2 Corintios 9

1Bi llonteken bien wzoja' re', nnia' lekwej mell da gakrén be'nn ka' nxenra'll Criston' do ga yobre. 2Nnezkzra' lle'nere gakrén akre'. Na' ba be'rena' be'nn Macedonia ka' di'll nench nnez akre', re' zore gan' nbane Acayan' lle'nere gakrenre be'nn ya'ch ka', na' ba bzoraore btopre mellen' wdwize. Na' da llonre na' ba llperen be'nn ka' zjalla'a zan yell gan' nbane Macedonian', nench na' gon ake' kan' ba llonre na'. 3Na' llse'la' be'nn ki nench ke bi yega'nna' wen, ka nak ba bia'a di'll keré nakre be'nn wen, na' nench na' sore xhnid. 4Le cha' sa'rén no be'nn Macedonia ka' nada' kat yeda' na', na' gakra' zdo' keré cha' bi sore xhnid katen' yeda' na', na' lekze ka' re' yeye're bi benre kan' bnia' na'. 5Na'llen' gokra' wen kwiarao be'nn lwelljllo ka' chonne', yed ake' gan' zore nench gakrén ake' re', wzeraore wtopre mell dan' bnere we're na'. Na'llen' we'ren do yichj do ra'llre, kere we'ren do yediaze. 6Lelljadinra'll kan' ne ake': Be'nn llaze ra'tze, ka' ra'tze llarape', na' be'nn llaz da xhen, da xhen yerape'. 7Ke len na' llaya'l we'e totore arke da llzánere we're, na' bi we'ren do yediaze, lewe'n do ra'llre, le Dios na'n llawere' be'nn zo nbaraz llzanre' bi da lloe'. 8Diosen' nape' yel wak, na' llakrene' lli'o biteze da yálljello. Na' llone' lla't yeolol da yálljello batteze, nench gak we'llo da yallje be'nne, na' gonllo billre da wen. 9Xti'll Diosen' nyojen ke be'nn llzanre' da de ke'e nen: Ba be'e da byallje zan be'nn ya'ch. Na' bi ganra'll Diosen' da wen na' bene'. 10Dios na'n llone' lla't no xhoa' binn da llazllo, na' billre yela' da lle'j llaollo. Lekze gonne' yeololte bi da yálljere, nench na' sa'kere we're bi da we're, na' gone' chi'o ka nak dan' zánere lloe're na', na' kone Le'en chejllre gonre da wen. 11Diosen' gone' ga't da cha'o keré nench wak we're do yichj do ra'llre be'nn bi da llyalljre'. Na'll kat we'to' be'nn ya'ch ka' dan' ba btopre na', na' we'e ake' yel llioxken ke Diosen'. 12Le dan' we're da yallje be'nn nxenra'll Jesucriston' do ga yobre, be'nn zan we'e yel llioxken ke Diosen'. 13Na' kate si'i be'nn ya'ch ka' mellen' lltopren', na' wroe'n llzenayre Di'll Wen ke Criston' do yichj do ra'llre. Na'll we'e leake'n yel llioxken ke Diosen' dan' wse'lre mell dan' gakrén leake'n, na' dan' llakrenre yeolol be'nn nxenra'll Criston'. 14Leska' yelwill ake' Diosen' dan' nllie' akre' re', na' wnnab akre' Dios gakrenlle' re' ye ra'te, le ba broe'n nllie' Diosen' re' kwis. 15Llioxken Diosen', kateken' za'k dan' llone' kellon'.

will be added

X\