Hechos 10

1Na' yellen' re Cesarea, zo to be'nn re Cornelio, na' nake' xan waka'a ya ka', nzi'i Be'nn Italia. 2Llape' Diosen' bara'nne, la'kze bi nake' be'nn Israel, lloe'rawe' Dios ren be'nn ka' lla'a lo yo' ke'en, na' lloe' mell da llakrene' be'nn Israel ka', na' zoteze zoe' llalwille' Diosen'. 3Gok to lla, lladá chonne bre'da'ore', bre're' to angl ke Dios byoe' gan' zoe'n, na' lle anglen' le'e: —¡Cornelio! 4Cornelio na' bwiachiche' anglen', na' do llebe' lle'e le'e: —¿Bi na', xana'? Na'll lle anglen' le'e: —Diosen' ba benre' kan' llalwilloe'n, na' ba bre're' kan' llakreno' be'nn ya'ch ka'. 5Na' bse'l be'nn lljake' yellen' re Jope, na' lljaxi'i ake' to be'nn re Simón Pedro. 6Zoe' rill be'nn leska' re'e Simón, be'nn wazo'll yid, na' zoe' lloa' nisda'o, le'e ye'e rwe' da llaya'l gono'. 7Ka baza'a anglen', goxh Cornelion' chop be'nn wen llin ke'e, na' goxhte' ye to waka'a ya, be'nn llakrén le'e, leska' waka'a yan' nxenra'lle' Diosen'. 8Na' be'rene' leake' di'll kan' goll anglen' le'e, na'll bse'le' leake' Jopen'. 9Bateyó ka ba zo rez llin be'nn ka' Jopen', Pedron' byepe' yichjo gan' zoe'n, nench balwille' Dios, llonen ka do wawill. 10Na' done' kwis, na' gokra'lle' gawe'. Chak llon ake' da gawe'n, bre'da'ore'. 11Bre're' byarj yebán', na' bre're' to xchan xhen, nllej toto xhi'ne lletjen. 12Na' loe na' lla'a yo'y kwen bayi'xe ba llia tap nia'na'a, na' ba llxhob le', na' ba llia xire. 13Na'll benre' bne Diosen': —Byas Pedro, bet ba ki na' bdao. 14Na'll Pedron' lle'e Diosen': —Ka'a, Xana', bi nna gawa' ba zban ka', nllon leyen' gaoto' ka ba ka'. 15Na'll bne Diosen' da yobre, lle'e le'e: —To da ba bayib Dios, bi nne'o nakllen da zban. 16Gokte chonn ras lle'e le'e ka', na'll bayep xchan na' yebá. 17Chak llon Pedron' xhbab kwis, bi zejen dan' bre'da'ore'n, kat bllinkze be'nn ka' bse'l Cornelion' lloa' yo'n, llnnab ake' gan' zo be'nnen' re Simón, be'nn wazo'll yid na'. 18Ka bllin be'nn ka' lloa' yo'n, bnne ake' zillje, llnnab ake' cha' ganna'n zo to be'nn re Simón Pedro. 19Na' nna ze Pedron' llone' xhbab ke dan' bre'da'ore'n, kat goll Spíritu ke Diosen' le'e: —Rwe'n llayirj be'nn ki chonne. 20Lla bzolla'a, na' bayetj, na' byejrén ake', bi gakganro', nadkza'n bse'l ake'. 21Na'll bayetj Pedron', jatile' be'nn ka' bse'l Cornelion', lle'e leake': —Nada'n ria' Simón Pedro, ¿bi ken llayirjre nada'? 22Na'll bne be'nn ka': —To xan waka'a ya ka' re Cornelio bse'le' neto', nake' to be'nn lloe'rao Dios, na' yeolol be'nn Israel ka', lloe' ake' xti'lle' nake' be'nn wen. To angl ke Diosen' broe'rawe' le'e, na' golle' le'e yedxi'to' rwe' chejo' rille'n, nench ye'we' bin' llaya'l gone'. 23Na' broe' leake' yo', na' btas ake' lle' na'. Bateyó byas Pedron' zejrene' be'nn ka', na' ren ye bal be'nn nxenra'll Jesucriston', be'nn lla'a Jope na'. 24Ballop lla bllin ake' Cesarean'. Cornelion' ba llbexhe' leake', ba btope' no bi'ch lwellje', no be'nn nake' txhen. 25Ka bllin Pedron' yo'n, le bllojdote Cornelion', jatile' le'e, bche'k xhibe' gokra'lle' we'rawe' Pedron'. 26Pedron' basolle'e le'e, na' lle'e le'e: —Bazolla'a, lekze be'nnach nada'. 