3 Juan 1

1Nada' naka' be'nn gore brao, na'llen' llzoja' di'll ki ko'o rwe' nllie'ra', Gayo. Do ra'lla' llakra' rwe'. 2Be'nn bi'che, llnnaba' rao Diosen' gak wen ko'o, na' so'o wen rao yel nban ko'o, kan' ba zorén yichjra'llda'o na'. 3Bawera' kwis ka bara' to chope be'nn lwelljllo ka', lloe' ake' di'll kan' llono', na' kan' zoteze zo'o llono' wen, dan' llzenayo' di'll li ke Diosen' do yichj do ra'llo'. 4Na' billre bi de da llawellra' llnnezra' llzenay be'nn ka' di'll li ke Diosen' do yichj do ra'll ake', be'nn ka' nak ka xhi'nna'. 5Bi'cha' nllie'ra', llono' wen llakreno' be'nn lwelljllo ka', na' katek wen na' llonro' be'nn zi'te ka'. 6Neto' lldop ll-llayto' ganni llonlira'llto' Jesucriston', leake' ba be'rén ake' neto' di'lle kan' bllie' akroe'n. Na' kat yed ake' da yobre gan' zo'o, gakrén akchgoe' nench yego' ake' nez da yobre, le leake'n llon ake' xchin Diosen'. 7Leake' ba bllach ake' lloe' ake' xti'll Criston', le ba nxenra'll ake' Le'e. Na' bi nna wze ta'k ake', bi si'i ake' ke be'nn ka' bi llejle' ke Criston'. 8Ke len na' llaya'le wrebllo be'nn ka', kone ka' gakrén aklloe' gon aklle' nench gaslas xti'll Diosen'. 9Ba bzoja' re' lldop ll-llayre llonlira'llre Jesucriston', zan ka nak Diótrefes na', lle'nre' gake' be'nn brao ga zeraoze, na' bi llzenaye' keto'. 10Ke len na' kate yeda' yedwia' re', na' tile', le de'e ll-lliayi'lle' neto', na' lloe' di'll wenra'lle keto'. Na' kere da na'zen' dan' llone'n, na' lekze ka' bi llrebe' be'nn lwelljllo ka' za'k zi'te rille'n, na' kate no be'nn lwelljllo ka', lle'n akre' wreb ake' leake', na' llabejte' leake' ka'le radj be'nn ka' lldop ll-llay llonlira'll Jesucriston'. 11Bi'cha' nllie'ra', bi gono' txhen be'nn ka' llon da xhinnjen', zan benrén txhen be'nn ka' llon da wen na'. Be'nn ka' zoteze zoe' llone' da wen, leakse'n nombia' ake' Dios, na' be'nn ka' zoteze zoe' llone' zre da xhinnj, leake'n bi nombia' ake' Dios. 12Yeololze be'nn lloe' ake' di'll wen ke Demetrion', to nakbie' zeje zejrene' di'll li ke Diosen'. Lekze ka' neto' lloe'to' di'll llone' da wen, na' nnézere lloe'to' di'll li. 13Nna dell di'll zan we'rena' re', zan bill lle'nra' wzoja'n le' yich ni. 14Le llbexha' yellayllo, na' we'llo di'll kat ba zollo txhen. 15Sochga yichjra'llda'ore nbaraz. Be'nn ka' nllie' rwe'n zjani't ganni, llwap ake' rwe' lliox. Leska' llnnaba' lewap lliox twej twej, be'nn ka' nllie'llo gan' zo'o na'.

will be added

X\