1 Postl ka', na' be'nn ka' llonlira'll Jesucriston' lla'a do gan' nzi'i Judean', bnnez akre' ke nak be'nn ka' bi nak be'nn Israel, ba bxhi'i ake' xti'll Diosen'. 2 Ka ballín Pedron' Jerusalén na', be'nn Israel ka', be'nn ka' nxenra'll Jesucriston', bdil ake' le'e, 3 lle ake' le'e: —¿Bixchen jacho'zo' rill be'nn ka' bi nak be'nn Israel, na' jataorén akte'we' txhen? 4 Na'll be'rén Pedron' leake' di'll kwasro doxhen kan' goken, lle'e leake': 5 —Chak zoa' yellen' re Jope, ka llalwilla' Diosen' bre'da'ora', bre'ra' to xchan xhen nllejten dapte xhi'ne, lletjen yebá, na' za'n gan' zia' na'. 6 Na' bwiaya'nna' bixhan' lla'a loen', na' bre'ra' lla'a bayi'x ba llia tap nia'na'a, ba llxhob le'e, na' ba llia xire. 7 Na' benra' bne Diosen' lle'e nada': “Bzolla'a Pedro, bet ba ki, na' bdao akba'.” 8 Na'll ballia' xti'lle'n: “Ka'a, Xana', bi nna gawa' ba zban ka', nllon leyen' gaoto' ka ba ka'.” 9 Na'll bne'e da yobre, lle'e nada': “Da ba bayib Dios, bill nne'o nakllen zban.” 10 Chonn ras gok ka', na'll bayep xchan na' yebá. 11 Nna' llakte ka'n, le bra'te chonn be'nn gan' zoa'n, be'nn za'k yellen' re Cesarea. 12 Na'll Spíritu ke Diosen' gollen nada' llaya'l cha'rén ake', na' bi gakganra'. Na' bza'rente be'nn bi'chllo ki xope, bllinteto' rill to be'nn re Cornelio, na' byo'to' rille'n. 13 Cornelion' be'rene' neto' di'll ka gok broe'rao to anglen' le'e, na' goll anglen' le'e: “Bse'l be'nn lljake' Jope, na' lljaxi'i ake' to be'nn re Simón Pedro. 14 Be'nn na' we'rene' rwe' xti'll Diosen' akre gono', nench yera'o rao da xhinnjen' ren be'nn lla'a lo yo' rillo'.” 15 Na' ka bzorawa' lloe'rén ake' di'llen', Spíritu ke Diosen' byo'n yichjra'llda'o ake', kan' byo'n lo yichjra'llda'ollon' kana'. 16 Na' jadinra'lla' xti'll Xanllo Jesucriston', kan' bne'e: “Da li Juan na' bchoe' be'nn ka' nis, zan to da za'kll gak keré yedsó Spíritu ke Diosen' yichjra'llda'ore.” 17 Cha' kwin Diosen' ba be'e leake' Spíritu ke'en kan' benne'n lli'o nxenra'll-llo Jesucriston', ¿noxha naka' nada'n yepa' Diosen' bi gone' ka'? 18 Ka bayoll ben akre' kan' bne Pedron', bzo ake' llize na' be'rao ake' Dios, bne ake': —¿Bixha ren be'nn ka' bi nak be'nn Israelen', ba lloe' Diosen' latj yeyat akre' nench yezi'xhene' ke ake', na' we'e yel nban zejlikane ke ake'n cha'? 19 Be'nn ka' bxhonnj goslas kan' bde bet ake' Esteban na', bal ake' bllin akte' gan' nzi'i Fenicia, na' yell ka' zjalli' to yellrio da lli' lo nisda'o gan' nzi'i Chipre, na' yellen' re Antioquía gan' nbane Siria. Na' bi lloe'rén ake' no be'nn yobre xti'll Diosen', zre be'nn Israel ka'ze lloe'rén ake' di'lle. 20 Na' bal be'nn yellen' nzi'i Chipre, na' be'nn Cirene bllin ake' Antioquía, na' bzorao llroe' akre' Di'll Wen ke Xanllo Jesucriston', ren be'nn ka' bi nak be'nn Israel. 21 Na' yel wak ke Xanllon' zerenen leake'. Na' be'nn zan llsanra'll da nao ake', na' baxenra'll ake' Xanllon'. 22 Na' be'nn ka' lldop ll-llay llonlira'll Jesucriston' lla'a Jerusalén na', ben akre' kan' llaken, na' bse'l ake' be'nnen' re Bernabé Antioquía na'. 23 Ka bllin Bernabén', bre're' kan' llakrén Diosen' leake' bawere' kwis, na' golle' leake' do yichj do ra'll ake' nnao ake' Xanllon'. 24 Ka nak Bernabén' nake' to be'nn wen kwis, na' yo'ya'nne' Spíritu ke Diosen', na' le nxenra'lle' Dios, na'll yezikre be'nn zanll bxenra'll Xanllon'. 25 Na'tell byej Bernabén' yellen' re Tarso jadirje' Saulon', ka ballele' le'en, bche'e le'e Antioquían'. 26 To iz bzo ake' Antioquían', ben ake' txhen be'nn ka' lldop ll-llay llonlira'll Jesucriston', na' be'nn zan broe' akre' xti'll Diosen'. Antioquía na' bsi'i ake' be'nn ka' llonlira'll Xanllon', Cristiano da nelle. 27 Ka gok ka', bal be'nn ka' lla'a Jerusalén, be'nn ka' lloe' xti'll Diosen' kon ka llzejnie' Spíritu ke Diosen' leake', na' byej ake' Antioquían'. 28 Toe' be'nn re Agabo bzolle'e radj be'nn ka' lla'a lloe'rao Diosen', na' bne'e kon kan' bzejnie' Spíritun' le'e, bdixjwe're' gak to win xhen doxhen yellrio. Na' ka bllin lla bnebia' be'nnen' re Claudio doxhen gan' nbane Roma, kana' gok win kan' bne Agabon'. 29 Na' be'nn Antioquía ka' llonlira'll Jesucriston', be'e ake' di'll gakrén ake' be'nn lwellj ake' ka' lla'a yell ka' do gan' nzi'i Judea, kon ka yeza'ra'll toto ake'. 30 Na' ka bayoll bdopen na', bse'l ake' Bernabén' ren Saulon' jwa'a ake' mellen' rao be'nn gor brao ka', nak rallna'a be'nn ka' llonlira'll Jesucriston' lla'a Judean'.
