2 Timoteo 4

1Xanllo Jesucriston' yede' da yobre nench yedyene' yel koxchis ke yeolol be'nnach, ke be'nn ban, rente ke be'nn ba got. Kat yede' na', na' sorao nnebie'. Ke len na' llasnisra' rwe' rao Xanllo Jesucriston', na' rao Dios nench gono' da ki. 2Soteze so'o chixjwe'ro' xti'll Diosen'. Na' be'rén be'nn ka' di'll nench gakbe'e akre' llon ake' da xhinnje, bdil ake' ka da xhinnjen' llon ake'n, nench na' yeyat akre'n, na' bdap yel llxhenra'll katen' wzejnie' akroe' dan' llaya'l gon ake'n. 3Wllin lla kat bill ye'n akre' wzenay ake' xti'll Diosen', dan' llzejnie' lli'o dan' nak da li, na' wtop ake' be'nne wzejnie' leake' ye to di'll yobre da chazra'll leakze'. 4Kwej yichj ake' bill wzenay ake' ke di'll lin', na' wzenay ake' ke di'll da llayirjla'll be'nne. 5Zan ka nako' rwe', llaya'l gako' be'nn yo' xhbab, na' bdap yel llxhenra'll ke yeololte da za'kzi'o, na' soteze so'o we'o Di'll Wen ke Xanllo Jesucriston' do yichj do ra'llo'. Ben yeololte dan' bro' Diosen' rao na'o gono'. 6Na' ka nak nada', ba rez got ake' nada', ni ke dan' bena' xchin Dios na', da li ba ll-llin lla lljazorena' Diosen'. 7Na' llawera' wak nnia' do yichj do ra'lla', ba bdilrena' dan' bi llazra'll Dios na'. Ba bena' yeolol da bro' Diosen' rallna' gona', ba bzechicha' bxenra'lla' Jesucriston'. 8Na' kat lljazoa' gan' zo Diosen', na' wzoe' nada' nbaraz dan' bena' da wen chak wbana'. Na' Xanllo Jesucriston' zeje' lixheje, le wllin lla wchoybie', kon kan' nak da li ke'e na', akre gak ke yeolol be'nne, kere nadza'n wzoe' nbaraz, renkze nollre be'nne llawé zo ake' bexh ake' baten' yede' da yobre. 9Ben to bien le yedtegazo' yedwia'o nada'. 10Le be'nnen' nzi'i Demas na' ba bsanra'lle' nada', na' ba zeje' zjate'e yellen' nzi'i Tesalónica, de'e llirje' bi da ga't ke'e yellrio ni. Na' be'nnen' nzi'i Crescente na', ba zeje' gan' nzi'i Galacia, na' Tito na' ba zeje' yellen' nzi'i Dalmacia. 11Ye toga Lucas na' nna nga'nnrén nada'. Na' te'o wche'o Marcosen' katen' yedo' na', nench gakrene' nada' ke xchin Dios dan' llona' ni. 12Ka nak Tíquicon', ba bse'le' Éfeso. 13Na' lle'nra' go'xo' xhadon kia', dan' bkwa'nna' yellen' nzi'i Troas rill be'nnen' nzi'i Carpo, katen' za'o na', na' leska' go'xo' yich ka' nyoj, da lliaraolle go'xo' yich ka' nak de yid da ka' ba nyoje. 14Alejandro be'nn wachekw ya na', le ba bkwa'nntonte' nada'. Xanllo Dios na' we'e le'e da sa'kzie' kan' bene'n. 15Na' bi gatra'llteko' kat lljatiloe', le zejteze zeje' llone' krere ke xti'll Diosen' kan' lloe'llon na'. 16Kan' bde ake' nada' rao koxchis ka' da nelle, nokz no llra' gakrén nada', yeololte be'nn ka' llakra' gakrén nada', to bsanra'll akze' nada'. Dios na' yezi'xhenchaze' ke ake' dan' bi gokrén ake' nada'n. 17Zan Xanllo Jesucriston' bzerene' nada' gokrene' nada', nench bia'a xti'lle'n rao yeolol be'nn ka' zjalla'a na', be'nn ka' bi nak be'nn Israel. Na' basre'e nada' rao yel got, ka'kze be'nn bará lloa' bell yi'xe, gok kia'. 18Na' wasrakze Xanllo Jesucriston' nada' rao yeolol bi da gak kia', na' wakrenkze' nada' chak nna zoa' llinte lla lljazorene' gan' llie' llnebie' na'. Na' llaya'l wxenra'll-lloe' ke chnare. Ka'n gakchga. 19Wapgo' Priscan' lliox ren Aquilan', leska' be'nn ka' lla'a lo yo' ke Onesíforo. 20Eraston' baga'nne' yellen' nzi'i Corinto, na' bkwa'nna' be'nnen' nzi'i Trófimon' gan' nzi'i Mileto, ni ke dan' goke' yillwe'. 21Na' ben bien yedo' kat za llin lla llak zay. Na' be'nn ka' nzi'i Eubulo, Pudente, Lino, Claudia na' yezikre be'nn nxenra'll Jesucriston' ganni, llwap ake' rwe' lliox. 22Llnnaba' sorenchga Xanllo Jesucriston' rwe', na' gakrenchga Diosen' yeololre. Ka'n gakchga.

will be added

X\