1 Be'nn bi'che, nna' da yobre nia' re' kan' gak katen' yed Xanllo Jesucriston' da yobre, yetope' lli'o lljazorenlloe' txhen. 2 Bi wxoayay ake' re', cha' no yede' yedye'rene' re' di'lle, siye'e ne'e Spíritu ke Diosen' nen, ba bllin lla yed Jesucriston' da yobre. Na' bi xoayayre cha' bi da yénere, cha' ra' no yich da nyoj di'll wenra'lle nen da bse'l neto'n, siye'n nen ba bllin lla yed Jesucriston' da yobre. 3 Bi we're latj no siye'e re', cha' bi nne ake' o cha' bi da gon ake'. Le kate za yed Xanllo Jesúsen' da yobre, be'nn zan chas wie akre' Diosen'. Leze kana' lloj to be'nn xi'o, be'nn bi wzoa xti'll Diosen'. Be'nn na'n ba naken yeyeje' lo yi' gabil. 4 Gake' be'nn ya'ra'lle, na' wiere' da nak ke Diosen', leska' wiere' biteze da llonlira'll be'nne. Na' lljachie' lo yoda'o ke Diosen' ga ye'nre' gake' xhen, na' ye'nre' gone' ka Dios, na' kwinze nne'e: “Dios nada'”, nench gon be'nn zan le'e xhen. 5 ¿Bi za'ra'llre kan' bzorena' re', na' bzejnie'ra' re' kan' gak kat yed Jesucriston' da yobre? 6 Nnézkzere bi dan' ll-llon lloj be'nn xi'on be'nn wxhiye'n, ke nake nna', bi nna llin lla lloje'. 7 Na' ba zjani't be'nn bi llzoa xti'll Diosen' nna', na' nna nga'ch da ka' llon ake'n. Zan llin lla bill so dan' wllon na'. 8 Kana'llen' lloj be'nn xi'on, be'nnen' bill wzoa xti'll Diosen'. Na'llen' yed Xanllo Jesúsen' nse'e beni' xhen na', na'll we'e Xanllon' di'll, na' kone be dan' lloj lloe' na', gote' be'nn xi'on. Ka'n gone' yenitrawe'n. 9 Na' kat wroe'rao be'nn xi'on, kone yel wak ke daxi'o na', gone' da yebane be'nne nench wxoayaye'n leake'. 10 Yeololte da xhinnj gone'n, wxoayaye'n be'nn ka' ba naksen kweyi' ke chnare. Kweyi' ake', le bi gokra'll ake' chejle' ake' di'll li na', nench na' yerá ake'. 11 Na'llen' we'e Diosen' latj siye'n leake', nench na' we'rao ake' di'll wenra'lle. 12 Na' sa'kzi' ake' ke chnare, le bi byejle' ake' di'll li ke Xanllon', bawé akllre' zre da xhinnj na'. 13 Be'nn bi'che, nllie' Xanllo Jesucriston' re'. Na' neto' llaya'l soteze soto' we'to' yel llioxken ke Diosen' dan' breje' re', na' re' gokre be'nn nell bxenra'llre Criston' nench na' yerare. Na' ka' gok, le byejle're di'll li ke Diosen', na'llen' bse'le' Spíritu ke'en nench gakre be'nn ra'llda'o yalle. 14 Ni ke len na' brej Diosen' re', le byejle're Di'll Wen ke Jesucristo na', dan' be'rento' re', na'll wllin lla gon Diosen' sore nbaraz kwis gan' zo Xanllo Jesucristo na'. 15 Ke len na', be'nn bi'che, lesé war, lewzenay do yichj do ra'llre ka da ka' bzejnie'to' re', kan' be'rento' re' xti'lle'n, na' da ka' bzojto'. 16 Xallo Diosen' nllie're' lli'o. Kere da te ke dan' bene' nench bayonxhenra'lle' lli'o, na' sollo wxenra'll-lloe' gone' wen kello, le nllie're' lli'on. 17 Na' llnnaba' rao kwin Xanllo Jesucristo, na' ren Xallo Diosen', gakrenchgue' re' nench yeolol dan' gonren', na' di'llen' we're na', gak aken wen.
