2 Pedro 3

1Be'nn bi'che, nllie'ra' re', yich wllopen' dan' llzoja' re' ni. Na' llopten' ba bzoja' dan' lle'nra' gonre xhbab lixheje. 2Lelljasa'ra'll di'll dan' bzoj be'nn ka' gok rallna'a Dios be'e ake' xti'lle'n kana'. Leska' lelljasa'ra'll dan' nllia Xanllo bia'a gonllo, be'nnen' nak wasrá kello, di'll dan' ba bzejnie' postl ka' re'. 3Da ni naken to da lliarao chejnie'ren'. Ka naken ba zo rez yeyoll yellrio ni, lloj be'nn wtitj akre' xti'll Diosen', gon ake' kon kan' nen ke ake'. 4Na' wtitj akre' da nak ke Diosen' nne ake': “¿Batxhan' gak kan' bne Diosen' dan' yed Criston' da yobre? Ba got xozxta'ollo ka', na' toz ka nna llakse kan' bxhe yellriote.” 5Be'nn ka' llasné ka', bi lle'n akre' gon ake' xhbab kan' ba ben Diosen'. Kan' bxhe yebá ren yellrio, to bneze' gaken, na' le gokten kan' bne'en. Bxhe yellrion' radj nisda'on, na' nechjen doxhenen. 6Na' da ka' bene'n, bllin lla ka blliayie'n kone yejsi'on gok kan' babia nisen' doxhen yellrio. 7Na' yebán' ren yellrion', nllia Diosen' bia'a nak aksen kan' naken kana', na' kat llin lla gak yel koxchisen', kana' wzeye'n katen' gone' da sa'kzi' be'nn wen da xhinnj ka' ke chnare. 8Na' re' be'nn bi'che, nllie'ra' re', na' lle'nra' bi ganra'llre da ka' nia'n, le Xanllo Diosen' toz ka llakre' tlla, ka to mir iz, na' to mir izen' llakre'n ka tlla. 9Bal be'nne llak akre' ba blle Xanllo Jesucriston', bi nna yede' da yobre kan' bne'e kana'. Kere nello ll-llere'n, nna llape' yel llxhenra'll ke lli'o be'nnachen', na' lle'nre' ni tollo bi kweyi'llo. Lle'nre' yeolol-llo yeyátello da xhinnj kellon'. 10Na' Xanllo Jesucriston' yede' da yobre ka bi gakbe'e be'nne, ka llon to be'nn wan kat lloe' lo yo' ga lljalane', na' bi llakbe'e akre'. Kana' gak to llakia llebraz, na' kweyi' yeolol da ka' llre'llo le' yebán', kweyi' aken lo yi' xhen na', leska' yellrion', na' da zjadé rawe na', chey aken. 11Na' kan' llwiallo te ke yeolol bi da de, llaya'l wiallo ka da ka' llonllo, na' sollo gonllo da wen, na' wxenra'll-llo kwis Xanllon'. 12Na' llaya'l so kwezllo batxhan' llin lla gon Diosen' gak yel llza'kzi', na' gonllo ka yob gaken. Ka lla na' ga'lnninn le' yebán', na' dan' llre'llo le' yebá na', ga'lnninn aken, na'll yerán aken. 13Zan lli'o zollo rez yekobe' le' yebán' ren yellrio na', kan' ba bne Dios na', ga ga't da zej lixheje. 14Ke len na' be'nn bi'cha' nllie'ra', chak bezllo da ki gak na', llaya'l gonllo ga zerao sa'kello nench na' sollo nbaraz rao Dios, nench bibi do'l ga't kello da gon lli'o be'nn wen da xhinnj. 15Na' llaya'l gakbe'llo Xanllo Diosen' nape' yel llxhenra'll ke lli'o be'nnach nench yesre'e lli'o. Leska'n ba bzoj be'nn bi'chllo Pablo be'nnen' nllie'llon', lloe' di'll ke yel si'n na', ba be'e Diosen' le'e. 16Na' yeolol yich ke'e ka', lloe'n di'll ke da ka' ba bzoja' na', la'kze bzoje' bal da nak bni' chejnie'llo. Na' be'nn bi nna chejnie're' xti'll Diosen' kwasro, na' bi nna wxenra'llya'nne' Le'e, llejnie' akre' da ka' nlla're, ka'n llon ake' llchok ake' xti'll Diosen', na' billre da ka' nyoj na', na' len na' ngo'n leake' nez da wlleyi' leake'. 17Ke len na' be'nn bi'che, nllie'ra' re', ba nnézere da ka' bzoja' re'. Na' lewiá bi chejle're xti'll be'nn ka' bi llzoa xti'll Diosen', be'nn llon da zej krere, nench ke bixre bill gonre kan' lle'ne Dios na'. 18Na' legakbe'lle kan' llakrén Xanllo Jesucriston' re' na' gombia'llre', Jesucristo be'nnen' basrá lli'o ke chnare. Llaya'l gonlira'll-lloe' nna', na' ke chnare. Ka'n gakchga.

will be added

X\