27Nna lloe'rente' le'e di'llen', byo' ake' lo yo'n, na' bre're' be'nn zan ba lla'a. 28Na'll Pedron' lle'e leake': —Re' nnézere, ley ke neto' be'nn Israel, ll-llonen cho'to' lo yo' rill be'nn bi nak be'nn Israel gon aktoe' txhen, zan Diosen' ba broe're' nada' gona' be'nn ka' txhen, la'kze bi nak ake' be'nn keto'. 29Ke len na', kate bra' be'nn ki badxi'i ake' nada'n, le za'tia'. Na' lle'nra' nnere bi ken goxhre nada'. 30Na'll bne Cornelion': —Nna' llak tap lla, hor kite lladá chonne, nona' was, na' llalwilla' Dios, ka bre'ra' to be'nn badse'e rawa'n llaktit xhara'ne'n kwis. 31Na' bne'e: “Cornelio, ba bzenay Diosen' kan' llalwilloe'n, na' ba bre're' kan' llono' llakreno' be'nn ya'che. 32Bse'l be'nn lljake' Jope, na' lljaxi'i ake' to be'nn re Simón Pedro, zoe' rill be'nn re Simón, be'nn wazo'll yid. Zoe' lloa' nisda'o. Na' kate ra' Pedron' rillo', na'll we'rene' rwe' di'lle.” 33Na'llen' le bse'ltia' be'nn ka' badxi'i rwe'n, na' ba beno' wen bedo'. Ni lla'to' nna', na' lle'neto' wzenayto' bin' lle'ne Diosen' gonto'. 34Pedron' bzorao lloe' di'll, na' bne'e: —Nna'll ba byejnie'ra' ke Diosen' bi llale'e ke ke be'nne. 35Be'nn lla'a gateze yellrio, cha' llap ake' Diosen' bara'nne, na' llon ake' da wen, llo'ra'llkze Diosen' leake'. 36Diosen' bdixjwe're' be'nn Israel ka', wak wazorenllo Diosen' wen, cha' wxenra'll-llo Jesucriston', le Le'en nak Xan yeolol-llo. 37Re' nnézkzere ka dan' gok doxhen gan' nzi'i Judean', dan' bzorao gan' nzi'i Galilea na', bde kan' bdixjwe' Juan na' xti'll Diosen', na' bchoe' be'nn ka' nis. 38Nnézkzere, Dios na'n be'e Jesús be'nn Nazareten' yel wak, na' be'e Le'e Spíritu ke'en. Na'llen' bda Jesúsen' bene' da wen, bayone' yeolol be'nn llsa'kzi' daxi'on, le Diosen' bzorén Le'e. 39Na' neto' bre'to', na' lloe'to' di'll ke da ka' ben Jesúsen' do Judea na' Jerusalén, na' bre'teto' kan' gok bet ake' Le'e, bda'a ake' Le'e le' yay cruzen'. 40Bixha Diosen' basbane' Le'e bayónn lla, na' bene' nench broe'rawe' neto'. 41Kere broe'rawe' yeolol be'nnen', neto' breje' da nellte nench we'to' xti'lle'n broe'rawe' neto'. Neto' we'j bdaorentoe' txhen, kan' babane' radj be'nn wat ka'. 42Na'll ba bse'le' neto' chixjwe'to' yeolol be'nne, ba brej Diosen' Le'e gone' yel koxchis ke be'nn ban, na' be'nn ba got. 43Yeolol be'nn ka' be'e xti'll Diosen' kana', be'e ake' xti'll Jesucriston', bne ake' noteze chejle' ke'e, Dios na' yezi'xhene' ke ake'. 44Nna lloe'te Pedron' di'llen', kat byo' Spíritu ke Diosen' yichjra'llda'o be'nn ka' lla'a llzenayen'. 45Be'nn Israel ka' nxenra'll Jesucriston', be'nn ka' bnao Pedron', llabán akre' kwis ka nak rente be'nn bi zjanak be'nn Israel, ba byo' Spíritu ke Diosen' yichjra'llda'o ake'. 46Gokbe'e akre' kan' bxhi'i be'nn ka' Spíritu ke Diosen', le bzoraote lloe'rao ake' Dios, llnne ake' to di'll yobre. 47Na'll bne Pedron': —Bibi de wllon choa be'nn ki nis nna', ka nak Spíritu ke Diosen' ba byo'n lo yichjra'llda'o ake'n, kan' ba byo'n lo yichjra'llda'o lli'o. 48Na' golle' leake' choa ake' nis, le ba nxenra'll ake' Jesucriston'. Bde na' go'tyoe akre' Pedron', nench go'yrene' leake' ye chop chonn lla.

will be added

X\