2 Timoteo 2

1Xhi'nna' da'o, llnnaba' sechicho' wxenra'llo' Xanllo Jesucriston', le Le'en ba benla'ye' rwe'. 2Na' yeolol da ka' ba benro' bdixjwe'ra' rao be'nn zan, bzejnie'ren be'nn yobre, be'nn wzenay len do yichj do ra'll ake', nench na' wak wzejnie' akre'n no be'nn yobre. 3Na' bdaora'll bi da sa'kzi'o chak llono' xchin Jesucristo na'. Ben ka llon to be'nn waka'a ya, be'nn bi llebe cha' bi da lljatie'. 4Le to be'nn zeje de be'nn waka'a yan', bi gak gon xchine' chak zeje' rao wdilen', llbeje'n yichje' nench gone' bi dan' lle'ne xane'n gone'. 5Rebe kwis ka ke be'nn llej witje, cha' bi gone' kan' llaya'l gone' na', kere gone' gan dan' sie'n cha' ka'. 6Leze be'nn llon llin yi'xe, nench na' gak yezie' daxhix nell da kwia rao yay ke'e na', zga'tek llaya'l gone' llin. 7Bayón ke xhbab kwasro ka da ki ba bnia' rwe', na' Xanllo Jesucristo na', gakrenchgue' rwe' chejnie'ro' yeololen. 8Jadinra'll ke Jesucriston' be'nnen' babán radj be'nn wat ka', nake' xhi'nn dialla Rey da David. Le len na' llzejnie'ra' katen' lloa'a Di'll Wen ke'en. 9Na' dan' llyixjwe'ra' Di'll Wen ke'e na', llsa'kzi' ake' nada' ka naken yoa' lo rill ya ni, ka yo' to be'nn wen da xhinnj. Na' kere nello rente xti'lle' na'n yo' lo rill yan'. 10Na'llen' llaora'lla' biteze da llak kia', kon we'kza' xti'll Diosen', le nllie'ra' yezikre be'nn ka' ba brej Diosen', nench yesre'e leake' dan' ba nak ake' txhen Xanllo Jesucriston', na' lljazorén ake' Le'e ke chnare, gan' gak wen ke ake' na'. 11Di'll ki nak da li: Cha' gatllo ni ke dan' llonlira'll-llo Criston', leska' lljazorenkzllo Le'e txhen. 12Na' cha' yellayraollo, lekze gakrenlloe' txhen katen' nnebie'n. Na' cha' nnello bi nakllo be'nn ke'e, ka'kze nne Le'en bi nakllo be'nn ke'e. 13La'kze cha' lli'o bi gonllo kan' ba bnello na', zan Le'en gonkze' kon kan' ne'e gone' na', le Le'en bi gak wtebrawe' gone' da ba nllie' bia'a gone'. 14Jasara'll be'nn ka' nxenra'll Jesucriston' da ka' ba bzejnie'ra'n. Leska' yesnis akroe' bi naken wen rao Xanllo Dios yesdil yeschach ren lwellj ake' ke bi gaze di'lle. Bi naken wen gon ake' ka', le kat be'nn ka' lle'ne til chach ake', len na' gon bi chejle' be'nn yob akre' xti'll Diosen'. 15Ben ga zerao sa'kro', nench yewé Diosen' kan' llono' na', ka llon to be'nn wen llin, bibi de sie' yel zdo' cha' llone' da lixheje. Ka' gono' rwe', wroe' wsedro' xti'lle'n lixheje. 16Bi gonreno' be'nn ka' txhen be'nn ka' lloe' biteze di'll da bibi za'ke, di'll da bibi zejen ke Dios, le be'nn ka' llon ki, zejzell llbix ake' rao da xhinnjen'. 17Di'll dan' nak ka' ll-lleyi'n be'nn ka', naken ka to we'e gore, kan' gok ke be'nnen' nzi'i Himeneo ren be'nnen' nzi'i Fileto. 18Brej yichj ake' di'll li. Na' Llroe' llsed akre' ne ake' bi gonllo rez yebanllo radj be'nn wat ka', ne ake' ba bde ke dan'. Na' bal be'nn ka' ba nxenra'll Criston' ba llakchix akre', ni ke xti'll be'nn ka' ne ka'. 19Zan ka lli'o zekzllo nxenra'll-llo di'll li ke Criston', na' llon Diosen' nench bi kwej yichjllon'. Len na' naken ka to ran yo' da none' da war. Na' nyojkze xti'll Diosen' nen: “Dios na' nnezre' no be'nn ka' zjayo' lo ne'e.” Na' lekze nyojen gan' nen: “Noteze be'nne ne'e llonlira'lle' Xanllo Diosen', llaya'l kwej yichje' billbi da xhinnj gone'.” 20To rill be'nn wnia', de no leo ye'nne, na' no ye's leo de ya cha'o dan' nzi'i oro, na' de ya cha'o dan' nzi'i plat. Leze de no ye'se leo de bennj, na' de no yayra', na' billre de yay. Balen llonrén ake' llin, llon ake'n ka to da za'ke, na' ye balen bi gaze llon akre'n. 21Kan' naken ke lli'o, cha' kwej yichjllo da xhinnjen', na'll gonrén Xanllo Diosen' lli'o llin, ni ke dan' llonllo da zan da wen dan' lle'nre' gonllo na'. Na' cha' ka' gonllo, nakllo ka to leo de ya cha'o dan' nzi'i oro. 22Na' ka nak rwe', llaya'l kwej yichjo' biteze da xhinnj da zera'll lo ra'llda'on gono', ka da zera'll no be'nn we'o gon ake'. Bayirjla'll akre gono' nench gako' be'nn wen rao Dios, nench sechicho' wxenra'lloe' nench llie'ro' Diosen', na' nench so kwezo' kwasro ren be'nn lwelljo' ka'. Na' ben txhen yeolol be'nn llnnab okré rao Xanllo Dios, be'nn ka' nake be'nn ra'llda'o yalle. 23Bi gono' txhen be'nne bi llejnie', be'nne chach lloe' ake' di'll ke nxhia, na' xti'll ake'n llxen wdile ke be'nne. 24Lli'o llon xchin Dios bi llaya'l tilrenllo be'nne. Llaya'l gakllo be'nn wen be'nn cha'o rao yeolol be'nne, llaya'l gakllo wzejnie' akelloe' ke Diosen', na' llaya'l gapllo yel llxhenra'll ke leake'. 25Na' kat yego'llo nez be'nn bi lle'ne wzenay di'll li ke Criston', llaya'l we'rén aklloe' di'll cha'o, na' sollo wiallo cha' Diosen' gakrene' leake', wcha'a yichjra'llda'o ake'n, na' so ake' wzenay ake' ke di'll li ke'en. 26Ka'n gonllo nench yelloj ake' rao na'a daxi'on, le len na' llonen nench llon ake' kon kan' llazra'llen na'.

will be added

X\