Hechos 12

1Leska' kana' bchoybia' rey Herodes, be'x ake' bal be'nn ka' llonlira'll Jesucriston', nench wsa'kzie' leake'. 2Na' bchoybie' bet ake' Jacobo, bchoy ake' yene', be'nnen' nak be'nn bi'ch Juan na'. 3Gokbe'e Herodesen' bayo'ra'll be'nn Israel ka' kan' bene'n, na'll bse'le' be'nn ka', be'x ake' Pedron' rao lnnin', katen' llao ake' yet xtir dan' bi nchix kwa binn. 4Herodes na', broe' Pedron' rill ya, na' bse'le' tap kwen waka'a ya, be'nn nak tap wej, nench bdap ake' rill yan'. Llakre' ka te lnni na', kweje' le'e rao be'nn yell, gone' yel koxchis ke'e. 5Bixha chak yo' Pedron' rill yan', na' lla'a waka'a ya ka' llap ake' le'e, na' be'nn ka' llonlira'll Jesucriston', llaral llalwill ake' Diosen' gakrene' Pedron'. 6Bixha tlle'le na', ka wxere llwia Herodesen' kweje' Pedron'. Na' Pedron' de'e tase' radj chop waka'a ya, na' nllej ta'ke'n chop gden, na' lla'te ye to kwen waka'a ya, llap ake' lloa' rill yan'. 7Kat bllinkze to angl ke Xanllo Dios lo rill yan', to beni' xhen go'te, na' anglen' jatane' Pedron' basbane' le'e, lle'e le'e: —¡Sete byase! Ka bne'e ka'n, le ballojte gden ka' ta'k Pedron'. 8Na'll lle anglen' le'e: —Bachej le'on, na' barejdo xhero'n. Na'll bayoll na', lle'e le'e: —Balleldo xhallero'n, na' banao nada'. 9Na' balloj anglen', na' zanao Pedron', na' bi llakbe're' cha' da lin' llabej anglen' le'e rill yan', kon llakre' cha' llre'da'ozre'n. 10Badé akte' gan' lla'a to kwen waka'a ya ka', na'll badé ake' ga lla'a be'nn wllope ka'. Kat ballín akte' ga zo reyj de ya dan' llwia tnezre, to wrazzen byarjen, na' balloj ake'. Bza'a ake' ye ra't, na'll baza'a anglen', na' bakwa'nne' Pedron' toze. 11Kana'll gokbe'e Pedron' da likzen' balloje' rill yan', na'll bne'e: —Nna'll llre'ra' da likzen' bse'l Diosen' angl ke'en, nench basre'e nada' rao na'a Herodes na', na' rao yeolol da ka' lle'ne be'nn Israel ka' gon akre' nada'. 12Llonteze' xhbab kan' goken, ballinte' rill María xhna' Juan Marcos, na' lla'a be'nn zan llalwill ake' Dios. 13Ka bnne Pedron' le' zaguan na', byejdo to bi no'r re Rode jawiabe' non' nne. 14Ka bayombia'be' chi'i Pedron', bawebe' kwis, na' bi bsarjbe', zayejdobe' jatixjwe'be' be'nn ka' yela', ba ze Pedron' lloa' yo'n. 15Na'll lle be'nn ka' bi no'ren': —¿Bin' ba llakro'? Na' zekzbe' llebe' leake', Pedro na'n ze ganna'. Na'll bne ake': —¿Kere angl ke Pedro na'n lla? 16Na'll Pedron' zekze' llnne'e lloa' yo'n, na'll jasarj ake'. Ka bre'e akre' le'en, llabán akre' kwis. 17Na'll Pedron' bene' sen ren ta'ke' nench bzo ake' lli, na' be'rene' leake' di'll kan' gok babej Xanllon' le'e rill yan', leska' lle'e leake': —Lechixjwe' Jacobon', na' be'nn lwelljllo ka' yela' kan' ba goken. Na'll balloje' zayeje' ga yobre. 18Bixha ka byeni', da xhen gokllejla'll waka'a ya ka', ke nak nollno Pedron' yo' lo rill yan'. 19Na'll Herodes na', bse'le' be'nne bayirj ake' Pedron', na' bi ballel akre' le'e, na'll bnnabyollre' waka'a ya ka', akre gok balloje', na' waka'a ya ka' bibi gokse nne ake'. Na' bchoybie' bet ake' waka'a ya ka' gop rill yan'. Na'll bza'a Herodesen' Judean', na' byeje' jasoe' yellen' re Cesarea. 20Rey Herodes na', llaklle'e be'nn yell ka' nzi'i Tiro, na' Sidón. Na'll be'nn ka' be'e ake' di'll lljake' rawe'n, na' be'rén ake' to be'nne di'll, be'nn nak rallna'a gan' nbane Herodes, be'nn re Blasto. Be'e ake' le'e mell nench wdie' xti'll ake', na' bnnabe' yeni't ake' wen ren reyen', le yallj akre' da ye'j gao ake' gan' nbane Herodes. 21Herodes na' bzoe' to lla lljak be'nn ka' rawe'n. Ka bllin llan', Herodes goke' xhara'ne' da cha'o, na' bllie' gan' llone' yel koxchis, na' broe' lban rao be'nn Tiro, na' be'nn Sidón ka'. 22Ka bayoll broe' lban na', besia' be'nn ka' bne ake': —¡Kere be'nnachen' bnne, Dioskzen' ba bnne! 23Rawe llak ka'n, to angl ke Xanllo Dios bene' nench Herodes na', bia'ze' to yillwe', le bi be'rawe' Dios, be'e latj be'rao be'nn ka' le'e. Na' gote', na' bdao bel da'o ka' xpe're'n. 24Zan ka nak xti'll Xanllon', zejzell goslasen, na' gateze ba lloe' ake' xti'lle'n. 25Bernabé ren Saulon', bayoll bi dan' ben ake' Jerusalén na', na' baza'a ake' zayej ake' yellen' nzi'i Antioquían', nche'e akte' be'nnen' re Juan Marcos.

will be added

X\