2 Tesalonicenses 1

1Nada' Pablo llzoja' re' lldop ll-llayre llonlira'llre Xanllo Jesucriston' gan' nzi'i Tesalónica, na' nakre txhen Le'e, na' ren Xallo Diosen'. 2Na' nada' ren Silvano, na' Timoteo, llnnabto' rao Xallo Diosen', na' rao Xanllo Jesucriston' gakrén akchgue' re', na' wzoa ake' yichjra'llda'oren' so kwezre nbaraz. 3Be'nn bi'che, neto' llaya'l soteze soto', we'to' yel llioxken ke Dios kan' llonre na'. Ka'n llaya'l gonto' we'to' yel llioxken ke'e, dan' nna zjazellre llonlira'llre Diosen', na' zjazellre nllie' lwelljre. 4Len na' llaweto' lloe'to' xti'llren' ren yezikre be'nn ka' ba brej Diosen' lldop ll-llay ake' llon ake' Jesucriston' xhen ga yobre. Lloe'to' di'll ka wen na' llonre llonlira'llre Jesucriston', la'kze da zan da llsa'kzi' be'nn re'. 5Ke len na' nnézello Diosen' zeje' lixheje, na' lloe' latj sa'kzi're nench yedo'lere yebá gan' llie' llnebie' na'. 6Diosen' zeje' lixhej dan' we'e yel llza'kzi' ke be'nn ka' llsa'kzi' re', 7na' gonne' yel wazi'ra'll keré, na' ka'kzen' gonne' keto', ka da ka' za'kzi'llo nna'. Gonne'n katen' re'llo yetj Xanllo Jesúsen' le' yebá na', ren angl ke'e ka', be'nn ka' nsa'a yel wak. 8Yetje' nechje' bel yi'. Na' we'e yel llza'kzi' ke be'nn ka' bi llayombia' Dios, na' bi llejle' ake' Di'll Wen dan' llzejnie' ke Xanllo Jesucriston'. 9Leake'n sa'kzi' ake' ke chnare, ni ke yere'e akzre' Xanllo Jesucristo, be'nnen' le zeraoze za'ke nape' yel wak xhen. 10Katen' llin lla yed Jesucriston' da yobre, lli'o llonlira'll-lloe' nakllo rao ne'e, wroe'llo nake' be'nn za'k xhen, na' yebánello ka yel be'nn wen ke'en. Na' nakto' txhen ren re', dan' ba llejle're ka di'll dan' ba be'rento' re' na'. 11Na'llen' zoteze zoto' llnnabto' rao Diosen' gakrene' re', gonre wen nench yewere' re', re' ba breje' nench nakre rallne'e. Na' llnnabto' gakrene' re' kone yel wak ke'e na', nench na' wayoll gonre yeolol da wen dan' ba bchoyra'llre gonre, dan' llonlira'llre na'. 12Llnnabto' gonre gak Xanllo Jesucriston' xhen, rao biteze da gonre, na' Le'e gone' gakre xhen, le Dios kello na', ren Xanllo Jesucristo na', zo akse' llakrén ake' re'.

will be added

X\