2 Corintios 8

1Be'nn bi'che, lle'neto' nnézere kan' ba gokrén Diosen' to kwen be'nn ka' lldop ll-llay llonlira'll ake' Criston' toto yell gan' nbane Macedonian'. 2La'kze gok yel ya'ch yel zi' kwis ke ake', Diosen' bene' ka bni't ake' nbaraz lo ra'llda'o ake', na' bawé akre' kwis btop ake' mell xhen nench gokrén ake' be'nn bibi de ke. 3Nada' nnezra', na'llen' lloa'a di'll, be'e ake' bi da byallje be'nn yobre la'kze bibi go't ke leake'. 4Go'tyoe akre' neto' we'to' latj we'e ake' mell gakrén ake' be'nn ka' nxenra'll Diosen'. 5Na' ben aklle' ye ra't kan' lláketo' gon ake' na', le zga'tek ben kwin ake' rallna'a Xanllo Cristo na', na' leska' ben kwin ake' rallna'a neto', dan' gokra'll ake' kwis gon ake' kan' lle'ne Dios na'. 6Ke len na' ba go'tyoeto' Titon' wayede' ye to gan' zore na', nench gakrene' re' yesyollre wtopre mell dan' ba bzoraore lltopre kana'. 7Wen kwis llonre nxenra'llre Criston', na' llyixjwe're xti'lle'n, na' llejnie're kwasro da nak ke Diosen', na' zore llonre xchine'n, na' nllie're neto'. Leska' legón wenll, lewtope da yallje be'nne. 8Bi llona' bien we're mell, kon lle'nra' gonre xhbab ka llon be'nn bi da lloe' do yichj do ra'lle, na' ka' wak nnézere cha' nllie're Diosen' do yichj do ra'llre. 9Ba nnézkzere kan' nllie' Xanllo Jesucriston' lli'o. Na' dan' nllie're' lli'o na', bakwa'nne' yeolol da cha'o da de ke'e gan' lliarene' Dios na', na' bede' gorje' goke' ka be'nn ya'ch yellrio ni, na' badyene' nench yeolol dan' de ke'en gaken kello naklloe' txhen. 10Na'llen' wzejnie'ra' ka dan' llakra' nak wen gonre. Wdwize bzo lo ra'llda'oren' gakrenre be'nn ya'ch, na' bzoraore btopre mell do yichj do ra'llre. 11Na' llakra' wen na' naken wasyollre wtopren do yich do ra'llre kan' benkzre kan' bzoraore, na' we're arke zerao sa'kere. 12Cha' to be'nne do yichj do ra'lle lle'nre' we'e bi da we'e, Diosen' wawékzere' la'kze da ra'ten. Diosen' bi llnnabe' we'llo to da bi de kello. 13Bi nia' gonre ke da ni, na' billbi yega'nn keré dan' be'ren ke be'nn yobre. 14Kon lle'nra' ga't da yallje yeololre. Cha' nna' de ke re', llaya'l gakrenre be'nn ka' yallje. ¿Bixha cha' wllin lla kate ga't ke leake', na' re' yálljere? Na'llen' yeyakrén ake' re', na' ga't da yallje yeololre. 15Na'llen' gak kan' nyoj xti'll Diosen' nen: “Be'nnen' btopll da xhenlle bitbi bago'nn ke'e, na' be'nnen' btop ra'tze, bitbi byalljre'.” 16Llioxken Dios bene' nench zera'll Titon' kwis gakrene' re' kon kan' llona' nada' na'. 17Na' ka golle' yedwie' re' nench gakrenlle' re' ye ra'te, bawere' kwis, le bzo lo yichjra'llda'we'n yeyede', na' gakrenlle' re'. 18Na' llse'lto' ye to be'nn lwelljllo ren Titon'. Na' to kwen to kwen be'nn ka' lldop ll-llay llonlira'll Criston', lloe' ake' di'll ke be'nnen' llse'lto' ni, ne ake' nbaraz llyixjwe're' Di'll Wen ke Jesucriston'. 19Na'llen' brej ake' le'e, nench sa'rene' nada' kate cha'a gan' lla'a be'nn lwelljllo ka', lljasana' mell dan' lltopllon'. Na' we'llo mellen' nench gonllo Xanllo Jesucriston' xhen, nench wroe're llawere llakrenre be'nn lwelljre ka'. 20Na' llwiato' nench ke si'chi'll be'nn neto', ke nake mellen' lltopto'n. 21Na' llwiato' gonto' da li, kere chraoze rao Xanllo Dios na', renkze rao be'nnach ake. 22Na' leska' llse'lrén aktoe' ye to be'nn lwelljllo. Zan ras ba bre'to' llone' xchin Diosen' do yichj do ra'lle', na' nna' lle'nre' yede' gan' zore na', dan' nnezre' zera'llre kwis gonre kan' llazra'll Dios na'. 23Cha' no llnnab bi llon Titon', wak ye akre' llonrene' nada' xchin Diosen' nench na' llakrento' re'. Na' cha' wnnab akre' bi llon be'nn ka' ye chope, leyé ake' be'nn ka' lladop ll-llay llonlira'll ake' Criston', brej ake' leake', na' llse'l ake' leake'. 24Ke len na' legón akre' wen, nench nneze be'nn ka' llon Criston' xhen toto yell nllie' akere', na' wroe'n llonkzre wen, kan' bneto' kan' be'to' di'll keré.

will be added

X\