2 Pedro 2

1Kana' blloj bal be'nn Israelen' bxhiye'e ake', basné ake' lloe' ake' xti'll Dios, na' ka'n gonkze no be'nn ak wzejnie' akre' re' di'll wenra'llen' wxe willje. Yeyirjla'll ake' ka gon ake' wzejnie' akre' re' di'll dan' wlleyi' re', ni ke gakbe'zere. Wkwas ake' ke Xanllo Jesucriston' ka'le, be'nnen' basrá lli'o, zan wllin lla kweyi' ake'. 2Be'nn zan nnao leake', gon ake' ka nen ke ake' no da xhinnj. Na' ni ke leake' lloj be'nne ne ake' bibi za'k Di'll Wen ke Diosen' dan' llroe' dogarj nez wen na'. 3Na' be'nn wenra'll ka' sera'll ake' wka'a ake' xhmellre. Len na' wzejnie' akre' re' da garjla'll leakze', nench we'e akre' mell. Bixha kana'te nchoybia' Diosen' ke ake' kweyi' ake'. 4Bi bazi'xhen Diosen' ke angl ka', kan' ben ake' da xhinnjen', lo yi' gabil bse'le' leake' gan' nak xchole, na' zjalla'a ake' nllej ake' gden chak llin lla we'e leake' yel llza'kzi' ke chnare. 5Leska' bi bazi'xhene' ke be'nn ka' blla'a yellrio ni kana', kan' bzo da Noé. Ben Diosen' to yejsi'o xhen da blleyi' leake'. Bdixjwe' da Noén' leake' kan' llaya'l gon ake' da zej lixhej. Na'llen' basrá Diosen' le'e ren ye gall be'nn lwellje'. 6Na' bachoyra'll Diosen', lekze blliayie' yell gan' bsi'i ake' Sodoma, na' ren yell gan' bsi'i ake' Gomorra kana', yel wen da xhinnj ke be'nn ka' blla'a yellen'. Bzeye'n bayakten de. Na' bene' ka' nench llasnisre' be'nn ka' za za'k, we'e yel llza'kzi' ke ake' cha' bi wzoa ake' xti'lle'n. 7Na' ka blliayie' yell ka', na' basre'e be'nnen' golle Lot be'nnen' gok be'nn wen rawe' na', le Lot na'n goke lo ra'llda'we' ka da xhinnj ka' ben be'nn ka blla'a yell ka'. 8Loten' goke' to be'nn wen, na' bllayrawe' lo ra'llda'we' ka nak bre're', na' benre' yeo lla ka dan' ben be'nn ka' da bi llaya'l gon ake'. 9Xanllo Dios na' nnezre' akre gone' yesre'e lli'o nxenra'll-lloe', ka nak da ka' za'k, lle'nen kwej yichjlloe', na' nnezre' akre gone' nench be'nn ka' bi nak be'nn wen rawe' na', so ake' sa'kzi' ake' kat llin lla wchoye' ke ake' ke chnare. 10Dios na' we'e da sa'kzi' be'nn ka' llon akteze' kon da nen ke xpe'r ake'. Leake'n bibi bara'nn llap ake' Xanllo Dios. Ni ke lleb akze' llon ake' kon da nen ke ake', nnechach ake' ke yeololte wnebia' ake. 11Na' ka nak angl ke Diosen', la'kze nak aklle' be'nn warll ka lli'o be'nnach, na' nap ake' yel llnebia' xhenll ka lli'o, na' leake'n bi llayaxhj akre' bi da nne ake' ke no be'nn za'k rao Dios. 12Na' ka nake be'nn ki llzejnie' akre' di'll wenra'llen', nnechach ake' ke da ka' bi llejnie' akre'n. Nak ake' ka bayi'xe, le bayi'xen' kon llon Diosen' llarj akba', na' lljaxen be'nnach leakba' llaso'teba'. Ka'kzen' kweyi' be'nn ka' llzejnie' di'll wenra'llen'. 13Ba llayrao ake' kan' bsa'kzi' ake' be'nn yobre. Na' llase'j llasaoxen ake' yeo lla. Na' kat lladopren' llzore lnni, leake'n za'k ake' gan' lla'ren', bill lliye'e akzre' cha' bi llon bi ne ake', le ka'n ziye'e da xhinnjen' leake'. Llak akre' zo ake' nbaraz, llon ake' kon da nen ke ake'. 14Kate llre'e akre' no're, zera'll ake' gonrén ake' leake' da xhinnj, bi lljachie' akre' llon ake' da xhinnj. Na' llko'yel akre' be'nne bi nna gombia' Jesucristo, nench gonrén ake' da xhinnjen'. Be'nn ka' llzejnie' di'll wenra'llen', bayo'rao ake' zera'll ake' bi de ke be'nne. Len na' llwie Dios kan' llon ake'n. 15Le ba bsanra'll ake' nez li ke Diosen'. Ba bka'a ake' nez xhinnj na'le, kan' ben da Balaam be'nnen' be'e xti'll Diosen' kana', be'nnen' gok xhi'nn da Beor. Balaam na' gokra'lle' chixhj ake' le'e, nench nnabe' sa'kzi' be'nn ak. 16Na' to burr ba bi llak nne, ben Diosen' bnneba' ka to be'nnach, na' bdilba' le'e ke yel ke llejnie' ke'en, nench na' bill gone' da xhinnj ke'en. 17Be'nn ki nak ake' ka to bej yeche ga bibi nis llia, na' nak ake' ka to bej ze yebá da ll-lli'y to be' xhen. Na' nlloyen ke ake' sa'kzi' ake' lo gabilen' ke chnare ga nak xchol kwis. 18Le lloe' ake' di'll wallojllo kwis llayoe'rao kwin ake', na' llko'yel akre' be'nn za ballach lo da xhinnjen', nench gon ake' da xhinnj yobre da nakll zdo', da lle'n akre' gonrén xpe'r ake'n, ka da llonkze no be'nne bi nombia' Dios. 19Be'nn ka' llzejnie' di'll wenra'llen' lle ake' leake', wzo aklle' nbaraz gon ake' biteze da nen ke ake', la'kze nak ake' ka to be'nn wen llin ke no da nak yel zdo'. Le yeololkzllo nakllo ka to be'nn wen llin ke da xhinnjen' kat llonllo kon da nen kello. 20Na' be'nn ka' ba nombia' Xanllo Jesucristo be'nnen' basrá lli'o, ba balloj ake' rao da xhinnj ka' nak zdo' rao yellrio ni, na' cha' da xhinnjen' gonen leake' gan da yobre, we'e ake' latj gon ake' da xhinnjlle, ka'kze yellayrao aklle' kerke kan' gok rao dan' balloj ake' da nell na'. 21Wenre chenak bi bembia' akse' xhnnez Diosen' dan' zej lixhej na', kerke da brej yichj ake' nez wen na', dan' bllia Diosen' bia'a gonllo. 22Ba benen ke ake' ka ke to di'll dan' ne: “Be'kwn' bayaoba' da bayebba', na' kuchen' ba bwazje'n, ba jallo'ba' lo bennj da yobre.”

will be added

X\