2 Juan 1

1Nada' naka' be'nn gore brao, na'llen' llzoja' rwe', no're. Rwe'n ba brej Diosen' llzenayo' xti'lle'n, na' ren xhi'nno' ka'. Da lin' nllie'ra' re', na' kere nadza', renkze yeolol be'nn nombia' ak di'll li ke Diosen', nllie' akre' re'. 2Nllie'to' re' dan' yo' di'll li ke Diosen' lo ra'llda'ollo, na' zon gakrenen lli'o ke chnare. 3Xallo Diosen', na' ren Xhi'nne' Xanllo Jesucriston', gakrén akchgue' re', yeya'chra'll ake' re', na' wzoa ake' yichjra'llda'oren' so kwezre nbaraz, le ba nombia're di'll li ke Diosen', na' ba nllie' lwelljre. 4Le bawera' ka bnnezra' xhi'nno' ka', ba zjani't akbe' llaso'n akbe' kan' ne di'll li ke'en, da ka' ba bllia Xallo Diosen' bia'a gonllo. 5Na' nna' lla'tyoera' rwe' no're, kere llzoja' rwe' di'll bia'a koben', le da ba bénkzello kan' bzoraollo llonlira'll-llo Jesucriston' dan' ne: llaya'l llie' lwelljllo. 6Cha' nllie'llo Diosen', na' gonllo kan' ne di'll bia'a ke'e na'. Na' ba nnézkzere kan' nllie' bia'a llie' lwelljllo, le kan' bzoraore llonlira'llre Jesucristo na'te, bzejnie'to' re' llaya'l llie' lwelljllo. 7Be'nn zan ba bllach yellrio ni, llzejnie' akre' krere, le llroe' akre' ne ake', kere be'nn bse'l Dios Jesucriston' be'nnen' bed gorje radj be'nnachen'. Noteze be'nn ne ka', be'nn wxhiye'e aken', na' llwie akre' Cristo na'n. 8Lewiaya'nn nench na' si're dan' llaya'l si're, ke nak dan' ba benre na', le nxholl bi si're dan' ba llwia Diosen' gonne' re'. 9Cha' kon to lli'o llzoallo dan' broe' bsed Criston' ka'le, na' llzenayllo billre da llzejnie' be'nne, bill zerén Diosen' lli'o cha' ka' llonllo. Na' cha' zotezllo llzenayllo dan' bzejnie' Criston', Xallo Dios na' ren Xhi'nne' Cristo na', zorenkze' lli'o. 10Na' cha' no be'nn yede gan' zore, na' lle'nre' we'rene' re' da bi nake xti'll Cristo na', bi wrebre' rillren', ni lliox bi wapre. 11Le cha' wrebre', na' nnello ba llonrenre' txhen llonre da xhinnjen' llone' na'. 12Nna dell da zan da nnia' re', na' bill lle'nra' wzoja'n le' yich ni. Le llbexha' yeda' gan' zore na', na' we'rena' re' di'll lloa' nench sollo nbaraz kwis. 13Xhi'nn be'nn biro'n, no'ren' be'nnen' brej Diosen' nench wzenaye' ke'e, llwap ake' re' lliox. Ka'n gakchga.

will be added

X\