2 Tesalonicenses 3

1Nna' be'nn bi'che, yelwillchgare Diosen' gakrene' neto', nench na' yob lljadixjwe'to' xti'll Xanllo Jesucriston' doxhente, nench na' chejle' yezikre be'nne, na' gap ake'n bara'nne, kan' ba ben re'. 2Lekze lennabchga rao Diosen' yesre'e neto' rao be'nn ka' llwie lli'on, be'nn ka' nao da llon krere, le kere yeolol be'nne llonlira'll Jesucriston'. 3Xanllo Jesucriston' zokze' llone' ka dan' ne'e gone', na' gakrene' re' nench sechichre gonlira'llre'. Lekze wkwas wkwe'je' re' rao da xhinnjen'. 4Na' nxenra'llto' llakrenkze Xanllon' re', na' llonre dan' ba gollto' re' gonren', nench na' nni'ttezre gonren. 5Na' llnnaba' rao Xanllo Jesucriston' gakrene' re', nench gombia're yel nllie' ke Diosen', na' yel llakxhenra'll ke Criston'. 6Be'nn bi'che, llyixjwe'to' re' kan' ne Xanllo Jesucriston', bi llaya'l gonre txhen be'nn lwelljllo ka' be'nn ka' bi lle'ne gon llin, le bi llon ake' ka dan' broe' bsed aketoe' na'. 7Benkz neto' llin kan' bzorento' re', na'llen' nnézere kan' llaya'l gonre na'. 8We'e bdaokze keto', bllayraoto' bento' llin do lla do yere nench we'j bdaoto', na' bibi bnnábeto' re' bi da byálljeto' gonrento' llin. 9Naksen nnábeto' re' da ye'j gaoto' chenake chak bento' xchin Diosen' gan' zore na', na' bi bento' ka', na' ka' broe'to' re' kan' llaya'l gonre na'. 10Kan' bzorento' re' bchoybia'to' bneto': “Cha' no bi gon llin, bi llaya'l gawe'.” 11Na' nna' ba béneto' di'llen', llasné ake' balre bibi llin llonre, kon dare, na' llawere di'lle. 12Na' cha' nol re' llon ka', lla'tyoera' re', na' llasnisra' re', gonre kan' ne Xanllo Jesucriston', na' bill tare ka', leyezorao chaze leyeyón llin nench ga't da ye'j gaore. 13Na' re' be'nn bi'che, bi lljachie're gonre da wen na'. 14Na' cha' no be'nn bi llazra'lle' ka dan' ba bzojto' ni, lewiaya'nne non' llon ka', na' bill gonrenre' txhen nench waye're' kan' llone' na'. 15Zan bi wiere', lewzejnie're' di'll kwasroze, le nake' be'nn lwelljre. 16Nna' llnnaba' rao Xanllo Jesucriston', be'nnen' nzoa lli'o so kwezllo kwasro lo yichjra'llda'ollo, gonchgue' so kwezre nbaraz yeo lla biteze da llak. Na' llnnabra' Le'e serenchgue' yeololtere. 17Na' nada' kwinkza' Pablo llzoja' ra't da'o le' yich ni, llwapa' re' lliox kan' llonkza' le' yeolol yich ka' dan' llse'la', llona'n kone ta'ka' ni, nench nroe'n nadkza'n llse'la'n, le ba nombia'kzre ka di'll ka' llzoja'n. 18Xanllo Jesucriston' gakrenchgue' yeololtere. Ka'n gakchga.

will be added

X\