' di'llen' lloe' Pablon' ren Bernabén', Pablon' bwiaya'nne' le'e, na' gokbe're' nxenra'lle' wayake'. 10Na' goll Pablon' le'e zillj: —¡Balí nia'on, na' bazolla'a! Na' le bazolla'te be'nnen', bxhi'te' na' le gokte baze'e. 11Be'nn Listra ka', ka bre'e akre' kan' ben Pablon', bzorao llosia' ake' nne xti'll ake', ne ake': —¡Dios aksen' ba betj radjllon', nak ake' ka be'nne! 12Na' bne ake' Bernabén' nake' dios ke ake', be'nn re Júpiter, na' Pablon' nake' dios be'nn re Mercurio, le le'en lloe' di'llen'. 13Na' bxoz ke Júpiter na', ke nak yoda'o ke'en zon lloa' yellre, jaxie' bal bell, na' bencha'we' yeje, na' jwa'a ake'n gan' lla'a ake' ren be'nn zan ka', gokra'll ake' got ake' bell, nench we'rao ake' postl ka'. 14Ka gokbe'e Bernabén' ren Pablon' kan' lle'ne be'nn ka' gon ake'n, na'll bche'z xhara'n ake', nench broe' akre' be'nn ka', kreren' llon ake', na' bde ake' radj be'nn zan ka' llosia' ake', lle ake' leake': 15—Re', be'nne, ¿bixchen llonre ka'? Lekze be'nnachkze neto', za'to' llzejnie'to' re', llaya'l wsanra'llre dan' naore na', da bi za'ke, na' wayoe'raore Dios be'nn nban zejlikane, be'nn ben yebá, yellrio na' nisda'o, na' bene' yeolol da zjadé. 16Do batna' be'e latj ben be'nn ka' ka nezen ke ake'. 17Na' bzekze' gokrene' yeolol be'nne, nench bnnez akre' zokze', na' Lekze'n llone' llak yejw nench llak bi da llaz lla'nnllo, na' de da lle'j llaollo, na' zollo nbaraz. 18Da zan da goll ake' be'nn ka', ganne bzoe akre' bi bet be'nn Listra ka' bell ka', we'rao ake' leake'. 19Nna llakte ka'n, bllin be'nn Israel ka' za'k yell ka' nzi'i Antioquía ren Iconio, na' benchix akre' be'nn ka', nench bill byejle' ake' ke postl ka'. Na' bchekw ake' Pablon' yej. Na' llak akre' cha' ba gote'n, na'll bxhob ake' le'e brej akte' le'e yell. 20Na' be'nn ka' llonlira'll Jesucriston' bdop ake' byechj ake' Pablon' gan' de'en, na'll bayase' na' bayoe' yell. Bateyó bago' Pablon' ren Bernabén' nez, jayake' gan' nzi'i Derbe. 21Ka ballín ake' na', bdixjwe' akre' be'nne kan' nak Di'll Wen ke Jesucriston', na' be'nn zan benlira'll ake' Xanllon'. Bde na', bza'a ake' ballín akte' Listra, na'll Iconio, na'tell ballín ake' Antioquía. 22Toto yell ga badé ake', be'ltipra'll ake' be'nn ka' llonlira'll Jesucriston', lle ake' leake': —Yezikre lesé war ka naken ba nxenra'llre Jesucriston', dekz de yellayraollo chak bexhllo yeyejllo gan' llnebia' Diosen'. 23Leska' toto yell gan' badé ake'n, brej ake' be'nn gor llejnie', nench se ake' wia ake' be'nn ka' llonlira'll Jesucriston'. Na' bayoll ben ake' was, balwill ake' Diosen', na' ben ake' leake' rallna'a Xanllon', be'nnen' bakze llonlira'll ake'. 24Ka zayo' Pablon' ren Bernabén' nezen', bde ake' ga nzi'i Pisidia, na'll ballín akte' gan' nzi'i Panfilia. 25Ka bayoll be'e ake' xti'll Diosen' yellen' re Perge, na'll baza'a ake' ballín akte' yellen' re Atalia. 26Ganna' byo' ake' barco, na' ballín akte' Antioquía gan' nbane Siria, le kana' ben be'nn Antioquía ka' leake' rallna'a Dios, kan' blloj ake' jatixjwe' akre' xti'lle'n dan' ballín akte' na'. 27Ka ballín ake'n, batop ake' be'nn ka' llonlira'll Jesucriston', na' be'rén ake' leake' di'll kan' gokrén Diosen' leake', broe're' da zan da yebánello gan' jatá ake'n, na' kan' ben Xanllon' bsarje' yichjra'llda'o be'nn ka' bi nak be'nn Israel nench byejle' ake'. 28Na' go'y ake' scha ren be'nn ka' ba llonlira'll Jesucriston'.

will be added

X\