2 Timoteo 3

1Leska' llaya'l nnezro' da ni: kat llin lla ba rez yed Xanllo Jesucriston' da yobre, sorao gak da nxholl. 2Be'nn zan yeyoe'rao kwin ake', na' be'nn zan so yichjra'llda'o ake' ga't mell xhen ke ake'. We'e ake' di'll ke da wen na' llon ake', na' gak ake' be'nn ya'ra'lle. Nnechach ake' ke Dios, na' bill wzoa ake' xti'll xaxhna' ake'. Bi yeyazra'll ake' bi da gon Dios, bill gap ake' Le'e bara'nne. 3Bi yeya'chra'll ake' be'nne, bi yezi'xhen ke lwellj ake', nnechach ake' ke be'nne, gon ake' kon da nen ke ake', gak ake' be'nn zban, na' wie akre' da nak da wen. 4Wlliayi'll lwellj ake' rao be'nne llwie leake', bill lleb ake' gon ake' da xhinnj, gon ake' xhbab za'k ake' kwis, na' gon ake' da wpé leake', na' bill lljadinra'll ake' Dios. 5Lekze da zan da gon ake', nench na' gake be'nne le nxenra'll be'nn ki Dios, zan bibi yel wak ke Diosen' zorén leake'. Bi gonreno' be'nn ka' txhen, be'nn ka' llon kan' ba bnia' na'. 6Ka be'nn ki llon ka', lljake' do rill no'r ka' llejle' da'ze, na' llonre' akre' leake', kone di'll ke ake' ka'. Na' no'r ka' de do'l ke ake' kwis, le llon akteze' kon da nen ke ake', da nak da xhinnj. 7Na' ka nak no'r ki, lla'teze lla'a ake' llzenay ake' kat no llzejnie' leake', na' bi llado'l akre' chejnie' akre' di'll li ke Diosen'. 8Kan' gok kana', be'nnen' nzi'i Janes, na' be'nnen' nzi'i Jambres, bwie akre' da Moisésen', bi gokra'll ake' wzenay ake' di'll li dan' be'rene' leake'n, na' ka'kzen' nna', nna ni't be'nn wxhiye'e ka', nna' lla, llwie akre' di'll li ke Diosen'. Le nchole lo yichj ake'n yel wen da xhinnj ke ake' na', na' llsan ake' bill nxenra'll ake' Diosen'. 9Na' ka nak be'nn ki, bi gak kwejrao ake' ye scha, sete llin gak ke ake' kan' gok ke Janes na' ren Jambres, llin lla kat gakbe'e be'nn zan, kreren' llzejnie' akre' yel ke llejnie' ke ake' na'. 10Na' rwe' Timoteo, nnézkzero' kan' ba bzejnie'ra' rwe'n, na' kan' zoa' llona' da wen. Na' nnézkzero' lli' yichja' gona' yeolol kan' ne Dios na'. Na' zediakza' nxenra'lla' Dios biteze da llak kia'. Na' napa' yel llakxhenra'll ren lwellj be'nnacha', na' nllie' aksere'. 11Na' bi llbej yichja' xchin Dios dan' llona', la'kze da zan da bsa'kzi' be'nne nada'. Na' nnézkzero' kan' ben akre' nada'n, kan' bzoa' gan' nzi'i Antioquía, na' kan' bya'a yell gan' nzi'i Iconio ren yellen' nzi'i Listra, na' kan' bllayrawa'. Na' Xanllo Jesucristo na', basre'e nada' rao yeolol dan' gok kia' na'. 12Da li nni'tkze be'nn wsa'kzi' lli'o nxenra'll-llo Xanllo Jesúsen', lli'o lli' yichjllo llzenayllo xti'lle' na'. 13Be'nn wen da xhinnj ka', na' be'nn waxoayay ka', zjazé akse' llon ake' da xhinnjen', siye'e ake' be'nne, na' leska' llejle' ake' ke di'll wenra'll da llayoe' be'nn yobre. 14Na' rwe' Timoteo, llaya'l setezo' wzenayo' ke da ka' llejnie'ro' ke Criston', nnézkzero' naken di'll li, nnezkero' kan' nak be'nn ka' bzejnie' rwe'. 15Le kan' nako' bida'oten', ba nombia'o xti'll Diosen' dan' nyojen. Xti'lle' na'n llzejnie'n lli'o llaya'l wxenra'll-llo Xanllo Jesucristo nench yesrá Diosen' lli'o. 16Kwin Dios na'n bzejnie're' be'nn ka' bzoj ake' xti'lle'n, nench na' bzoj ake'n kan' lle'nre' na'. Na'llen' doxhen xti'll Dios dan' nyojen, za'ken dan' llzejnie'n lli'o ke Diosen', na' llago'n lli'o nez cha' llonllo da xhinnje, na' llzejnie'n lli'o akren' gonllo to da wen rao Diosen'. 17Na' lli'o nxenra'll Diosen', llzejnie' xti'lle'n lli'o yeolol da llaya'l nnézello nench sollo gonllo yeolol da wen.

will be added

X\